A ku tirisana wukatini zvi fana ni mufambisi wa avhiyawu ni muvhuneteli wakwe
KA NUNA NI SATI
Ya wumbiri: Kutirisana
LEZVI ZVI WULAKO ZVONA
Loku a nuna ni sati va tirisana wukatini gabye va fana ni mufambisi wa avhiyawu ni muvhuneteli wakwe. Hambu loku ku humelela zvikarato, a mun’we ni mun’wani wabye i li “hi ta kuyini” wutshan’wini gaku “ndzi ta kuyini.”
TSHINYA GA NAYO GA BHIBHILIYA: ‘A va ha hi vambiri, va hi nyama yin’we.’ — Matewu 19:6.
“A nuna ni sati va fanele ku tira zvin’we hi kutikarata kasi a wukati gabye gi tsakisa.” — Christopher.
HIKUYINI ZVI NGA ZVA LISIMA?
Loku a nuna ni sati va nga tiri hi kuzwanana, loku ku humelela zvikarato va tolovela ku holovisana na ku nga hi kulwa ni cikarato. A zvikarato zva zvitsongwani zvi hundzuka zvi maha zvahombe.
“A kutirisana hi gona tshinya ga wukati. Loku mina ni nuna wa mina hi nga tirisani, zvi fana ni loku hi tshama muti wun’we basi kanilezvi na hi nga hi nuna ni sati. Hi tshama muti wun’we kanilezvi loku hi lava ku maha zviboho munhu ni munhu i ti kokela gakwe.” — Alexandra.
LEZVI U NGA MAHAKO
TI HLOLE
Loku ndzi tira mali ndzi li “ya mina”?
Ndzi kuma wurongo go nandziha loku a nuna wa mina kutani sati a nga hi kona?
Xana a ndzi zvi randzi ku vhuxela maxaka ya nuna kutani sati wa mina, hambu loku hi gamekene?
BHULISANANI
Zvilo muni lezvi hi tirisanako ka zvona kota nuna ni sati?
Zvini lezvi hi faneleko ku zvi chukwatisa?
Zvini hi nga zvi mahako kasi hi engetela a moya wa ku tira kota ntlawa?
MAWONELA
Ti alakanyele na u bela bhola ni sati wa wena, kanilezvi na mu hi ka mitlawa yo hambana. Zvini u nga mahako kasi u teka sati wa wena mu ta byela ka ntlawa wun’we?
Wutshan’wini gaku uku: ‘Ndzi ta ganyisa kuyini a jogo leyi?’ waku: ‘Hi nga maha yini kasi hi ganya?’
“Tsika ku wula ku himani a nga wonha, himani a nga kala ku wonha. Lezvo a zvi nge vangi kurula ni kubohana wukatini ga n’wina.” — Ethan.
TSHINYA GA NAYO GA BHIBHILIYA: ‘Ngha mun’we ni mun’wani a nga khataleli a zvakwe ntsena, kanilezvi a khatalela ni zva van’wani.’ — Va Le Filipi 2:3, 4.