Bokisi Ra Swivutiso

◼ Ha yini vuxiyaxiya byi ri bya nkoka loko ku tirhisiwa riqingho ro yingisela minhlangano ha rona?

Mavandlha yo tala ma endle leswaku vamakwerhu lava nga swi kotiki ku va kona eminhlanganweni ya vandlha eHolweni ya Mfumo hikwalaho ka mavabyi kumbe swivangelo swin’wana leswi nga papalatekiki, va kota ku yingisela minhlangano va tshame ekaya hi ku tirhisa riqingho ro yingisela minhlangano ha rona. Leswi lunghiselelo leri ri tirhisiwaka ntsena hi vamakwerhu lava nga swi kotiki ku va kona eminhlanganweni ya vandlha, vuxiyaxiya ni ku hleleka i swa nkoka. Vakulu lava langutelaka lunghiselelo leri va fanele ku tshama va ri karhi va ri kambela naswona va tiyiseka leswaku ‘swilo hinkwaswo swi endliwa hi ku tenga ni hi ku hleleka.’—1 Kor. 14:40.

Vakulu va fanele va tsundzuka leswaku lunghiselelo leri i ra vahuweleri lava nga ni vuvabyi lebyi nga tshungulekiki, lava dyuhaleke ni lava hi swivangelo swo karhi va nga pfumeleriwiki ku huma emakaya ya vona. Muhuweleri loyi a vabyaka kumbe la vavisekeke kumbe xichudeni xa Bibele lexi endlaka nhluvuko naswona xi nga pfumeleriwiki ku huma ekaya, xi nga vuyeriwa eka lunghiselelo leri naswona xi nga hlayiwa loko ku hlayiwa vanhu lava nga kona eminhlanganweni. Laha ku nga riki na tinqingho leti eneleke leti nga fikelelaka vanhu lava nga swi kotiki ku ta eminhlanganweni, kumbexana ku nga ha tirhisiwa lunghiselelo rin’wana ro tanihi ku va rhekhodela minhlangano.

Ntsako lowu u wu kumaka loko u yingisela minhlangano u ri ekaya a wu nge fani ni lowu u wu kumaka loko u ri kona hi xiviri eminhlanganweni ya hina. Ku va kona eHolweni ya Mfumo swin’we ni vamakwerhu swi endla leswaku hi “khutazana” naswona leswi swi pfuna swichudeni leswintshwa leswaku swi vona nkoka wo va kona eminhlanganweni. Loko hi ri kona eminhlanganweni ya hina hi vuyeriwa ngopfu eka minkombiso, vakulu va swi kota ku hi pfuna naswona hi yi vona kahle ndlela leyi vamakwerhu va rhandzanaka ha yona. Endzhaku ka loko makwerhu un’wana wa xisati la dyuhaleke a angarhiwile loko a huma eHolweni ya Mfumo, a nga tikoti hi ku tsaka lerova a ku: “U nge swi voni swo fana ni leswi loko u yingisela minhlangano hi riqingho!”—Rhom. 1:11, 12.

Ku fana na Ana loyi “a a nga kali etempeleni,” namuntlha vo tala va vadyuhari va hina va tshama va ri kona eminhlanganweni ya Vukreste loko xiyimo xa vona xa rihanyo xi va pfumelela. (Luka 2:36, 37) Hambileswi loko swi tikile va tirhisaka riqingho ro yingisela minhlangano ha rona, a va ri teki tanihi nchumu lowu nga va sivelaka ku va kona eminhlanganweni eHolweni ya Mfumo. Leswaku hi tekelela xikombiso xa vona, onge hi nga ya emahlweni hi tikarhatela ku va kona eminhlanganweni ya hina leswaku hi ta gandzela Xikwembu xa hina lexikulu Yehovha.—Ps. 95:1-3, 6; 122:1.