Jesu Ata Kota Hosi

XIKHATANYANA nzhako ka loku a hanyisile zikhumu zimbiri zi nga hi vakombeli va zomola, Jesu ita ka xidoropana xitsongwani xi nga kusuhi ni Jerusalema. Yena i byela vambiri va vapizani vakwe ku ngalo: ‘Nghenani lomu xidoropaneni zonake mu ta ya kuma a ximbongolana. Xi tlhatlheni mu xi neha ka mina.’

Laha a mbongola yi nehiwako kakwe, Jesu i khilela ka yona. Zonake a famba hi yona a pfhukana kala Jerusalema. Laha a chikelako kusuhani ni doropa, i khingiwa hi xidlemo xa hombe xa vanhu. A vanyingi va kona va tlhatlha a mabhaji yabye va ma andlala laha ndleleni. Vanwani va tsema maravi ya micinzu. Va ma vekawu laha ndleleni, zonake va kanyuluka vaku: ‘Nungungulu katekisa a hosi yi tako vitweni ga Jehova!’

Masikwini ya kale nguvu le Israeli a tihosi ta tiswa ti wa khilela a ximbongolana nzeni ka Jerusalema lezaku ti ti tivekisa ka vanhu. Hi zalezo a mahako Jesu. Niku a vanhu lava vo komba ku ngalo va mu lava Jesu akuva a maha hosi yabye. Kanilezi a hi vontlhe vanhu va mu lavako. Ha zi kota ku zi wona lezo hi lezi zi mahekako a xikhati lexi Jesu a yako tempeleni.

Le tempeleni Jesu i hanyisa vanhu va zikhumu ni zikhurubu. Laha a vanana va tsongwani va wonako lezo, va kanyuluka va dumisa Jesu. Kanilezi lezo zi zangarisa a vapristi, zonake vaku ngalo ka Jesu: ‘Wa zizwa lezi va wulako vanana ke?’

Jesu a hlamula aku: ‘Ina, nza zizwa. Cima a mu gonzangi laha a Biblia gi wulako ku ngalo: “Hi milomu ya vanana va tsongwani Nungungulu i ta neha kudumiswa?”’ Hikwalaho a vanana va simama ku dumisa a hosi ya Nungungulu.

Ha xuva a ku fanana ni vanana lavo, a hi zona? A vanhu vo kari va nga zama ku hi nyimisa a ku wulawula hi mufumo wa Nungungulu. Kanilezi hina hi ta simama ku byela vanwani a zilo zo hlamalisa lezi Jesu a to zi mahela vanhu.

Ku wa nga hi xikhati xa ku Jesu a sangula ku fuma kota hosi a xikhati lexi a nga hi misaveni. Hi rini xi tota a xikhati lexo? A vapizani va Jesu va lava ku zi tiva. Hi ta gonza hi lezo hi kulanzela.