Ha Yini Swi Ri Swa Nkoka Ku ‘Tshama Hi Rindzile’?

“XI TA va xihi xikombiso xa vukona bya wena ni xa makumu ya mafambiselo ya swilo?” (Mat. 24:3) Loko Yesu a hlamula xivutiso xexo, u byele vadyondzisiwa vakwe hi xikombiso lexi twisisekaka hi ku olova, lexi nga ni vuxokoxoko byo tala ni lexi vonakaka kahle hilaha xi tsariweke hakona eka Matewu ndzima 24, Marka ndzima 13 na Luka ndzima 21. U tlhele a ku: “Tshamani mi rindzile.”—Mat. 24:42.

Loko ku ri leswaku xikombiso xexo a xi ta vonaka hi ku olova, ha yini a tlhele a va nyika xitsundzuxo xa leswaku va tshama va rindzile? Ehleketa hi swivangelo swimbirhi leswi nga ha vaka swi n’wi susumetele ku endla tano. Xo sungula, swikavanyeto swi nga ha endla leswaku Mukreste a honisa xikombiso xexo, xisweswo a lahlekeriwa hi vuxaka byakwe ni Xikwembu ni ku tshika ku tshama a rindzile. Xa vumbirhi, Mukreste a nga ha tiva vuxokoxoko bya xikombiso xexo kambe a vona onge a nga khumbeki nikatsongo hileswi xi nga siki endlekaka endhawini leyi nga ekusuhi ni laha a tshamaka kona. Kutani a nga ha tibyela leswaku “nhlomulo lowukulu,” lowu nga xiendlakalo xo hetelela xa vuprofeta bya Yesu, wa ha ri ekule swinene, xisweswo a swi bohi leswaku a ‘tshama a rindzile.’—Mat. 24:21.

‘A Va Lemukanga Nchumu’

Yesu u tsundzuxe valandzeri vakwe malunghana ni vanhu lava hanyeke enkarhini wa Nowa. Ku chumayela ka Nowa, ku akiwa ka ngalava leyikulu ni madzolonga ya le nkarhini wolowo i swiendlakalo leswi vanhu a va fanele va swi lemukile. Nilokoswiritano, vo tala va vona ‘a va lemukanga nchumu.’ (Mat. 24:37-39) Ninamuntlha vanhu vo tala a va swi lemuki swilemukiso. Hi xikombiso, mimfungho ya le magondzweni yi byela vachayeri hi ku kongoma rivilo leri va faneleke va chayela ha rona, kambe vo tala a va yi tekeli enhlokweni. Valawuri hakanyingi va boheka ku endla swihunguta-rivilo eswitarateni swa le madorobeni leswaku vachayeri va ta hunguta rivilo. Hilaha ku fanaka, swi nga ha endleka Mukreste a xi tiva xikombiso xa masiku yo hetelela kambe a endla mintirho leyi nga ta n’wi kavanyeta. Arielle, nhwanyana un’wana wa le Vupela-dyambu bya Afrika, u humeleriwe hi mhaka leyi fanaka.

Arielle a a rhandza ku hlalela ntlango wa vaxisati lowu vuriwaka handball. Loko xikolo xakwe xi hlele xipano lexi a xi ta tlanga ntlango wolowo, ku navela kakwe ko tlangela xipano xexo ku n’wi endle a honisa ndlela leyi vuxaka byakwe na Yehovha a byi ta va ekhombyeni ha yona. U ve n’watipala wa xipano xexo. Kutani ku humelele yini? U ri: “Van’wana va vatlangi-kulorhi a va ri ni majaha lawa a ma dzaha ma tlhela ma tirhisa swidzidziharisi. A va ndzi hlekula hileswi a ndzi nga fani na vona, kambe a ndzi tibyela leswaku ndzi nga swi kota ku tiyiselela xiyimo xexo. Ntlango lowu wu sungule ku onha vuxaka bya mina na Yehovha ndzi nga swi langutelanga. Wu sungule ku ndzi nghena engatini. Loko ndzi ri eminhlanganweni ya Vukreste, hakanyingi miehleketo ya mina a yi nga vi kona eHolweni ya Mfumo kambe a yi va erivaleni ra mintlango ya handball. Ni timfanelo ta mina ta Vukreste ti cincile. A ndzi nga ha tlangi hileswi a ndzi wu rhandza kambe hileswi se a ndzi hisekela ku hlula. A ndzi endla vutiolori hi ku tiyimisela leswaku ndzi enerisa moya wo phikizana lowu se a wu ndzi nghenile. Ndzi sungule ku tshikileleka naswona ndzi kale ndzi honisa vanghana va mina hikwalaho ka handball.

