DYONDZO 24
Tintsumi I Swivumbiwa Swa Njhani Naswona Hi Wihi Ntirho Wa Tona?
Yehovha u lava hi tiva hi ndyangu wakwe wa le tilweni. Ndyangu wolowo wu katsa tintsumi, leti vuriwaka “vana va Xikwembu.” (Yobo 38:7) Bibele yi dyondzisa yini hi tintsumi? Ti tirhisana njhani ni vanhu? Xana hinkwato ka tona i xiphemu xa ndyangu wa Xikwembu?
1. Tintsumi i swivumbiwa swa njhani?
Yehovha u rhange a tumbuluxa tintsumi a nga si tumbuluxa misava. Ku fana na yena, tintsumi i mimoya leyi tshamaka etilweni. (Vaheveru 1:14) Ku ni tintsumi ta timiliyoni, kambe hinkwato ka tona ta hambana. (Nhlavutelo 5:11) Tintsumi ti ‘yingisa rito ra Yehovha ni ku endla leswi a ti lerisaka swona.’ (Pisalema 103:20) Khale ka khaleni, mikarhi yin’wana Yehovha a a rhuma tintsumi leswaku ti ya tivisa vanhu rungula rakwe, ti va pfuna ni ku va ponisa. Namuntlha tintsumi ti kongomisa Vakreste eka vanhu lava lavaka ku dyondza hi Xikwembu.
2. I mani Sathana ni madimona yakwe?
Ku ni tintsumi tin’wana leti hambukeke endleleni ya Yehovha. Ntsumi yo sungula ku endla sweswo yi “[vuriwa] Diyavulosi na Sathana, leyi hambukisaka misava hinkwayo.” (Nhlavutelo 12:9) Sathana a a lava ku fuma, kutani u hambukise vanhu vo sungula naswona hi ku famba ka nkarhi u kucetele ni tintsumi tin’wana leswaku ti hambuka. Tintsumi teto ti vuriwa madimona. Yehovha u ti hlongorile ti suka etilweni ti ta laha misaveni naswona ti ta lovisiwa.—Hlaya Nhlavutelo 12:9, 12.
3. Sathana ni madimona yakwe va hi hambukisa njhani?
Sathana ni madimona yakwe va tirhisa vudimona kumbe vungoma ku nga mukhuva wo biha wo vulavurisana ni mimoya leswaku va hambukisa vanhu vo tala. Hi xikombiso, vanhu van’wana va tirhisana ni vavhumbhi, vaprofeta, tin’anga ni vanhu lava hlahluvaka hi ku tirhisa tinyeleti. Van’wana va ya etin’angeni leswaku va ya tshunguriwa mavabyi. Vanhu va kanganyisiwa hi ku byeriwa leswaku va nga swi kota ku vulavula ni vafi. Kambe Yehovha u hi lemukisa a ku: “U nga tshuki u ya eka vangoma naswona u nga tshuki u vutisa vavhumbhi.” (Levhitika 19:31) Wa hi lemukisa leswaku a hi sirhelela eka Sathana ni madimona. I valala va Xikwembu naswona va lava ku hi vavisa.
ANAKANYISISA
Dyondza hi mitirho leyinene ya tintsumi, makhombo yo tinghenisa eka swa vungoma ni ndlela leyi hi nga tisirhelelaka ha yona eka Sathana ni madimona yakwe.
4. Tintsumi ti pfuna vanhu ku dyondza hi Yehovha
Tintsumi ta Xikwembu a ti chumayeli vanhu hi ku kongoma. Kambe ti nga ha kongomisa vagandzeri va Xikwembu leswaku va pfuna vanhu lava lavaka ku dyondza hi xona. Hlaya Nhlavutelo 14:6, 7, ivi mi bula hi swivutiso leswi:
Hikwalaho ka yini hi lava mpfuno wa tintsumi loko hi chumayela?
U titwa njhani ku tiva leswaku tintsumi ti nga ku kongomisa eka vanhu lava lavaka ku dyondza Bibele? Hikwalaho ka yini u vula tano?
