Ndlela Leyi Vandlha Ri Hleriweke Ha Yona

Yehovha i Xikwembu lexi hlelekeke. (1 Vakorinto 14:33) Hikwalaho, ni vanhu va xona va fanele va va lava hlelekeke. Ri hleriwe njhani vandlha ra Vukreste? Hi nga endla yini leswaku swilo swi famba kahle evandlheni?

1. I mani nhloko ya vandlha?

‘Kreste i nhloko ya vandlha.’ (Vaefesa 5:23) U kongomisa mitirho leyi endliwaka hi vanhu va Yehovha emisaveni hinkwayo a ri etilweni. Yesu u hlawule “nandza wo tshembeka ni wo tlhariha,” ku nga ntlawa lowutsongo wa vakulu lowu vitaniwaka Huvo leyi Fumaka. (Hlaya Matewu 24:45-47.) Huvo leyi Fumaka yi kongomisa mavandlha emisaveni hinkwayo, ku fana ni ndlela leyi vaapostola ni vakulu va le Yerusalema a va endla hakona. (Mitirho 15:2) Kambe vavanuna lava a hi vona varhangeri va nhlangano wa hina. Va kongomisiwa hi Yehovha ni Rito rakwe naswona va tiveka ehansi ka Yesu.

2. Hi wihi ntirho wa vakulu?

Vakulu i vavanuna lava nga Vakreste lava dyondzisaka leswi humaka eMatsalweni ni ku kongomisa vanhu va Yehovha hi ku va pfuna ni ku va tiyisa. Va endla leswi mahala. Va tirha hi ku swi rhandza leswaku va ‘endla ku rhandza ka Xikwembu; ku nga ri hi leswi va lavaka ku kuma swo karhi kambe hi ku tinyiketela.’ (1 Petro 5:1, 2) Vakulu va pfuniwa hi malandza ya vutirheli lawa na wona ma nga ha fanelekaka ku va vakulu hi ku famba ka nkarhi.

Huvo leyi Fumaka hi yona yi hlawulaka vakulu vo karhi leswaku va va valanguteri va muganga. Va vhakela mavandlha yo hambanahambana leswaku va ma kongomisa ni ku ma khutaza. Va hlawula vavanuna lava fanelekaka hi ku ya hi Matsalwa leswaku va va vakulu ni malandza ya vutirheli.—1 Timotiya 3:1-10, 12; Tito 1:5-9.

3. I yini leswi Mbhoni yin’wana ni yin’wana yi faneleke yi swi endla?

Vanhu hinkwavo evandlheni “va dzunis[a] vito ra Yehovha” hi ku hoxa xandla hi nkarhi wa tinhlengeletano ta vandlha ni ku chumayela hilaha va nga kotaka hakona.—Hlaya Pisalema 148:12, 13.

ANAKANYISISA

4. Yesu i murhangeri la nga ni musa

Yesu wa hi rhamba. Hlaya Matewu 11:28-30, ivi mi bula hi xivutiso lexi:

• Yesu u lava hi titwa njhani hi ndlela leyi a hi rhangelaka ha yona?

VHIDIYO: Vakulu Va Pfuneta Loko Ku Va Na Ku Tsekatseka Ka Misava eNepal (4:56)

Bibele yi yi hlamusela kahle ndlela leyi vakulu va faneleke va wu endla ha yona ntirho wa vona.

Hlaya Esaya 32:2 na 1 Petro 5:1-3, ivi mi bula hi swivutiso leswi:

• U titwa njhani hi leswi vakulu va tikarhatelaka ku pfuna van’wana hilaha Yesu a endleke hakona?

• Hi tihi tindlela tin’wana leti vakulu va tekelelaka Yesu ha tona?

5. Vakulu va veka xikombiso lexinene

VHIDIYO: Vakulu A Hi Va Rhangeri Kambe Vo Rhangela! (7:39)

Yesu u lerise vavanuna lava rhangelaka leswi va faneleke va swi endla. Hlaya Matewu 23:8-12, ivi mi bula hi xivutiso lexi:

• I yini lexi ku tsakisaka hi ku hambana loku se u ku voneke exikarhi ka vakulu lava yingisaka milawu ya Bibele ni vafundhisi?

1. Vakulu va dyondza Rito ra Xikwembu va tlhela va dyondzisa ni mindyangu ya vona

2. Vakulu va khathalela hinkwavo evandlheni

3. Vakulu va chumayela nkarhi ni nkarhi

4. Vakulu i vadyondzisi. Va tlhela va katseka loko ku basisiwa ni loko ku endliwa mitirho yin’wana

6. Hi fanele hi tirhisana ni vakulu

Bibele yi hi byela xivangelo xa nkoka xo va hi tirhisana ni vakulu. Hlaya Vaheveru 13:17, ivi mi bula hi swivutiso leswi:

• U vona onge swa twala leswi Bibele yi hi khutazaka ku titsongahata ni ku yingisa lava hi rhangelaka? Hikwalaho ka yini u vula tano?

Hlaya Luka 16:10, ivi mi bula hi xivutiso lexi:

• Hikwalaho ka yini swi ri swa nkoka ku tirhisana ni vakulu ni le ka timhaka leti hi vonaka onge a hi ta nkoka?

NKATSAKANYO

Yesu i nhloko ya vandlha. Swa hi tsakisa ku tirhisana ni vakulu lava tivekaka ehansi ka yena hikuva va hi pfuna va tlhela va hi vekela xikombiso lexinene.

Mpfuxeto

• I mani nhloko ya vandlha?

• Vakulu va ri pfuna njhani vandlha?

• I yini leswi lava gandzelaka Yehovha va faneleke va swi endla?

KUMA LESWI ENGETELEKEKE

Vona vumbhoni lebyi kombisaka leswaku Huvo leyi Fumaka ni vakulu va khathala hi Vakreste.

Ku Kondletela Vun’we Loko Ntirho Wu Yirisiwile (4:22)

Dyondza hi ntirho lowu valanguteri va muganga va wu endlaka.

Vutomi Bya Mulanguteri Wa Muganga (4:51)

Twana hi ta ntirho lowu vavasati va wu endlaka evandlheni.

“Xana Timbhoni Ta Yehovha Ta Va Tirhisa Vavasati Leswaku Va Dyondzisa?” (Xihondzo xo Rindza, September 1, 2012)

Twana ndlela leyi vakulu va waka va pfuka ha yona leswaku va tiyisa vamakwerhu.

“Vakulu Lava Nga Vakreste ‘I Vatirhi-kulorhi Leswaku Hi Tsaka’” (Xihondzo xo Rindza, January 15, 2013)