Kronekele wo sangula

28 Makunu Dhavhidha i no tlhanganisa a tihosana tontlhe ta ka Izrayeli le Jerusalema: a tihosana ta tixaka, ni varangeli va mitlawa+ leyi yi nga tirela hosi, ni varangeli va mitlawa ya 1000 wa vanhu ni ya 100 wa vanhu,+ ni vahlayisi va titshomba tontlhe ni mitlhambi yontlhe ya hosi+ ni vana va yona+ zvin’we ni tihosana leti ti nga tira laha wuhosini, ni vavanuna vontlhe va tinhenha ni lava va nga ni wutlhari ga ku tira.+ 2 Andzhako ka lezvo, hosi Dhavhidha i no suka a yima, aku:

“Ndzi ingiseleni, vamakabye va mina ni vanhu va mina. A kuxuva ka mbilu ya mina ku wa hi ku aka yindlu kasi yiva wutshamu ga kuhumula ga arke* ga civhumelwano ca Jehovha ni cikhegetelo ca mikondzo ya Nungungulu wa hina+ niku ndzi longisele a zvilo zva kuaka hi zvona.+ 3 Kanilezvi a Nungungulu wa lisine i te ngalo ka mina: ‘U nga ta gi akela yindlu a vito ga mina,+ hakuva u munhu wa tiyimpi niku u halatile nkhata.’+ 4 Hambulezvo, Jehovha, a Nungungulu wa Izrayeli, i hlawulile mina ka yontlhe a yindlu ya papayi wa mina kasi ndziva hosi ya Izrayeli kala kupindzuka,+ hakuva i hlawulile Judha kota murangeli+ niku ka yindlu ya Judha i hlawulile a yindlu ya papayi wa mina,+ ni ka vana va papayi wa mina, kuve mina loyi a xaleleko ha yena, kasi a ndzi yimisa kota hosi ya Izrayeli yentlhe.+ 5 Ka vana va mina vontlhe — hakuva Jehovha i ndzi nyikile a vana vo tala+ — i hlawulile a n’wana wa mina Solomoni+ kasi a tshama citshan’wini ca wuhosi ca mufumo wa Jehovha hehla ka Izrayeli.+

6 “I te ngalo ka mina: ‘A n’wana wa wena Solomoni hi yena a to aka a yindlu ya mina ni mitsendzele* ya mina, hakuva hi yena ndzi nga mu hlawula kota n’wana wa mina niku mina ndzi tava papayi wakwe.+ 7 Ndzi ta yimisa a mufumo wakwe wu tiya kala kupindzuka+ loku a ti yimisela ku landzela a milayo ya mina ni zviboho zva mina zva kulamula,+ a ku khwatsi hi lezvi a mahako zvezvi.’ 8 Hikwalaho, ndza wula mahlweni ka Izrayeli yentlhe, gi nga bandla ga Jehovha, ni tindleveni ta Nungungulu wa hina, ndziku: Hlotani a milayo yontlhe ya Jehovha, a Nungungulu wa n’wina, mu yi landzela khwatsi, kasi mu fumela a tiko legi go saseka+ mu tlhela mu gi nyikela ka vana va n’wina kota tshomba ya kala kupindzuka andzhako ka n’wina.

9 “Makunu wena, Solomoni n’wananga, tiva a Nungungulu wa papayi wa wena, u mu tirela hi mbilu yontlhe+ ni muhefemulo* wu tsakileko,* hakuva Jehovha wa hlola timbilu tontlhe+ a pola kontlhe lomu a maalakanyo ma nga byekelela kona.+ Loku u mu hlota u ta mu kuma,+ kanilezvi loku u mu tsika i ta ku chokola kala kupindzuka.+ 10 Hi nga wona, Jehovha i ku hlawulile kasi u aka a yindlu leyi yi tova wutshamu go basa. Tiya hlanha u khoma ntiro.”

