TINHLAMULO TA SWIVUTISO SWA BIBELE

Xana swa koteka ku twisisa Bibele?

Bibele i Rito ra Xikwembu. Yi fana ni papila leri humaka eka tatana loyi a nga ni rirhandzu. (2 Timotiya 3:16) EBibeleni, Xikwembu xi hlamusela ndlela leyi hi nga xi tsakisaka ha yona, leswi endlaka xi pfumelela vubihi ni leswi xi nga ta swi endlela vanhu enkarhini lowu taka. Kambe vadyondzisi va vukhongeri va soholote tidyondzo ta Bibele; hikwalaho ka sweswo, vo tala va anakanya leswaku va nge pfuki va kote ku twisisa Bibele.—Mintirho 20:29, 30.

Yehovha Xikwembu u lava hi tiva ntiyiso malunghana na yena. Hikwalaho ka xivangelo xexo, u hi nyike buku leyi twisisekaka.—Hlaya 1 Timotiya 2:3, 4.

Xana u nga yi twisisa njhani Bibele?

Ku engetela eka ku hi nyika Bibele, Yehovha u hi pfuna ku yi twisisa. U rhume Yesu leswaku a ta hi dyondzisa. (Luka 4:16-21) Yesu u pfune vayingiseri vakwe ku twisisa Matsalwa, hi ku hlamusela ndzimana hi ndzimana.—Hlaya Luka 24:27, 32, 45.

Yesu u simeke vandlha ra Vukreste leswaku ri yisa emahlweni leswi a swi sunguleke. (Matewu 28:19, 20) Namuntlha, valandzeri va Yesu va ntiyiso va pfuna vanhu leswaku va twisisa leswi Bibele yi swi dyondzisaka hi Xikwembu. Loko u lava ku twisisa Bibele, Timbhoni ta Yehovha ti ta swi tsakela ku ku pfuna.—Hlaya Mintirho 8:30, 31.