Swivutiso Swa Vahlayi
Xana mupisalema Davhida o hundzeleta hi ku tsala leswaku a a ta dzunisa vito ra Xikwembu “hilaha ku nga heriki” hilaha swi tsariweke hakona eka Pisalema 61:8?
Nikatsongo. Leswi Davhida a swi tsaleke eka ndzimana yoleyo a swi twala naswona a ku ri ntiyiso.
Xiya leswi a swi tsaleke eka ndzimana leyi ni tin’wana leti fanaka: “Ndzi ta yimbelela ndzi dzunisa vito ra wena hilaha ku nga heriki loko ndzi endla leswi ndzi swi tshembiseke siku ni siku.” “Ndza ku dzunisa hi mbilu ya mina hinkwayo, Yehovha Xikwembu xa mina, ndzi ta vangamisa vito ra wena hilaha ku nga heriki.” “Ndzi ta dzunisa vito ra wena hilaha ku nga heriki.”—Ps. 61:8; 86:12; 145:1, 2.
Davhida a a ngo hundzeleta ni ku ehleketa leswaku a nge fi. A a swi tiva leswi Yehovha a swi vuleke mayelana ni xidyoho leswaku a xi ta vanga rifu naswona a a pfumela leswaku yena i mudyohi. (Gen. 3:3, 17-19; Ps. 51:4, 5) A a swi tiva leswaku hambi ku ri vavanuna lava Xikwembu a xi va amukela vo fana na Abrahama, Isaka na Yakobo va file. Nakambe Davhida a a swi vona leswaku eku heteleleni a ta fa. (Ps. 37:25; 39:4) Kambe marito yakwe lama nga eka Pisalema 61:8 ma kombise ku navela ni ku tiyimisela kakwe ku dzunisa Xikwembu vutomi byakwe hinkwabyo.—2 Sam. 7:12.
Mikarhi yin’wana Davhida u tsale hi leswi humeleleke evuton’wini byakwe hilaha hi swi vonaka hakona eka marito yo rhanga ya Tipisalema 18, 51 na 52. Eka Pisalema 23 Davhida u hlamusele Yehovha tanihi murisi loyi a kongomisaka, a phyuphyisaka ni la sirhelelaka. Davhida a a ri murisi wo tano. Nakambe a a lava ku tirhela Xikwembu ‘vutomi byakwe hinkwabyo.’—Ps. 23:6.
Tsundzuka leswaku i Yehovha la huhuteleke Davhida ku tsala marito wolawo. Leswi a swi tsaleke a swi katsa ni vuprofeta bya leswi a swi ta endleka enkarhini lowu taka. Hi xikombiso, eka Pisalema 110 Davhida u tsale hi nkarhi lowu Hosi yakwe a yi ta “tshama evokweni ra [Xikwembu] ra xinene” etilweni ni ku nyikiwa matimba lamakulu. Leswaku yi endla yini? Yi hlula valala va Xikwembu ni ku “avanyisa matiko” laha misaveni. Davhida a a ri kokwa wa Mesiya loyi a a ta fuma a ri etilweni naswona a a ta va “muprista hilaha ku nga heriki.” (Ps. 110:1-6) Yesu u vule leswaku vuprofeta lebyi nga eka Pisalema 110, a a byi vulavula ha yena nileswaku a byi ta hetiseka enkarhini lowu taka.—Mat. 22:41-45.
Ina, Davhida u huhuteriwe ku tsala hi leswi endlekeke hi nkarhi wakwe ni leswi a swi ta endleka enkarhini lowu taka loko a pfuxiwa kutani a tiphina hi ku dzunisa Yehovha hilaha ku nga heriki. Sweswo swi hi pfuna ku vona leswaku Pisalema 37:10, 11, 29 yi nga ha hlamusela swiyimo swa le Israyele wa khale ni swiyimo leswi nga ta va kona emisaveni hinkwayo enkarhini lowu taka loko Xikwembu xi hetisisa switshembiso swa xona.—Vona ndzimana 8 ya nhlokomhaka leyi nge, “U Ta Va Na Mina eParadeyisini” eka nkandziyiso lowu.
Pisalema 61:8 ni tindzimana tin’wana leti fanaka na yona ti kombisa leswaku Davhida a a lava ku vangamisa Yehovha eIsrayele wa khale ku kondza a fa. Entiyisweni, ti kombisa leswi Davhida a nga ta kota ku swi endla enkarhini lowu taka loko Yehovha a n’wi pfuxa.