“Swilo swi nyanye ngopfu loko xipano lexi a hi tlanga na xona xi nyikiwe phenalithi. A ndzi fanele ndzi yi siva. Handle ko swi xiya ndzi tikume ndzi khongele eka Yehovha leswaku a ndzi pfuna ndzi yi siva! Xiendlakalo lexi xi endle ndzi xiya ndlela leyi vuxaka bya mina na Yehovha a byi tsane ha yona. Ndzi byi tiyise njhani?

“Ndzi tshame ndzi hlalela DVD ya hina leyi nge Young People Ask—What Will I Do With My Life?a Ndzi endle xiboho xo tlhela ndzi yi hlalela naswona se a ndzi ta yi tekela enhlokweni. Phela a ndzi ri exiyin’weni lexi fanaka ni xa André, ku nga jaha leri ku vulavuriwaka ha rona eka drama yoleyo. Ngopfu-ngopfu ndzi xi tekele enhlokweni xitsundzuxo lexi nkulu un’wana a xi byeleke André xa leswaku a hlaya a tlhela a anakanyisisa hi Vafilipiya 3:8. Na mina ndzi endle tano naswona ndzi tshike ku tlangela xipano xexo.

“Sweswo swi cince vutomi bya mina. Moya wo phikizana lowu a ndzi ri na wona wu nyamalarile swin’we ni ntshikilelo lowu a wu vangiwa hi wona. Ndzi sungule ku tsaka naswona ndzi tshinelelane swinene ni vanghana va mina lava nga Vakreste. Mintirho ya Vukreste yi sungule ku va ya nkoka eka mina. A ndzi rhiya ndleve eminhlanganweni naswona a yi ndzi tsakisa. Ndzi tlhele ndzi antswisa ntirho wa mina wo chumayela. Nkarhi na nkarhi ndzi nghenela vuphayona bya nkarhinyana.”

Loko xikavanyeto xo karhi xi ku kucetela ku honisa xikombiso lexi Yesu a vulavuleke ha xona, teka goza hilaha Arielle a endleke hakona. U nga ha ringeta swiringanyeto leswi landzelaka. Kambisisa buku leyi nge Watch Tower Publications Index, leyi vitaniwaka mepe lowu kongomisaka eka rifuwo leri fihliweke. U ta kuma rungula leri vulavulaka hi ndzayo leyi pfunaka ni swiviko swa vanhu swa ndlela leyi va langutaneke ha yona ni miringo. Lunghiselela kahle u tlhela u tsala tinhla loko u ri eminhlanganweni ya Vukreste leswaku u vuyeriwa swinene. Van’wana va kume leswaku swa vuyerisa ku tshama ekusuhi ni xiteji. Loko ku ri ni nkulumo leyi lavaka leswaku vayingiseri va nyikela tinhlamulo, ringeta ku hlamula to ho suka. Ku engetela kwalaho, tshama u rindzile hi tlhelo ra moya hi ku pimanisa swiendlakalo swa sweswinyana swa le ka mahungu ni swiphemu swa xikombiso swin’we ni swilo swin’wana leswi kombaka leswaku hi hanya “emasikwini yo hetelela.”—2 Tim. 3:1-5; 2 Pet. 3:3, 4; Nhlav. 6:1-8.

“Tshamani Mi Lunghekile”

Xikombiso xa masiku yo hetelela xi humelela ematikweni hinkwawo, lama katsaka ‘misava hinkwayo leyi akiweke.’ (Mat. 24:7, 14) Vanhu va timiliyoni va tshama etindhawini leti hlaseriweke swinene hi mintungu, ku kayivela ka swakudya, ku tsekatseka ka misava ni swiendlakalo swin’wana leswi ku profetiweke ha swona. Kambe vanhu van’wana vo tala va tshama etindhawini leti rhuleke. Loko u nga si tshama u humeleriwa hi swin’wana swa swiphemu swa xikombiso, xana u fanele u tibyela leswaku nhlomulo lowukulu wa ha ri ekule swinene? Sweswo ku ta va xihoxo lexikulu.

