DYONDZO 29

Ku Endleka Yini Loko Hi Fa?

Nkandziyiso Lowu Printiweke

Xana u tshame u loveriwa hi munhu loyi u n’wi rhandzaka? Hi nkarhi wolowo wo tika, u nga ha tivutisa u ku: ‘Ku endleka yini loko hi fa? Xana hi ta tlhela hi va vona vanghana ni maxaka ya hina lama feke?’ Eka dyondzo leyi ni leyi landzelaka, hi ta kambisisa tinhlamulo leti chavelelaka leti kumekaka eBibeleni.

1. Ku endleka yini loko hi fa?

Yesu u fanise ku fa ni vurhongo lebyikulu. Munhu la biweke hi vurhongo byo tano a nga swi twi leswi endlekaka laha a nga kona. Xana rifu ri fana njhani ni vurhongo? Loko munhu a fa, a nga ha twi ku vava naswona a nga xaniseki. Bibele yi ri: “Lava feke a va tivi nchumu.”—Hlaya Eklesiasta 9:5.

2. Swi hi pfuna njhani ku tiva ntiyiso hi rifu?

Vanhu vo tala va chava ku fa, va tlhela va chava ni vafi! Kambe swi nga ku chavelela ku tiva leswi Bibele yi swi vulaka hi rifu. Yesu u te: “Ntiyiso wu ta mi tshunxa.” (Yohane 8:32) Ku hambana ni leswi dyondzisiwaka hi vukhongeri byin’wana, Bibele a yi dyondzisi swona leswaku munhu u ni moya lowu yaka emahlweni wu hanya loko a fa. Hikwalaho ka sweswo, a hi xaniseki loko hi file. Leswi vafi va nga tiviki nchumu, a va nge hi vavisi. Kutani a hi fanelanga hi va phahla kumbe hi va gandzela hambi ku ri ku va khongelela.

Van’wana va vula leswaku va swi kota ku vulavurisana ni lava feke. Kambe sweswo a swi koteki. Hilaha hi nga dyondza hakona, vafi “a va tivi nchumu.” Vanhu lava ehleketaka leswaku va vulavurisana ni vanhu lava feke, entiyisweni va va va vulavularisana ni madimona lama tiendlaka vanhu volavo. Kutani ku tiva ntiyiso hi rifu swa hi sirhelela eka madimona. Yehovha wa hi lemukisa hi ntlhamu wa ku ringeta ku vulavurisana ni vafi hikuva wa swi tiva leswaku loko hi tihlanganisa ni madimona ma ta hi vavisa.—Hlaya Deteronoma 18:10-12.

ANAKANYISISA

Twana swo tala leswi Bibele yi swi dyondzisaka hi rifu, u tlhela u kambisisa leswaku u nga endla yini ku u tshemba leswaku Xikwembu lexi nga ni rirhandzu a xi va xanisi vafi.

Wanuna ni vana vakwe vambirhi va tshamile va ri enkosini wa nsati wakwe. Maxaka ni vanghana va ri karhi va va chavelela ni ku va seketela.

3. Tiva ntiyiso hi lava feke

Emisaveni hinkwayo, vanhu va tshemba swilo swo hambanahambana hi leswi endlekaka loko hi file. Kambe swo tala swa swona i mavunwa.

Vanhu vo tala va le ndhawini ya ka n’wina va tshemba leswaku ku endleka yini hi lava feke?

Leswaku u twa leswi Bibele yi swi dyondzisaka, tlanga VHIDIYO.

VHIDIYO: Hi Xihi Xiyimo Xa Vafi?—Xiphemu (1:19)

Xifaniso lexi tekiweke eka vhidiyo leyi nge ‘Hi Xihi Xiyimo Xa Vafi?’ Xifaniso: 1. Ntsumbu wu ri exibedlhele. 2. Wanuna a etlele exitimeleni.

Hlaya Eklesiasta 3:20, ivi mi bula hi swivutiso leswi:

Hi ku ya hi tsalwa leri, ku endleka yini loko munhu a fa?
Xana ku ni nchumu lowu salaka wu hanya loko munhu a fa?

Bibele yi hi byela hi rifu ra Lazaro, loyi a a ri munghana lonkulu wa Yesu. Loko u ri karhi u hlaya Yohane 11:11-14, xiya leswi Yesu a swi vuleke hi leswi endlekeke eka Lazaro. Endzhaku mi bula hi swivutiso leswi:

Yesu u fanise rifu na yini?
Ku va Yesu a fanise rifu ni ku etlela swi hi byela yini hi lava feke?
U titwa njhani hi ndlela leyi Bibele yi ri hlamuselaka ha yona rifu?

4. Ku tiva ntiyiso hi rifu swa hi pfuna

Ku tiva leswi endlekaka hi lava feke swi endla hi nga va chavi vafi. Hlaya Eklesiasta 9:10, ivi mi bula hi xivutiso lexi:

Xana vafi va nga hi vavisa?

Ntiyiso wa le Bibeleni wa hi pfuna leswaku hi nga ma tshembi mavunwa ya leswaku lava feke va lava ku phahliwa kumbe ku gandzeriwa. Hlaya Esaya 8:19 na Nhlavutelo 4:11, ivi mi bula hi xivutiso lexi:

U ehleketa leswaku Yehovha u titwa njhani hi munhu loyi a gandzelaka mufi ni ku tlhela a kombela mpfuno eka yena?

Xifaniso: Mikhuva leyi vanhu va yi endlaka ku xixima vafi. 1. Wanuna a khinsamile esirheni a ri karhi a khongela ni ku endla gandzelo hi swakudya. 2. Vavanuna va ri karhi va cina macomani. 3. Ntlawa wa vanhu wu mbale timask ta swikeletoni wu tlhela wu khoma swikeletoni leswikulu hi Siku ra Vafi. — Ku tiva ntiyiso hi rifu swa hi pfuna leswaku hi nga endli mikhuva leyi nyenyetsaka Yehovha

5. Swa hi chavelela ku tiva ntiyiso hi rifu

Vanhu vo tala va dyondzisiwe leswaku loko va fa, va ta xanisiwa hikwalaho ka swidyoho leswi va swi endleke. Kambe swa hi chavelela ku tiva leswaku a ku na munhu la xanisekaka loko a file, hambiloko a endle swilo swo biha ngopfu. Hlaya Varhoma 6:7, ivi mi bula hi xivutiso lexi:

Loko hi hlaya eBibeleni, hi dyondza leswaku rifu ri tshunxa munhu eka xidyoho, kutani u vona onge munhu la feke u le ku xanisekeni hikwalaho ka swidyoho leswi a nga tshama a swi endla?

Loko hi ya hi tiva Yehovha, hi ta pfumela leswaku a nge pfuki a xanise lava feke. Hlaya Deteronoma 32:4 na 1 Yohane 4:8, ivi mi bula hi swivutiso leswi:

U vona onge Xikwembu lexi hlamuseriwaka eka matsalwa lawa, xi nga pfuka xi xanise lava feke?
Xana u vona onge ku tiva leswi endlekaka hi lava feke swa hi chavelela? Hikwalaho ka yini u vula tano?

VAN’WANA VA RI: “Ndzi chava ku xaniseka loko ndzi fa.”