N’wana Wa Xiviri Wa Sara

MANANA a a ri ni rirhandzu a tlhela a rhandza Bibele. Loko a hlangana na Gertrud Ott, ku nga murhumiwa wa le Manado, eNorth Sulawesi, u pfumele ku dyondzeriwa Bibele kutani a amukela ntiyiso. Kambe tata wa mina, Erwin, mutirhi la dumeke wa le bangi naswona endzhakunyana a veke mutshamaxitulu wa Jakarta Stock Exchange, a a byi kaneta swinene vukhongeri lebyintshwa lebyi manana a byi kumile.

Siku rin’wana tatana u hlawurise manana.

U vule leswi a hlundzukile: “U fanele u hlawula exikarhi ka vukhongeri bya wena kumbe mina!”

Manana u dye marhambu ya nhloko ku ringana nkarhi wo leha. Kutani u hlamule a ku: “Ndzi hlawula hinkwaswo​—nuna wa mina swin’we na Yehovha.”

Tatana u sale a ri hava xo xi vula naswona ku hlundzuka kakwe ku herile.

Hi ku famba ka nkarhi, tatana u sungule ku twisisa hikuva a a n’wi rhandza swinene manana naswona a a byi tlangela swinene vutlhari ni ku twisisa kakwe.

Hambiswiritano, manana a a lava leswaku nuna wakwe a n’wi joyina eka vukhongeri bya ntiyiso. Endzhaku ko khongela hi mbilu hinkwayo hi mhaka leyi, u tsundzuke leswaku tatana u rhandza ku dyondza tindzimi. Kutani u khavise yindlu hinkwayo hi tindzimana ta Bibele leti tsariweke hi Xinghezi. U te: “Ndzi ringeta ku antswisa Xinghezi xa mina.” Hi ku xiya leswaku wa swi rhandza leswi a nga biki mariri loko a vulavula, u tlhele a n’wi kombela leswaku a n’wi pfuna ku pfuxeta tinkulumo takwe ta le ka Xikolo xa Vutirheli bya le Tilweni. U pfumerile. Hi ku xiya leswaku a a ri ni malwandla, u n’wi kombele loko va ta swi kota ku amukela mulanguteri wa muganga. U pfumerile. Nakambe hi ku tiva leswaku u rhandza ndyangu wakwe, hi musa u ringanyete loko a swi tsakela ku tshama na hina etinhlengeletanweni ta Vukreste. U pfumerile.

Ku lehisa ka manana mbilu ni ku tlhela a tlhariha, hakatsongotsongo swi endle leswaku tatana a va munhu lonene. Endzhakunyana, loko ndyangu wa ka hina wu ya tshama eNghilandhi, u ye eminhlanganweni ni munghana wakwe lonkulu John Barr, loyi a veke xirho xa Huvo leyi Fumaka ya Timbhoni ta Yehovha. Hi lembe rero, tatana u khuvuriwile, leswi endleke leswaku manana a tsaka swinene. Eka malembe lama landzeleke, u n’wi kombise rirhandzu.

Van’wana va vanghana va hina a va fanisa manana na Lidiya, ku nga wansati wa Mukreste wa lembexidzana ro sungula loyi a a ri ni malwandla swinene. (Mint. 16:14, 15) Hakanyingi ndzi anakanya hi yena ku fana na Sara, loyi hi ntsako a yingiseke nuna wakwe, Abrahama. (1 Pet. 3:4-6) Manana a a tshembekile, a a xixima naswona a a ri ni vuxaka lebyinene na Yehovha leswi a swi tsakisa vanhu vo tala lava a va n’wi tiva. I xikombiso xakwe lexi pfuneke tatana leswaku a amukela ntiyiso. Eka mina a a ri n’wana wa xiviri wa Sara.