“Fambisani Timagazini Ta Khale Kumbe Broxara Yihi Na Yihi Leyi Kokaka Rinoko Ra Vanhu”

Hi tin’hweti leti hi fambisaka buku leyi nge Leswi Bibele Yi Swi Dyondzisaka naswona hi endlaka matshalatshala yo sungula dyondzo eka riendzo ro sungula, hi khutaziwa ku “fambisa timagazini ta khale kumbe broxara yihi na yihi leyi kokaka rinoko ra vanhu,” loko n’wini wa muti se a ri na yona buku naswona a nga yi amukeli dyondzo. Ha yini?

Tibroxara ni timagazini ta khale ti vulavula hi timhaka to hambana-hambana leti fikeke hi nkarhi. Mhaka yin’wana leyi nga eka minkandziyiso yoleyo yi nga khumba mbilu ya n’wini wa muti. Hikokwalaho, loko u paka tibuku leti u nga ta ti fambisa ebegeni ya wena, katsa ni tibroxara to hlayanyana to hambana-hambana ni minkandziyiso ya khale. Loko u nga ri na tona timagazini ta khale, kumbexana u nga ha tikumela tona ekhawuntarini ya vandlha. Kutani loko n’wini wa muti se a ri na yona buku leyi nge Leswi Bibele Yi Swi Dyondzisaka naswona a nga pfumeli ku fambiseriwa dyondzo ya Bibele, u nga ha n’wi komba tin’wana ta timagazini kumbe tibroxara leti u nga na tona kutani u n’wi byela a titekela leyi a yi tsakelaka. Endzhaku ka sweswo, endla malunghiselelo yo tlhela u vuya leswaku u hlakulela ku tsakela. Kumbexana dyondzo ya Bibele yi nga hetelela yi sunguriwile hikwalaho ka sweswo.