DYONDZO 57

U Fanele U Endla Yini Loko U Endle Xidyoho Lexikulu?

Nkandziyiso Lowu Printiweke

Hambileswi u rhandzaka Yehovha swinene naswona u ringetaka hi matimba ku papalata ku endla leswi nga ta n’wi twisa ku vava, mikarhi yin’wana u ta pfa u endla swihoxo. Hambiswiritano, ku ni swihoxo leswikulu. (1 Vakorinto 6:9, 10) Loko u endle xidyoho lexikulu, tsundzuka leswaku Yehovha wa ha ku rhandza; u tiyimiserile ku ku rivalela ni ku ku pfuna.

1. Hi fanele hi endla yini leswaku Yehovha a hi rivalela?

Lava rhandzaka Yehovha va twa ku vava swinene loko va xiya leswaku va endle xidyoho lexikulu. Kambe swa va chavelela leswi Yehovha a swi tshembiseke vanhu vakwe loko a ku: “Hambiloko swidyoho swa n’wina swo va swo tshwuka, swi ta basisiwa swi fana ni gamboko.” (Esaya 1:18) Loko hi hundzuka, Yehovha u ta hi rivalela. Hi hundzuka njhani? Hikuva hi tisola swi huma embilwini, kutani hi tshika ku endla swo biha ivi hi kombela Yehovha leswaku a hi rivalela. Endzhaku ka sweswo, hi tikarhatela ku tshika ku ehleketa hi swilo swo biha kumbe mikhuva leyi endleke leswaku hi dyoha, kutani hi ringeta ku hanya hi milawu ya Yehovha.—Hlaya Esaya 55:6, 7.

2. Yehovha u va tirhisa njhani vakulu leswaku va hi pfuna loko hi dyohile?

Loko hi endle xidyoho lexikulu, Yehovha u hi byela leswaku hi “[vitana] vakulu va vandlha.” (Hlaya Yakobo 5:14, 15.) Vavanuna volavo lava vekiweke va rhandza Yehovha ni tinyimpfu ta yena. Va hi pfuna leswaku hi lulamisa vuxaka bya hina na Yehovha.—Vagalatiya 6:1.

Vakulu va hi pfuna njhani loko hi endle xidyoho? Vakulu vambirhi kumbe vanharhu va ta hi lulamisa va tirhisa ndzayo ya le Matsalweni. Va ta tlhela va hi nyika swiringanyeto ni switsundzuxo leswi nga ta hi pfuna ku papalata ku tlhela hi dyoha. Leswaku va sirhelela vandlha eka minkucetelo yo biha, vakulu va susa munhu loyi a endlaka swidyoho leswikulu naswona a nga hundzukiki.

ANAKANYISISA

Dyondza ku tlangela ndlela leyi Yehovha a hi pfunaka ha yona loko hi endle xidyoho lexikulu.

3. Ku vula swidyoho swa hina swi hi pfuna ku lulamisa vunghana bya hina na Yehovha

Xidyoho xin’wana ni xin’wana lexi hi xi endlaka xi twisa Yehovha ku vava, hikwalaho swa fanela leswaku hi n’wi byela swidyoho swa hina. Hlaya Pisalema 32:1-5, ivi mi bula hi xivutiso lexi:

Hikwalaho ka yini swi ri swinene ku byela Yehovha swidyoho swa hina ematshan’weni yo n’wi tumbetela swona?

Endzhaku ka loko hi byele Yehovha swidyoho swa hina, hi ta titwa hi pepile loko hi lava mpfuno eka vakulu. Tlanga VHIDIYO, ivi mi bula hi xivutiso lexi landzelaka.

VHIDIYO: “Loyi Yehovha A N’wi Rhandzaka Wa N’wi Tshinya” (3:01)

Eka vhidiyo leyi, vakulu va n’wi pfune njhani Canon leswaku a tlhelela eka Yehovha?

Hi fanele hi byela vakulu swilo hinkwaswo hi nga va hembeli hikuva va lava ku hi pfuna. Hlaya Yakobo 5:16, ivi mi bula hi xivutiso lexi:

Hikwalaho ka yini swi va olovela vakulu ku hi pfuna loko hi nga va hembeli?

