Yanani Emahlweni Mi Khongelela Ku Amukeriwa Hi Xikwembu

Xikwembu xi nyike vanhu nyiko ya nkoka, ku nga ku vulavula na xona ni ku va va xi byela ndlela leyi va titwaka ha yona hi xikhongelo. Muprofeta Davhida u tshame a khongela a ku: “Oho Mutwi wa xikhongelo, vanhu hinkwavo va ta ta eka wena.” (Pisalema 65:2) Hi fanele hi khongela hi ndlela yihi leswaku Xikwembu xi yingisa swikhongelo swa hina xi tlhela xi hi katekisa?

TITSONGAHATE, U KHONGELA SWI HUMA EMBILWINI

Xikhongelo xi endla leswaku hi chulula timbilu ta hina emahlweni ka Xikwembu hi xi byela ndlela leyi hi titwaka ha yona. (Pisalema 62:8) Lowa Matimba Hinkwawo wa swi rhandza loko hi khongela swi huma embilwini.

VITANA XIKWEMBU HI VITO RA XONA

Hambileswi Xikwembu xi nga ni swithopo swo tala kambe xi ni vito rin’we ntsena. “Hi mina Yehovha. Rero i vito ra mina.” (Esaya 42:8) Vito leri nge Yehovha ri humelela mikarhi leyi tlulaka 7 000 eMatsalweni yo Kwetsima. Vaprofeta vo tala a va vitana Xikwembu hi vito ra xona. Abrahama u te: “Yehovha, ndza ku kombela, . . . ndzi pfumelele ndzi ya emahlweni ndzi vulavula [na wena].” (Genesa 18:30) Na hina hi fanele hi tirhisa vito ra Xikwembu, ku nga Yehovha loko hi khongela.

KHONGELA HI RIRIMI RA WENA

Xikwembu xa yi twisisa ndlela leyi hi titwaka ha yona ni leyi hi ehleketaka ha yona swi nga ri na mhaka leswaku hi vulavula ririmi rihi. Rito ra xona ra hi tiyisekisa ri ku: “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.”—Mitirho 10:34, 35.

Hambiswiritano, leswaku hi katekisiwa hi Xikwembu, hi fanele hi endla swo tala ku tlula ku khongela. Eka tinhlokomhaka leti landzelaka, hi ta bula hi leswi hi faneleke hi swi endla.