A Mbongola Yi Wulawula

WA TSHUKA uzwa a ku a mbongola ya wulawula? U nga ha hlamula uku: ‘Ahihi. A zihari a zi zi koti ku wulawula.’ Kanilezi a Biblia gi hi byela hi mbongola yi nga maha lezo. A hi woneni a ku zi mahekisile kuyini.

A vaIsraeli va laha kusuhani ni ku nghena tikweni ga Kanani. Balake, a hosi ya Moabi, i chava vaIsraeli. Hizalezo yena i vitanisa wanuna wo tlhariha a vitwako Balaami kasi kuta rukatela vaIsraeli. Balake i tsumbisa Balaami a ku mu nyika mali yo tala, zonake Balaami i khilela a mbongola yakwe a sangula a pfhumba gakwe ga kuya wonana na Balake.

Jehova a nga lavi lezaku Balaami a rukatela vanhu Vakwe. Hizalezo yena i rumela a ngelosi yi nga ni supado yo leha a ku ya yima laha ndleleni kasi ku tsanga Balaami. Balaami a nga yi woni ngelosi, kanilezi a mbongola ya yi wona. Hikwalaho a mbongola yi zametela a ku hambuka mahlweni ka ngelosi, hi magumo yona yi su barama laha ndleleni. Balaami i zangara nguvu, a tlhela aba a mbongola yakwe hi nhonga.

Makunu Jehova i maha lezaku Balaami azwa a mbongola yakwe na yi mu angula. A mbongola yi wutisa yiku: ‘Zini nzi ku maheleko kasi u fela ku nziba ke?’

Balaami aku: ‘U nzi mahile ku khwatsi a nzi pimisi. Loku nzi wa hi ni supado, ngha nzi ku daya!’

A mbongola yi wutisa yiku: ‘Xana nza tshuka nzi ku mahela lezi ke?’

Balaami a hlamula aku: ‘Ahihi.’

Makunu Jehova i maha lezaku Balaami a wona a ngelosi leyi yi yimileko laha ndleleni na yi hi ni supado. A ngelosi yiku: ‘U bele yini a mbongola ya wena ke? Nzi tele ku ta ku valela ndlela, hakuva a zi faneli a ku uya rukatela Israeli. Loku a mbongola ya wena yi wa nga hambukangi mahlweni ka mina, ngha nzi ku dele, kanilezi na nzi nga bayisangi a mbongola ya wena.’

Balaami aku: ‘Nzi onhile. A nzi zi tivangi lezaku u wa yimile laha ndleleni.’ A ngelosi yi tsika Balaami a famba, zonake yena iya mahlweni a ku ya wonana na Balake. Yena wa ha lava ku rukatela vaIsraeli, kanilezi, wutshanwini ga lezo, Jehova i mu maha a katekisa Israeli zikhati zinharu.