Swivutiso Swa Vahlayi

Bibele yi vula leswaku loko mhaka yi ta simekiwa yi tiya ku laveka timbhoni timbirhi. (Tinhl. 35:30; Det. 17:6; 19:15; Mat. 18:16; 1 Tim. 5:19) Kambe hi ku ya hi Nawu wa Muxe, loko wanuna o pfinya nhwana loyi a tshembisiweke “enhoveni” ivi nhwana yoloye a huwelela, nhwana yoloye a nga ta va na nandzu wa vuoswi kambe wanuna hi yena loyi a ta voniwa nandzu. Leswi a ku nga ri na timbhoni, hikwalaho ka yini nhwana a a nga ta voniwa nandzu kambe wanuna a voniwa nandzu?

Xikongomelo xa rungula leri nga eka Deteronoma 22:25-27, a ku nga ri ku kumisisa loko wanuna a ri ni nandzu hikuva sweswo a swi ri erivaleni. Nawu lowu a wu lava ku tiyisekisa loko wansati a nga ri na nandzu. Xiya mongo wa kona.

Tindzimana leti hundzeke, ti vulavula hi wanuna loyi a etleleke ni wansati loyi a vutiweke “emutini.” Wanuna yoloye a ri ni nandzu wa vuoswi hikuva wansati loyi a vutiweke a a langutiwa tanihi loyi a tekiweke. Wansati ke? “A nga huwelelanga emutini.” Loko a a huwelerile, van’wana a va ta va va swi twile kutani va ya n’wi pfuna. Kambe a nga huwelelanga. Hikwalaho, a hlanganyela eku endleni ka vuoswi kutani havumbirhi bya vona va voniwe nandzu.—Det. 22:23, 24.

Eka tindzimana leti landzelaka, Nawu wu vulavula hi xiyimo lexi hambaneke: “Kambe, loko wanuna a kume nhwanyana loyi a tshembisiweke a ri enhoveni, kutani wanuna a n’wi khoma a etlela na yena, wanuna u fanele a fa a ri yexe, nhwanyana yena u nga n’wi endli nchumu. Nhwanyana a nga na xidyoho lexi faneriwaka hi rifu, hikuva swi fana ni loko munhu a pfukela munhukulobye, kunene a n’wi dlaya hi vomu, a dlaya moyaxiviri, swi tano emhakeni leyi. Hikuva u n’wi kume a ri enhoveni. Nhwanyana la tshembisiweke u huwelerile kambe a ku nga ri na munhu wa ku n’wi ponisa.”—Det. 22:25-27.

Loko swi ri tano, wansati a a nga voniwi nandzu. Hikwalaho ka yini? A ku tshembiwa leswaku u “huwelerile kambe a ku nga ri na munhu wa ku n’wi ponisa.” Xisweswo, a nga ri eku endleni ka vuoswi. Hikwalaho, wanuna a voniwa nandzu wo pfinya ni wo endla vuoswi hikuva u khome wansati loyi a vutiweke “a etlela na yena.”

Hambileswi nawu lowu, a wu kambisisa ku vona loko wansati a nga ri na nandzu kambe rungula leri ri kombisa leswaku wanuna a ri ni nandzu wo pfinya ni wo endla vuoswi. Hi nga tiyiseka leswaku vaavanyisi a va ta ‘lavisisa’ mhaka yoleyo hi vukheta kutani va teka xiboho lexi fambisanaka ni nawu wa Xikwembu lowu vuriweke hi ku phindhaphindha.—Det. 13:14; 17:4; Eks. 20:14.