Hi xikombiso, ehleketa hi vuprofeta bya Yesu lebyi vulavulaka hi “mintungu ni ku kayivela ka swakudya.” (Luka 21:11) Xo sungula, a nga vulanga leswaku swilo leswi a swi ta hlasela tindhawu hinkwato hi nkarhi wun’we kumbe hi ndlela leyi fanaka. Ematshan’weni ya sweswo, u vule leswaku a swi ta endleka “ku suka endhawini yin’wana ku ya eka yin’wanyana.” Kutani a hi nge languteli leswaku ku endleka swiendlakalo leswi fanaka kun’wana ni kun’wana hi nkarhi wun’we. Xa vumbirhi, endzhakunyana ko vulavula hi ku kayivela ka swakudya, Yesu u vule leswaku van’wana va valandzeri vakwe a va fanele va tivonela leswaku va nga dyi ngopfu. U te: “Tivoneleni leswaku timbilu ta n’wina ti nga tshuki ti tshikileriwa hi ku dya ngopfu ni ku nwa ngopfu.” (Luka 21:34) Xisweswo, Vakreste hinkwavo a va fanelanga va langutela ku vona xiphemu xin’wana ni xin’wana xa xikombiso. Ematshan’weni ya sweswo, Yesu u te: “Loko mi vona swilo leswi swi humelela, tivani leswaku mfumo wa Xikwembu wu kusuhi.” (Luka 21:31) Switirhisiwa swo vulavurisana swa manguva lawa swi hi pfuna ku vona swiphemu hinkwaswo swa xikombiso xexo, ku nga khathariseki leswaku hi swihi leswi humelelaka endhawini leyi hi tshamaka eka yona.

Nakambe tsundzuka leswaku Yehovha se u ri vekile “siku ra kona ni nkarhi wa kona” lowu nhlomulo lowukulu wu nga ta sungula ha wona. (Mat. 24:36) Siku leri a ri nge cinciwi hikwalaho ka ndlela leyi swiendlakalo swa le misaveni swi endlekaka ha yona.

Yesu u tsundzuxe Vakreste hinkwavo a ku: “Tshamani mi lunghekile.” (Mat. 24:44) Hi fanele hi lungheka minkarhi hinkwayo. I ntiyiso leswaku a hi nge swi koti ku heta siku hinkwaro hi ri eku endleni ka mintirho ya Vukreste siku ni siku. Handle ka sweswo, ku hava ni un’we wa hina loyi a swi tivaka leswaku hi ta va hi endla yini hi nkarhi lowu nhlomulo lowukulu wu nga ta sungula ha wona. Swi nga ha endleka van’wana va ta va va ri emasin’wini kumbe va ri eku endleni ka mintirho ya le kaya. (Mat. 24:40, 41) Kutani hi nga endla yini leswaku hi tshama hi lunghekile?

Emmanuel na Victorine ni vana va vona va tsevu va vanhwanyana va tshama etikweni rin’wana ra laha Afrika leri nga si humeleriwaka hi swiendlakalo hinkwaswo leswi nga xiphemu xa xikombiso. Kutani va endle xiboho xo bula hi Bibele siku ni siku leswaku swi va pfuna va tshama va lunghekile. Emmanuel u ri: “A swi tika ku kuma nkarhi lowu hinkwerhu a hi ta kota ku hlangana ha wona. Kutani hi hetelele hi hlawule nkarhi wa 6:00–6:30 nimixo. Endzhaku ko hlaya ndzimana ya siku, hi lunghiselela tindzimana ti nga ri tingani ta buku leyi hlayiwaka eka dyondzo ya vandlha hi vhiki rero.” Xana lunghiselelo leri ri va pfunile leswaku va tshama va xalamukile? Ina. Emmanuel i muhlanganisi wa huvo ya vakulu evandlheni. Victorine hakanyingi u teka vuphayona bya nkarhinyana naswona u pfune vanhu vo tala leswaku va amukela ntiyiso. Kasi vana va vona va vanhwanyana va endla nhluvuko lowunene hi tlhelo ra moya.

Yesu u hi tsundzuxe a ku: “Tshamani mi langutile, tshamani mi hitekile.” (Mar. 13:33) U nga pfumeleli swikavanyeto swi ku endla u nga xalamuki hi tlhelo ra moya. Ematshan’weni ya sweswo, yi tekele enhlokweni ndzayo leyinene leyi u yi kumaka eminkandziyisweni ya hina ni le minhlanganweni ya vandlha hilaha Arielle a endleke hakona. Ku fana ni ndyangu wa Emmanuel, ringeta ku endla nchumu wo karhi siku ni siku leswaku u tshama u lunghekile naswona u ‘tshama u rindzile.’

[Nhlamuselo ya le hansi]

[Xifaniso lexi nga eka tluka 4]

Ku bula hi Bibele siku ni siku swi pfuna Emmanuel ni ndyangu wakwe leswaku va ‘tshama va lunghekile’