“Swi Vula Yini Ku Gandzela?”

Ku gandzela ku nga ha hlamuseriwa tanihi “xiendlo xo kombisa rirhandzu ni xichavo eka xikwembu.” EBibeleni rito leri nge “ku gandzela” leri hundzuluxeriweke ri huma eka marito ya ririmi ro sungula ri nga ha vula munhu loyi a nga ni xichavo swinene kumbe loyi a titsongahataka eka swivumbiwa swo karhi. (Mat. 28:9) Marito wolawo ma nga tlhela ma tirhisiwa loko vanhu va khongela Xikwembu kumbe va gandzela swikwembu. (Yoh. 4:23, 24) Mongo hi wona wu faneleke wu kombisa ndlela leyi marito wolawo ma faneleke ma twisisiwa ha yona.

Yehovha, Muvumbi tlhelo Hosi ya Vuako Hinkwabyo hi yena ntsena loyi hi faneleke hi n’wi gandzela. (Nhlav. 4:10, 11) Hi gandzela Yehovha hi ku xixima vuhosi byakwe ni vito rakwe. (Ps. 86:9; Mat. 6:9, 10) Swiga leswimbirhi, lexi nge vuhosi bya Yehovha ni lexi nge vito rakwe swi humelela ko tala ebukwini ya Ezekiyele. Xiga lexi nge “Yehovha Hosi Leyi Tlakukeke” xi kumeka mikarhi ya 217 ebukwini ya Ezekiyele kasi lexi nge “tiva leswaku hi mina Yehovha” xi kumeka mikarhi ya 55.—Ezek. 2:4; 6:7.

Hambiswiritano, vugandzeri bya hina a byi katsi ndlela leyi hi titwaka ha yona ntsena; vugandzeri lebyi tengeke byi katsa swiendlo. (Yak. 2:26) Loko hi nyiketela vutomi bya hina eka Yehovha, hi hlambanya leswaku hi ta n’wi yingisa hikuva i Hosi Leyi Tlakukeke ni ku xixima vito rakwe swinene. Tsundzuka ndlela leyi Yesu a hlamuleke ha yona eka ndzingo wa vunharhu, u fanise vugandzeri ni ku ‘tirhela Yehovha.’ (Mat. 4:10) Tanihi vagandzeri va Yehovha, hi tiyimisele ku n’wi tirhela.a (Det. 10:12) Hi tirhela Xikwembu xa hina loko hi endla mitirho leyi fambisanaka ni vugandzeri bya hina leyi lavaka leswaku hi titsona swo karhi. Hi yihi mitirho ya kona?

Hi nga tirhela Yehovha hi tindlela to tala, naswona hinkwato i ta nkoka eka Yena. Hi tirhela Yehovha loko hi chumayela van’wana, hi va kona etidyondzweni eHolweni ya hina ya Mfumo ni ku khathalela kumbe ku aka tindhawu leti hi hlengeletanaka eka tona. Ku engetela kwalaho, ku tirhela Yehovha swi katsa ku va ni vugandzeri bya ndyangu, ku hoxa xandla eka ntirho wo phalala vapfumerikulorhi lava pfumalaka, ku tirha hi ku swi rhandza etinhlengeletanweni ta hina kumbe ku tirha eBethele. (Hev. 13:16; Yak. 1:27) Loko vugandzeri lebyi tengeke byi ri bya nkoka emianakanyweni ni le timbilwini ta hina, hi ta endla “ntirho wo kwetsima vusiku ni nhlikanhi.” Swa hi tsakisa ku gandzela Xikwembu xa hina, ku nga Yehovha!—Nhlav. 7:15.