Xifaniso: 1. Makwerhu la heleke matimba a tikhome nhloko. 2. A khongela eka Yehovha. 3. A fonela nkulu. 4. A hlangana ni vakulu vanharhu. 5. Sweswi u tsakile hileswi a nga ni ripfalo leri baseke. — Vula xidyoho xa wena, byela vakulu ntiyiso, u tlhela u amukela mpfuno wa Yehovha wa rirhandzu

4. Yehovha u va komba tintswalo vadyohi

Loko munhu loyi a endleke xidyoho lexikulu a ala ku hanya hi milawu ya Yehovha, a nge yi emahlweni a va xiphemu xa vandlha. Wa susiwa evandlheni naswona a hi tihlanganisi na yena kumbe ku n’wi vulavurisa. Hlaya 1 Vakorinto 5:6, 11 ivi mi bula hi xivutiso lexi:

Ku fana ni leswi comela yi kukumukisaka fulawuri ya xinkwa, xana vamakwerhu va khumbeka njhani loko mudyohi loyi a nga hundzukiki a tama a tihlanganisa na vona?

Vakulu va tekelela tintswalo ta Yehovha hi ku pfuna vadyohi lava susiweke evandlheni. Vanhu vo tala va tlhelele evandlheni hi ku famba ka nkarhi hikuva ndlela leyi va tshinyiweke ha yona hambileswi a yi vava, yi endle va swi xiya leswaku leswi va swi endleke swi hoxile.—Pisalema 141:⁠5

Xana ndlela leyi Yehovha a khomaka vadyohi hayona yi swi kombisa njhani leswaku wa anakanyela, u ni tintswalo naswona u ni rirhandzu?

5. Yehovha wa hi rivalela loko hi hundzuka

Yesu u tirhise xikombiso lexi hi pfunaka ku twisisa ndlela leyi Yehovha a titwaka ha yona loko munhu a hundzuka. Hlaya Luka 15:1-7, ivi mi bula hi xivutiso lexi:

Tsalwa leri ri ku dyondzisa yini hi Yehovha?

Hlaya Ezekiyele 33:11, ivi mi bula hi xivutiso lexi:

Hi swihi swilo leswi munhu a faneleke a swi endla ku kombisa leswaku u hundzukile?

Murisi a bandhicha nyimpfu leyi vavisekeke. — Yehovha u khathala swinene hi tinyimpfu takwe ku fana ni murisi

VAN’WANA VA RI: “Ndza chava ku byela vakulu xidyoho xa mina hikuva va ta ndzi susa.”

U nga n’wi hlamula njhani munhu loyi a titwaka hi ndlela yoleyo?

NKATSAKANYO

Loko hi endle xidyoho lexikulu kambe hi tisola swi huma embilwini naswona hi tiyimisele ku tshika ku endla swo biha, Yehovha u ta hi rivalela.

Mpfuxeto

Hikwalaho ka yini swi hi pfuna ku byela Yehovha swidyoho swa hina?
Hi fanele hi endla yini leswaku hi rivaleriwa swidyoho?
Loko hi endle xidyoho lexikulu, hikwalaho ka yini hi fanele hi kombela vakulu leswaku va hi pfuna?

Tsala siku leri dyondzo yi hetiweke ha rona

Tiyimisele ku endla leswi

Tolovelana ni vakulu va le vandlheni ra n’wina.

Swin’wana leswi u nga swi endlaka:

KUMA LESWI ENGETELEKEKE

Vona ndlela leyi Yehovha a kombiseke wanuna un’wana tintswalo leti hlamuseriweke eka Esaya 1:18.

U Nga Kanakani Tintswalo Ta Yehovha (5:02)

Vakulu va ringeta njhani ku pfuna lava endleke xidyoho lexikulu?

“Ndlela Leyi Vakulu Va Kombisaka Vadyohi Rirhandzu Ni Tintswalo Hayona” (Xihondzo xo Rindza, August 2024)

Xiya ndlela leyi rirhandzu ni tintswalo swi kombisiwaka hayona eka mudyohi loyi a nga hundzukiki.

“Ku Pfuna Lava Susiweke eVandlheni” (Xihondzo xo Rindza, August 2024)

Eka mhaka ya vutomi leyi nge, “A Ndzi Lava Ku Tlhelela Eka Yehovha,” twana lexi endleke wanuna un’wana loyi a a hambukile entiyisweni a swi xiyeke ha yona leswaku Yehovha u tlhele a n’wi koka.

“Bibele Yi Hundzula Vutomi Bya Vanhu” (Xihondzo xo Rindza, April 1, 2012)