Swivutiso Swa Vahlayi

Ha yini Timbhoni ta Yehovha ti kombisa muapostola Pawulo a ri ni mpandlha kumbe a ri ni misisi leyitsongo?

Entiyisweni, a ku na munhu loyi a swi tivaka kahle leswaku Pawulo a languteka njhani. Swifaniso leswi dirohiweke eka minkandziyiso ya hina ko va swifaniso ntsena naswona a swi sekeriwanga eka vumbhoni byo karhi lebyi tiyeke.

Hambiswiritano, ku ni swin’wana leswi hi swi xiyeke, leswi kombisaka ndlela leyi Pawulo a languteka ha yona. Hi xikombiso, Zion’s Watch Tower ya March 1, 1902, yi vule leswi: “Emhakeni ya ndlela leyi Pawulo a languteka ha yona: . . . Buku ya ‘Acts of Paul and Thecla,’ . . . leyi tsariweke hi va-150 A. D, yi hlamusela ndlela leyi Pawulo a languteka ha yona naswona swi nga ha endleka ku ri yona yi n’wi hlamuselaka kahle ku tlula tibuku tin’wana. Eka buku yoleyo, ku vuriwa leswaku a komile, a ri na mpandlha, a ri na marhengwe, a tiyerile, a ri ni tinxiyi to leha ni nhompfu yo leha.’”

Oxford Dictionary of the Christian Church (1997 edition) yi vula leswi hi buku yoleyo leyi tsariweke khale swinene: “Swa twisiseka ku pfumela leswaku rungula leri nga ebukwini yoleyo ri ni ntiyiso wo karhi.” Emalembeni lama hundzeke buku ya The Acts of Paul and Thecla a yi xiximiwa swinene, sweswo swi vonaka hi leswi ninamuntlha matsalwa ya yona hi Xigriki ya 80 lama tsariweke hi voko ma kumekaka ni hi tindzimi tin’wana. Kutani swifaniso leswi dirohiweke leswi nga eminkandziyisweni ya hina swa fambisana ni tibuku tin’wana leti hlamuselaka ndlela leyi Pawulo a languteka ha yona.

Hambiswiritano, hi fanele hi tsundzuka leswaku ku ni swin’wana swa nkoka swinene ku tlula ndlela leyi Pawulo a languteka ha yona. Ni hi nkarhi wa vutirheli byakwe, vaxopaxopi van’wana va vule leswaku “loko a ri kona hi xiviri u tsanile naswona mhaka yakwe ya soleka.” (2 Kor. 10:10) Kambe a hi fanelanga hi rivala leswaku u ve Mukreste hikwalaho ka leswi Yesu a humeleleke eka yena hi ndlela ya singita. Hi nga tlhela hi anakanya hi leswi Pawulo a swi hetisiseke tanihi “xibya lexi hlawuriweke eka [Kreste] lexi nga ta yisa vito ra [Yesu] eka matiko.” (Mint. 9:3-5, 15; 22:6-8) Nakambe anakanya hi ndlela leyi hi nga vuyeriwaka ha yona eka tibuku leti nga eBibeleni leti Yehovha a huhuteleke Pawulo ku ti tsala.

Pawulo a nga tinyungubyisi hi leswi a swi endleke loko a nga si va Mukreste naswona a nga hi hlamuselanga ndlela leyi a languteka ha yona. (Mint. 26:4, 5; Filp. 3:4-6) U te: “Hi mina lontsongo eka vaapostola, naswona a ndzi faneleki ku vuriwa muapostola.” (1 Kor. 15:9) Hi ku famba ka nkarhi u tsale a ku: “Mina, ndzi nga munhu lontsongo eka vakwetsimi hinkwavo, ndzi nyikiwe musa lowu wu nga faneriwiki, leswaku ndzi vula mahungu lamanene eka matiko hi ta rifuwo leri nga pimekiki ra Kreste.” (Efe. 3:8) Rungula rero i ra nkoka swinene ku tlula ku karhateka mayelana ni ndlela leyi Pawulo a languteka ha yona.