Jesu A Hanyisa Vababyi

LAHA Jesu a fambafambako tikweni, i hanyisa vababyi. A mahungu ya zihlamaliso lezo ma hlawuteliwa lomu ka zidoropana ni madoropa wontlhe. Hikwalaho a vanhu va neha ka yena a zikhurubu, a zikhumu ni ziwiri, zinwe ni vanwani vanhu vo tala va babyako. Zonake Jesu i hanyisa vona vontlhe.

Ku hunzile malembe manharu kusukela loku Johani a bapatizile Jesu. Kasike Jesu i byela vapostoli vakwe lezaku lokuloku i taya Jerusalema, leyo a to ya dawa kona, a tlhela a vuka hi ka vafileko. Kanilezi na lezo zi nga se maheka, Jesu i simama ku hanyisa vababyi.

Ka siku go kari Jesu o gonzisa hi siku ga Sabado. A Sabado i siku ga kuhumula ka vaJuda. A wasati loyi u mu wonako kwalaha i wa kari a babya nguvu. Yena i wa ovekile hi 18 wa malembe, na a nga zi koti ku ololoka khwatsi. Hikwalaho Jesu i mu tlhateka mandla yakwe, zonake a wasati a sangula ku ololoka. I hanyisilwe!

Lezo zi zangarisa varangeli va wukhongeli. Munwe wabye i kanyulukela xidlemo aku: ‘Ku na ni ntlhanu wa masiku ni ginwe lawa hi faneleko ku tira ka wona. Tanani ka masiku lawo mu ta hanyiswa, na ku nga hi siku ga Sabado!’

Kanilezi Jesu i hlamula aku: ‘Nwina vavanuna vo biha. A munwe ni munwani wa nwina i wa ta tlhatlha a mbongola yakwe a yi gula ku ya yi nwisa mati hi siku ga Sabado. Makunu a nga fanelangi a wasati loyi mbuyangwana, a babyileko a 18 wa malembe, a ku hanyiswa hi siku ga Sabado?’ A hlamulo wa Jesu wu wisa tingana vavanuna lavo vo biha.

Anzhako ka xikhati Jesu ni vapostoli vakwe va famba va kongoma a tlhelo ga Jerusalema. Na va ha hi handle ka doropa ga Jeriko, a zikhumu zimbiri zi kombelako zomola zi tiva ku ngalo Jesu wa hunza. Hikwalaho zi kanyuluka ziku: ‘Jesu, hi vune!’

Jesu i vitana a zikhumu lezo lezaku zi tshinela ka yena, zonake a wutisa: ‘Mu lava lezaku nzi mu mahela yini?’ Zona ziku: ‘Hosi, a mahlo ya hina a ma vululiwe.’ Jesu i va khumba a mahlo yabye, niku zalezo va zi kota ku wona! Wa zi tiva a ku hikuyini Jesu a mahako zihlamaliso lezo zo rewukisa? Hi lezaku yena wa ranza vanhu niku i lava lezaku va kholwa ka yena. Hizalezo ha zi kota ku tiyiseka lezaku loku yena a fuma kota Hosi a ku na munhu misaveni a to tlhela a babya.