5. Fambela ekule ni vungoma
Sathana ni madimona yakwe i valala va Yehovha. Na hina a va lavi no hi vona. Hlaya Luka 9:38-42, ivi mi bula hi xivutiso lexi:
Madimona ma va endla yini vanhu?
A hi swi lavi ku lawuriwa hi madimona. Hlaya Deteronoma 18:10-12, ivi mi bula hi swivutiso leswi:
Madimona ma endla yini leswaku ma hi kucetela ni ku ringeta ku vulavurisana na hina? I yini leswi vanhu va le ndhawini ya ka n’wina va swi endlaka leswi fambisanaka ni vungoma?
U vona swi ri swinene leswi Yehovha a nga laviki hi tinghenisa eka swa vungoma? Hikwalaho ka yini u vula tano?
Tlanga VHIDIYO, ivi mi bula hi swivutiso leswi landzelaka.
U vona onge xitshungulo lexi Palesa a a xi bohelele n’wana wakwe a xi ri ni khombo? Hikwalaho ka yini u vula tano?
Palesa a a fanele a endla yini leswaku madimona ma nga n’wi hlaseli?
Vakreste va ntiyiso va lwisana ni madimona. Hlaya Mitirho 19:19 na 1 Vakorinto 10:21, ivi mi bula hi xivutiso lexi:
Hikwalaho ka yini swi ri swa nkoka ku cukumeta nchumu wun’wana ni wun’wana lowu u nga na wona lowu fambisanaka ni madimona?
6. Hlula Sathana ni madimona yakwe
Madimona ma fumiwa hi Sathana. Kambe tintsumi to tshembeka ti kongomisiwa hi ntsumi leyikulu Mikayele, ku nga vito rin’wana ra Yesu. Mikayele u ni matimba ku fikela kwihi? Hlaya Nhlavutelo 12:7-9, ivi mi bula hi swivutiso leswi:
Eka Mikayele ni tintsumi takwe na Sathana ni madimona yakwe, i mani la nga ni matimba lamakulu?
U vona onge valandzeri va Yesu va fanele va chava Sathana ni madimona yakwe?
U nga n’wi hlula Sathana ni madimona yakwe. Hlaya Yakobo 4:7, ivi mi bula hi xivutiso lexi:
U nga tisirhelela njhani eka Sathana ni madimona yakwe?
VAN’WANA VA RI: “A swi bihanga ku tlanga mitlangu kumbe ku hlalela tifilimi ta vudimona. A ni wo tihungasa.”
Hikwalaho ka yini swi ri ni khombo ku va ni langutelo ro tano?
NKATSAKANYO
Tintsumi to tshembeka ta hi pfuna. Sathana ni madimona yakwe i valala va Yehovha naswona va tirhisa vudimona leswaku va hambukisa vanhu.
Mpfuxeto
Tintsumi ta Yehovha ti va pfuna njhani vanhu leswaku va dyondza hi yena?
I mani Sathana ni madimona yakwe?
Hikwalaho ka yini u nga lavi ku tinghenisa eka swa vudimona?
KUMA LESWI ENGETELEKEKE
Twana vumbhoni lebyi kombisaka leswaku Yesu i Mikayele ntsumi leyikulu.
“I Mani Mikayele Ntsumi Leyikulu?” (Nhlokomhaka leyi kumekaka eka website)
Xiya vumbhoni lebyi kombisaka leswaku Diyavulosi i munhu wa xiviri.
“Xana Diyavulosi I Wa Xiviri?” (Nhlokomhaka leyi kumekaka eka website)
Xiya ndlela leyi wansati un’wana a tshikeke ku tirhisana ni madimona ha yona.
“U Kume Xikongomelo eVuton’wini” (Xihondzo xo Rindza, July 1, 1993)
Twana ndlela leyi Sathana a tirhisaka vungoma ha yona ku kanganyisa vanhu.