“Ni kurula ku nga ta kuva na magumo”

“A Tlhangano wa Matiko wu kuca vanhu vontlhe lezvaku va va ni kuzwanana va tlhela va tirisana, va kombisa cichavo hi tifanelo ta van’wani niku vhikela tiko.” Hi cigelo muni? Kota lezvi zvi wulilweko hi Maher Nasser ka UN Chronicle: ‘Ku na ni ku cicacica ka tinguva, kuengeteleka ka wubihi, wusiwana, ku khomiwa hi ndlela ya hava, tiholova, a vanhu vo tala va kurumeteka ku rura, terrorismo ya misava yontlhe, mababyi ni zvin’wani hi nga zvi tiviko . . . ka matiko wontlhe.’

A van’wani va kuca lezvaku ku yimisiwa mufumo wa misava yontlhe. A vokari va vona hi Dante a mutsali wa magezu yo saseka, na a hi filósofo tlhelo ciro ca hombe ca politika wa le Itália a hanyileko kwalomu ka va (1265-1321) na Albert Einstein a tlhari ya hombe ya Fisíca a hanyileko ka malembe ya va (1879-1955). Dante i wa kholwa lezvaku a zvi nge koteki a kuva ni kurula tikweni legi gi hambanileko hi politika. Yena i wo tshaha a magezu ya Jesu ma nga ka Luka 11:17 yaku: “Ni wihi mufumo wu ti pandzako wu ti vhukela wu ta hangalaka.”

Cikhatanyana ndzhako ka yimpi ya wumbiri ya misava, laha ku nga tirisiwa a bhomba mambiri ya hombe, Albert Einstein i gumesile a tsala timhaka ti nga humesiwa ka zvihaxa mahungu na a tsalela a murangeli wa hombe wa hlengeletano ya Tlhangano wa Matiko. Yena ite: “A Tlhangano wa Matiko wu fanele ku tira nguvhu hi cihatla kasi kuva ni kutshamiseka misaveni yontlhe, ku seketelwako ka mufumo wun’we wa lisine misaveni yontlhe.”

Kanilezvi a zviro lezvo zva politika zvi nga wa ta yimisa a mufumo lowu wa ntamu zvi wa nga tava ni wukanganyisi, kugumelwa, ni tihanyi? Kutani ku zvi wa ta fana ni vafumeli lava van’wani? A zviwutiso lezvi zvi hi alakanyisa a magezu ya mu tivi wa matimu wa ku hi Lorde Acton wa le Grã-Bretania yaku: ‘A mifumo yiya yi biha, niku yontlhe a mifumo yi engetela kubiha nguvhu.’

Hambulezvo, kasi a vanhu va kuma kurula ka lisine ni ku zwanana, va fanele kuva ni wumun’we. Kanilezvi zvi nga kotekisa kuyini lezvaku kuva ni wumun’we? Kona lezvo futsi zvi nga koteka? A hlamulo wa Bhibhiliya i ina. Gona gi li zva koteka niku zvi ta koteka. Hi ndlela muni? Zvi nga ta kotiwa hi mifumo yi wumbiwako hi zviro zva politika zva wukanganyisi. Kanilezvi zvi ta kotiwa hi mufumo wu yimisilweko hi Nungungulu. Zvini zvin’wani, lezvi a mufumo wu to kombisa ha zvona a fanelo ya wona ya ku fumela zvivangwa. Kona cini a mufumo lowo? A Bhibhiliya gi hi byela a vito ga wona — “Mufumo wa Nungungulu.” — Luka 4:43.

“A WUTE MUFUMO WA WENA”

Jesu Kristu i wa wula a mufumo wa Nungungulu a cikhati a nga maha mukhongelo wa hosi aku: “A wute Mufumo wa wena. A kurandza ka wena a ku mahiwe misaveni.” (Matewu 6:9, 10) Kunene, a Mufumo wa Nungungulu wu ta maha ku a kurandza ka Nungungulu ku mahiwa misaveni, na ku nga hi kurandza ka lava va xuvako nguvhu ku fuma ni va makangwa.

A mufumo wa Nungungulu wu wuliwa kambe lezvaku “Mufumo wa matilo”. (Matewu 5:3) Hi cigelo muni? A cikhati leci wu to fumela misava, wu nga ta fuma na wu hi laha misaveni kanilezvi wu ta fuma na wu hi le tilweni. Zvi wula yini lezvo? A mufumo lowo wu nga ta lava ku seketelwa hi mali kutani hi zvilo. Hi nga wona a kutlhatlhiswa loku ku to kumiwa hi vafumelwi va wona!

A gezu “mufumo” gi komba lezvaku a Mufumo wa Nungungulu mufumo wa lisine. Wu na ni Hosi — Jesu Kristu — leyi yi nyikilweko wuhosi hi Nungungulu. A Bhibhiliya gi wula lezvi xungetano hi Jesu:

• “A wuhosi gi vekilwe makatleni yakwe . . . A kufuma kakwe ku ta endzeleka, ni kurula ku nga ta kuva na magumo.” — Isaya 9:6, 7, Versão Rei Jaime.

• ‘I no nyikwa kufuma, ni wukosi, ni mufumo, kasi a va matiko wontlhe ni tixaka ni tirimi va fela ku mu tirela. A kufuma kakwe . . . ku nga ta hundza.’ — Dhaniyeli 7:14.

• “A mufumo wa misava wu mahile a Mufumo wa Hosi ya hina [Nungungulu] na Kristu wa yona.” — Kuvhululelwa 11:15.

Kutatisekeni ka mukhongelo wa Hosi wa Jesu, a mufumo wa Nungungulu wu ta maha kurandza ka Nungungulu laha misaveni. A hasi ka mufumo lowu, a vanhu vontlhe va ta gondza lezvi va nga khatalelisako zvona misava kasi hi kuma wutomi gi nene.

A ku hundza zvontlhe lezvo, a Mufumo wa Nungungulu wu ta gondzisa vanhu. Vontlhe va ta gondza a milayo yaleyi ya yin’we. Ku nga tava ni kungazwanani kutani kuhambana. Isaya 11:9 ili: ‘Ku nga ta gohiwa nchumu hambu ku wonhiwa hakuva ku tiva Jehovha ku tava ku enetile misava, Khwatsi hi lezvi a mati ma fenengetileko a kueta ka bimbi.’

A vaaki va tiko va ta nghana hakunene va kuma lezvi a Tlhangano wa Matiko wu xuvelako vanhu nyamutlha — ku nga kurula niku a vanhu vontlhe misaveni va randzana ni kuzwanana. A Lisimu 37:11 li wula lezvi: “Va ta xalaliswa hi kurula ka hombe.” Hi kufamba ka cikhati, a magezu yo kota “wugevenga”, “ku chakisiwa ka misava,” “wusiwana,” ni “tiyimpi” ma nga ta ha kumbukiwa. Kanilezvi zvi ta maheka rini lezvo? Kutani hi rini a Mufumo wa Nungungulu wu to sangula kufumela misava? Wu ta zvi mahisa kuyini? Niku wena u ta vhunekisa kuyini hi mufumo lowu? A hi zvi woneni.