11 Dhavhidha i no nyika Solomoni, a n’wana wakwe, a planta+ ya ligumbagumba+ ni ya tiyindlu ta kona, ni ya matshala ya kona, ni ya tisala ta kona ta le hehla, ni ya tikwartu ta kona ta lomu ndzeni, ni ya yindlu* ya muphahlo wa ku kombela ku tsetselelwa zviwonho.+ 12 I no mu nyika a planta ya zvontlhe lezvi a tivisilweko hi moya, yi nga planta ya mitsendzele+ ya yindlu ya Jehovha, ni ya tontlhe a tisala to gela ka tona leti ti nga yi randzele, ni ya wutshamu ga titshomba ta yindlu ya Nungungulu wa lisine, ni ya yindlu ya titshomba ta zvilo lezvi zvi basisilweko.*+ 13 I no tlhela a mu nyika a zvileletelo xungetano hi mitlawa ya vapristi+ ni ya vaLevhi, ni xungetano hi zviavelo zvontlhe zva ntiro wa yindlu ya Jehovha, ni xungetano hi zvibya zvontlhe zva ntiro wa yindlu ya Jehovha. 14 I no mu dlunyatisela a kubindza ka ouro yi nga laveka, yi nga ouro ya zvibya zvontlhe lezvi zvi tirisiwako ka mitiro yo tsalangana, ni kubindza ka zvibya zvontlhe zva prata, zvi nga zvibya zvontlhe lezvi zvi tirisiwako ka mitiro yo tsalangana; 15 ni kubindza ka minenge ya tikandiya ya ouro+ ni tikandiya ta kona ta ouro; ni kubindza ka minenge yo tsalangana ya tikandiya ni tikandiya ta kona; ni kubindza ka minenge ya tikandiya ya prata, ka nenge wun’we ni wun’wani ni tikandiya ta kona hi kuya hi ntiro wa tona; 16 ni kubindza ka ouro ya timeza ta tipawa ta munyikelo,+ ka meza yin’we ni yin’wani, zvin’we ni kubindza ka prata ya timeza ta prata; 17 ni kubindza ka magarfo, ni ka mingelo, ni ka tijaro ta ouro ya yinene; ni kubindza ka zvingelwana zva ouro,+ ka cingelwana cin’we ni cin’wani; ni kubindza ka zvingelwana zva prata, ka cingelwana cin’we ni cin’wani. 18 I no mu nyika kambe a zvileletelo xungetano hi kubindza ka ouro yi hlutilweko ya alati ga libani+ ni ya lezvi zvi yimelako a kareta,+ ma nga makerubhima+ ya ouro lawa ma tshambulutileko a tipapa ta wona ma fenengeta a arke ga civhumelwano ca Jehovha. 19 Dhavhidha i te ngalo: “A canja ga Jehovha gi wa hi hehla ka mina niku i no ndzi nyika kupimisisa kasi ndzi tsala+ a mahungu wontlhe xungetano hi matshamela ya planta.”+

20 Makunu Dhavhidha i no byela a n’wana wakwe, Solomoni, aku: “Tiya hlanha uva ni ntamu, u khoma ntiro. U nga chavi hambu ku tsemeka hlanha, hakuva Jehovha Nungungulu, a Nungungulu wa mina, i zvin’we na wena.+ A nga ta ku tsika hambu ku ku chokola,+ kanilezvi i tava zvin’we na wena kala a ntiro wontlhe wa yindlu ya Jehovha wu mbhela. 21 Hi leyi a mitlawa ya vapristi+ ni ya vaLevhi+ kasi yi maha a mitiro yontlhe ya yindlu ya Nungungulu wa lisine. U na ni vatiri va kuzvirandza va nga ni wutlhari ga ku maha mitiro ya tixaka tontlhe+ zvin’we ni tihosana,+ ni vanhu vontlhe lava va to ingisa zvontlhe a zvileletelo zva wena.”