DYONDZO 37
Bibele Yi Ri Yini Hi Ntirho Ni Mali?
Xana u tshame u titwa u vilerisiwa hi ntirho kumbe mali? Swi nga hi tikela ku kuma mali ya ku tihanyisa ni ku gandzela Yehovha hilaha a lavaka hakona. Bibele yi hi nyika switsundzuxo leswi nga hi pfunaka emhakeni leyi.
1. Bibele yi ri yini hi ntirho?
Xikwembu xi lava leswaku hi tiphina hi ntirho wa hina. Bibele yi vula leswaku “ku hava nchumu wo antswa eka munhu ku tlula ku . . . tiphina hi ntirho wakwe wa matimba.” (Eklesiasta 2:24) Yehovha u tirha hi matimba. Loko hi n’wi tekelela hi ku tirha hi matimba, ha n’wi tsakisa hi tlhela hi eneriseka hi leswi hi swi endlaka.
Ntirho i wa nkoka. Kambe a hi fanelanga hi wu pfumelela wu va wa nkoka ngopfu ku tlula ku gandzela Yehovha. (Yohane 6:27) Yehovha u hi tshembisa leswaku loko hi rhangisa ku n’wi gandzela evuton’wini bya hina, u ta hi nyika leswi lavekaka leswaku hi kota ku hanya.
2. Hi fanele hi yi teka njhani mali?
Hambileswi Bibele yi vulaka leswaku mali i “xisirhelelo” kambe yi tlhela yi hi lemukisa leswaku mali yi ri yoxe a yi nge hi endli hi tsaka. (Eklesiasta 7:12) Hikwalaho, hi khutaziwa leswaku hi nga rhandzi mali kambe hi ‘eneriseka hi swilo leswi hi nga na swona.’ (Hlaya Vaheveru 13:5.) Loko hi eneriseka hi leswi hi nga na swona, swa hi pfuna leswaku hi nga tshameli ku karhateka hi ku lava ku kuma leswi engetelekeke. Hi papalata ni swikweleti leswi nga bohiki. (Swivuriso 22:7) Nakambe hi ta papalata makhombo ya ku gembula ni ku phasiwa hi tindlela leti nga twisisekiki ta ku hatla u fuma.
3. Hi nga swi kombisa njhani leswaku ha hanana hi mali ya hina?
Yehovha i Xikwembu lexi hananaka naswona ha n’wi tekelela loko hi hanana ni ku “tiyimisela ku avelana ni van’wana.” (1 Timotiya 6:18) Hi nga kombisa leswaku ha hanana hi mali ya hina hi ku nyikela evandlheni ni ku pfuna lava nga evuswetini, ngopfungopfu lava hi gandzelaka na vona. Xa nkoka eka Yehovha a hi leswaku hi nyikela ku fikela kwihi kambe u languta xikongomelo xa hina xo nyikela. Loko hi nyika swi suka embilwini, hi ta tsaka hi tlhela hi tsakisa Yehovha.—Hlaya Mitirho 20:35.
ANAKANYISISA
Xiya vuyelo lebyi nga kona loko hi va ni langutelo lerinene hi ntirho ni ku eneriseka hi leswi hi nga na swona.
4. Xixima Yehovha hi ndlela leyi u tirhaka ha yona
Vunghana bya hina na Yehovha byi fanele byi khumba ni ndlela leyi hi wu tekaka ha yona ntirho. Tlanga VHIDIYO, ivi mi bula hi swivutiso leswi landzelaka.
Eka vhidiyo leyi, i yini lexi ku tsakiseke hi ndlela leyi Jason a a endla swilo ha yona ni ndlela leyi a a tikhoma ha yona entirhweni?
U endle yini leswaku a ringanisela loko swi ta etimhakeni ta ntirho ni ku gandzela Xikwembu?
Hlaya Vakolosa 3:23, 24, ivi mi bula hi xivutiso lexi:
Hikwalaho ka yini ndlela leyi hi tekaka ntirho ha yona yi ri ya nkoka?
