Isaya
31 Khombo ka lava va relelako Gibhite va ya lava ku vhuniwa,+
Lava va tsumbako mahaxi,+
Lava va tsumbako a tikareta ta yimpi hi lezvi ti teleko,
Ni mahaxi ya yimpi* hi lezvi ma nga ni ntamu;
Kanilezvi a va tsutsumeli ka Loyi a Basileko wa Izrayeli,
Ne a va hloti Jehovha.
2 Kanilezvi yenawu i tlharihile, i ta neha khombo;
A nga ta tlhelisa a timhaka takwe.
I ta vhukela a yindlu ya vawonhi
Ni lava va vhunetelako a vamahi va kubiha.+
3 Hambulezvo, a vaGibhite vova vanhu basi, a hi Nungungulu,
A mahaxi yabye ya nyama, a hi ya moya.+
A cikhati leci Jehovha a to nawuluta a canja gakwe,
Ni wihi muvhuni i ta ti phinganyeta
Ni loyi a vhuniwako i tawa;
Vontlhe va ta lovisiwa khatigin’we.
4 Hakuva Jehovha i te ngalo ka mina:
“A ku fana ni nghala, ina, a cinghalana ca ntamu,* leci ci bhongako hehla ka leci ci nga khoma,
Laha a ntlawa wontlhe wa varisi wu hlengeletanako wu ci vhukela
Kanilezvi ci nga chavisiwi hi magezu yabye,
Ne ci nga dzukiswi hi guwa gabye,
Hizvalezvo, Jehovha wa mabutho i ta relela a talwa yimpi
Hehla ka Citsunga ca Ziyoni ni ka citsungana cakwe.
5 A ku fana ni zvinyanyani zvi tshambulutako a tipapa ta zvona, Jehovha wa mabutho i ta vhikela Jerusalema.+
I ta mu vhikela a mu ponisa.
I ta mu zwela wusiwana, a mu tlhatlhisa.”
6 “N’wina tiko ga Izrayeli, tlhelelani ka loyi mu nga xinyata mu mu hluwukela.+ 7 Hakuva ka siku lego, a mun’we ni mun’wani wa n’wina i ta tsika a vanungungulu vakwe va prata va nga vhuniko nchumu ni vanungungulu vakwe va ouro va nga vhuniko nchumu, lava mu va mahileko hi mandla ya n’wina, mu wonha.
8 A muAsiriya i ta wisiwa hi cipadha ci nga hiko ca munhu;
Ni cipadha ci nga hiko ca munhu ci ta mu lovisa.+
I ta tsutsuma hi kota ya cipadha,
Niku a majaha yakwe ma ta mahisiwa mitiro ya cikurumeta.