Ezekiyeli

46 “Jehovha, a Hosi ya Hombe, i ngalo: ‘A nyangwa ya tsendzele* wa lomu cikari yi cuwukileko tlhelweni ga mutsuwuka-gambo+ yi fanele ku simama na yi vhalilwe+ ka 6 wa masiku ya ntiro,+ kanilezvi hi siku ga sabhadho ni siku ga hweti yiswa yi fanele ku vhululiwa. 2 A hosana yi ta nghena hi ligumbagumba la nyangwa ya lahandle,+ yi yima laha ka aro ya nyangwa. A vapristi va ta nyikela a munyikelo wa yona wa kuhiswa wa murumba ni miphahlo ya yona ya kuhlengela; yi ta khizama laha ka cipimbitsi ca nyangwa yi gumesa yi huma. Kanilezvi a nyangwa yi nga vhaliwi kala ni gambo. 3 A vanhu va tiko vonawu va ta khizama mahlweni ka Jehovha laha nyangweni leyo hi masabhadho ni tihweti tiswa.+

4 “‘A munyikelo wa kuhiswa wa murumba lowu a hosana yi to wu nyikela ka Jehovha hi siku ga sabhadho wu fanele kuva 6 wa tiyivhana ta tinene ta vamatsune ni yivhu ya matsune ya yinene.+ 5 A munyikelo wa tindzhoho wu tava efa* ka yivhu ya matsune; ka tiyivhana ta vamatsune a nga nyikela ni cihi a ci kotako zvin’we ni hini* ya mafura ka efa ni efa.+ 6 Hi siku ga hweti yiswa, a munyikelo wu tava cidhunana ca cinene ca homu ca lomu ntlhambini, ni 6 wa tiyivhana ta vamatsune, ni yivhu ya matsune; zvontlhe zvi fanele kuva zvi nene.+ 7 I wa nyikele a munyikelo wa tindzhoho wa efa ka cidhunana ca homu, ni efa ka yivhu ya matsune; ka tiyivhana ta vamatsune a nga nyikela ni cihi ci nga ntan’wini wakwe. I wa nyikele ni hini ya mafura ka efa ni efa.

8 “‘A cikhati leci a hosana yi nghenako, yi wa nghene hi ligumbagumba la nyangwa yi tlhela yi huma hi kwalaho.+ 9 Loku a vanhu va tiko vata mahlweni ka Jehovha cikhatini ca mibuzo,+ lava va nghenako hi nyangwa ya tlhelo ga n’walungu*+ kasi ku ta khozela va fanele ku huma hi nyangwa ya tlhelo ga dzonga,*+ ni lava va nghenako hi nyangwa ya tlhelo ga dzonga va fanele ku huma hi nyangwa ya tlhelo ga n’walungu. I hava a faneleko ku huma hi nyangwa leyi a nga nghena hi yona, hakuva vontlhe va fanele ku huma hi nyangwa leyi yi cuwukeneko ni leyi va nga nghena hi yona. 10 Xungetano hi hosana leyi yi nga cikari kabye, yi wa nghene a cikhati leci va nghenako, yi tlhela yi huma a cikhati leci va humako. 11 Lomu mibuzweni ni zvikhatini zva mibuzo, a munyikelo wa tindzhoho wu wave efa ka cidhunana, ni efa ka yivhu ya matsune; ka tiyivhana ta vamatsune a nga nyikela ni cihi a ci kotako zvin’we ni hini ya mafura ka efa ni efa.+

12 “‘Loku a hosana yi humesa a munyikelo wa kuhiswa wa murumba+ kutani miphahlo ya kuhlengela kota munyikelo wa kuzvirandza ka Jehovha, yi ta vhululelwa a nyangwa leyi yi cuwukileko tlhelweni ga mutsuwuka-gambo, niku yi ta humesa a munyikelo wa yona wa kuhiswa wa murumba ni miphahlo ya yona ya kuhlengela a ku khwatsi hi lezvi yi mahako hi siku ga sabhadho.+ Neti yi huma, a nyangwa yi fanele ku vhaliwa.+

13 “‘Siku ni siku, u fanele ku humesa a yivhana ya yinene ya matsune ya lembe gin’we kota munyikelo wa kuhiswa wa murumba ka Jehovha.+ Maha lezvo mixo ni mixo. 14 Mixo ni mixo, u ta yi nyikela zvin’we ni cipandze ca wu 6 ca efa kota munyikelo wa tindzhoho, zvin’we ni cipandze ca wunharu ca hini ya mafura kasi ku n’watsekela a mapa ma sililweko khwatsi kota munyikelo wa tindzhoho wa kukhandzakanya wu mahelwako Jehovha. Leci cileletelo ca kala kupindzuka. 15 Mixo ni mixo, va wa humese a yivhana ya matsune, ni munyikelo wa tindzhoho, ni mafura kota munyikelo wa kuhiswa wa murumba wu mahiwako hi kukhandzakanya.’

16 “Jehovha, a Hosi ya Hombe, i ngalo: ‘Loku a hosana yi mu nyika a cinyikiwo a mun’we ni mun’wani wa vana vakwe kota tshomba, a cinyikiwo leco ci tava tshomba ya vana vakwe. Ci tava ciavelo cabye ca tshomba. 17 Kanilezvi loku a gi nyika cinyikiwo a gin’we ga malandza yakwe ci humako tshombeni yakwe, ci tava ca nandza lego kala hi lembe ga kutlhatlheka;+ andzhako ka lezvo, ci ta tlhelela ka hosana. Ntsena a tshomba ya vana vakwe hi yona yi tova yabye kala kupindzuka. 18 A hosana yi nga teki a tshomba ya vanhu hi ku va hlongola mipetsweni yabye. Yi fanele ku va nyika a tshomba a vana va yona yi humako hi petsweni wa yona n’winyi kasi ne mun’we cikari ka vanhu va mina a nga hlongoliwi petsweni wakwe.’”

19 I no ndzi nghenisa hi nyangwa+ yi nga tlhelweni ga nyangwa yi yako tisaleni to basa to gela ka tona ta vapristi, ti cuwukileko tlhelweni ga n’walungu;+ laho, ndzi no wona wutshamu hi le ndzhako, gi cuwukeneko ni mupela-gambo. 20 I te ngalo ka mina: “A wutshamu legi hi legi a vapristi va to bhikela ka gona a munyikelo wa nandzu ni munyikelo wa ciwonho ni laha va to wocela kona a munyikelo wa tindzhoho,+ kasi va nga teki nchumu va huma nawo handle, tsendzeleni wa lahandle, wu ya basisa* vanhu.”+

21 I no ndzi humesa lahandle, tsendzeleni wa lahandle, a ndzi hundzisa hi ka mune wa makhona ya tsendzele wa lahandle, niku ndzi no wona a wun’wani tsendzele ka khona ni khona ga tsendzele wa lahandle. 22 Ka mune wa makhona ya tsendzele, ku wa hi ni mitsendzele ya yitsongwani ya 40 wa mikono* a kuleha ni 30 wa mikono a kuanama. Yontlhe ya mune yi wa ringana. 23 Ku wa hi ni zvitlhata ka mune wa mitsendzele zvi nga rendzelekele a matlhelo wontlhe, niku lahasi ka zvitlhata ku wa akilwe wutshamu ga ku bhikela kona a minyikelo. 24 Andzhako ka lezvo i te ngalo ka mina: “Leti tiyindlu leti a malandza ya tempeli ma bhikelako ka tona a miphahlo ya vanhu.”+