Ntirho i wa nkoka. Kambe a hi fanelanga hi wu teka wu ri wa nkoka ngopfu ku tlula ku gandzela Yehovha
5. Ha vuyeriwa loko hi eneriseka hi leswi hi nga na swona
Vanhu vo tala va tikarhatela ku kuma mali yo tala hilaha va nga kotaka hakona. Kambe Bibele yi hi khutaza ku endla leswi hambaneke. Hlaya 1 Timotiya 6:6-8, ivi mi bula hi xivutiso lexi:
Bibele yi hi khutaza ku endla yini?
Hi nga tsaka hambiloko hi ri ni swilo switsongo. Tlanga VHIDIYO, ivi mi bula hi xivutiso lexi landzelaka.
I yini lexi endlaka leswaku mindyangu leyi yi tsaka hambileswi yi nga riki na mali yo tala?
Ku vuriwa yini loko hi ri ni mali yo tala kambe ha ha lava yin’wana? Yesu u nyikele xikombiso lexi hlamuselaka khombo ra sweswo. Hlaya Luka 12:15-21, ivi mi bula hi xivutiso lexi:
U dyondze yini eka xikombiso xa Yesu?—Vona ndzimana 15.
Hlaya kutani u ringanisa Swivuriso 10:22 na 1 Timotiya 6:10. Endzhaku mi bula hi swivutiso leswi:
U ehleketa leswaku i yini xa nkoka swinene? I ku va munghana wa Yehovha kumbe i ku va ni mali yo tala? Hikwalaho ka yini u vula tano?
Hi swihi swiphiqo leswi munhu a vaka na swona loko a hlongorisa mali?
6. Yehovha u ta hi hlayisa
Swiphiqo swa ntirho ni swa timali swi nga ringa ripfumelo ra hina eka Yehovha. Tlanga VHIDIYO leswaku u vona leswi hi nga swi endlaka loko hi ri ni swiphiqo leswi, ivi mi bula hi swivutiso leswi landzelaka.
Eka vhidiyo leyi, hi swihi swiphiqo leswi makwerhu a a ri na swona?
U endle yini leswaku a langutana ni swiphiqo sweswo hi ndlela leyinene?
Hlaya Matewu 6:25-34, ivi mi bula hi xivutiso lexi:
Yehovha u va tshembisa yini lava rhangisaka ku gandzela yena?
VAN’WANA VA RI: “Ndzi fanele ndzi tirha hi matimba leswaku ndzi ta wundla ndyangu wa mina. A ndzi nge swi koti ku ya etinhlengeletanweni ta vandlha vhiki ni vhiki.”
I tsalwa rihi leri ku tiyisekisaka leswaku loko u rhangisa Yehovha evuton’wini bya wena, u va u endla xiboho lexinene?
NKATSAKANYO
Ntirho wa ku tihanyisa ni mali i swa nkoka kambe a swi fanelanga swi hi kavanyeta ku gandzela Yehovha.
Mpfuxeto
I yini leswi nga ta ku pfuna leswaku u ringanisela loko swi ta eka ntirho ni ku gandzela Xikwembu?
U vuyeriwa njhani loko u eneriseka hi leswi u nga na swona?
U nga swi kombisa njhani leswaku wa xi tshemba xitshembiso xa Yehovha xa leswaku u ta khathalela vanhu vakwe?
KUMA LESWI ENGETELEKEKE
Twana loko ku ri ku Bibele yi dyondzisa leswaku mali yi bihile.
“Xana Mali I Sathana?” (Nhlokomhaka leyi kumekaka eka website)
Twana leswaku i ku hanana ka muxaka muni loku tsakisaka Xikwembu.
“Bibele Yi Ri Yini Hi Ku Hanana?” (Nhlokomhaka leyi kumekaka eka website)
Xana swi ni khombo ku gembula?
Twana leswi pfuneke wanuna loyi ku tshika ku gembula ni ku yiva.
“A Ndzi Wu Rhandza Ngopfu Mujaho Wa Tihanci” (Xihondzo xo Rindza, November 1, 2011)