Xana Murhi Lowu Tsemiweke Wu Nga Tlhela Wu Hluka?

LOKO murhi wa mutlhwari lowu petsekeke wu ringanisiwa ni mukedari wo saseka wa le Lebanoni, wu nga ha vonaka wu nga tsakisi ngopfu. Kambe mirhi ya mitlhwari yi ni vuswikoti lebyi hlamarisaka byo ya emahlweni yi hanya ni le hansi ka swiyimo swo tika. Yin’wana yi ni malembe ya kwalomu ka 1 000 yi ri kona. Timitsu ta murhi wa mutlhwari ti nghena ti ya le hansi swinene ka misava, naswona murhi wolowo wu nga tlhela wu hanya hambiloko nsinya wa kona wu pandzeleriwile. Loko ntsena timitsu ta wona ta ha hanya, wu ta tlhela wu kula.

Wanuna wo tshembeka Yobo a a tiyiseka leswaku hambiloko o fa, u ta tlhela a hanya. (Yobo 14:13-15) U tirhise xifaniso xa murhi, kumbexana wa mutlhwari, ku kombisa leswaku Xikwembu xi ni vuswikoti byo n’wi pfuxa eku feni. Yobo u te: “Ni murhi wu ni ntshembo. Loko wu tsemiwa, wu ta hluka nakambe.” Loko mpfula yi na endzhaku ka ku va ni dyandza, xikundzu xa mutlhwari lowu omeke xi nga tlhela xi hluka naswona xi humesa “rhavi ku fana ni ximilana lexintshwa.”—Yobo 14:7-9.

Tanihi leswi murimi a hisekelaka ku vona ku hluka ka murhi wa mutlhwari lowu a wu tsemiwile, Yehovha Xikwembu u tiyimiserile ku pfuxa malandza yakwe ni vanhu van’wana vo tala eku feni. (Matewu 22:31, 32; Yohane 5:28, 29; Mintirho 24:15) Anakanya ndlela leyi hi nga ta tsaka ha yona loko hi amukela vanhu lava pfuxiweke eku feni!