Xini a Mufumo wa Nungungulu? Ndlela yo komba lezaku ha zi lava a ku wuta

WA WU tiva a mukhongelo lowu Jesu a nga gonzisa valanzeli vakwe? — Loku u nga wu tivi, a hi gonze zinwe lomu ka Biblia, ka Mateu 6:9-13. A Mukombelo wa Hosi, kota lezi a vanhu vo tala va wu vitanisako zona, wu patsa magezu lawa: “A wute mufumo wa wena.” Wa zi tiva a ku xini a Mufumo wa Nungungulu? —

Nza ha ku tlhamusela: A munhu loyi a fumelako tiko go kari i vitaniwa ku i hosi. A wuhosi gakwe gi vitaniwa a ku mufumo. Ka matiko yo kari, loyi a nga wa hombe nzeni ka mufumo i vitaniwa a ku murangeli kutani presidente. Makunu, ahati a Murangeli wa mufumo wa Nungungulu ke, i vitaniswa kuyini? — I vitaniwa ku i Hosi. Hi kota ya lezo, a wuhosi ga Nungungulu gi vitaniwa ku Mufumo.

Wa zi tiva a ku himani a hlawulilweko hi Jehova Nungungulu lezaku ava Hosi ya Mufumo wakwe? — I hlawulile N’wana wakwe, Jesu Kristu. Hikuyini Jesu a nga mufumeli wa mu nene a ku hunza tihosi tontlhe leti a vanhu va nga ti hlawulako? — Hi ku Jesu wa mu ranza nguvu a Papai wakwe, Jehova. Hikwalaho, xontlhe xikhati i maha za zi nene.

Kaleloko Jesu na a nga se pswaliwa le Betlehema, a Biblia gi rangile gi wulawula hi kupswaliwa kakwe, gi tlhela gi wula lezaku i wa tava Hosi yi hlawulilweko hi Nungungulu. A hi gonze hi zona ka Isaya 9:6, 7. Ku na ni magezu lawa: “Hakuva hi pswalelwe n’wana, hi nyikilwe a nisanyana, a wuhosi gi vekilwe makatleni yakwe; yena i ta vitanwa . . . Hosi ya kurula. A kufuma kakwe ku ta enzeleka, ni kurula ku nga ta kuva na magumo.”

Jesu i N’wana wa Hosi ya Hombe, Jehova. Kanilezi, Jehova i tlhelile a maha Jesu lezaku ava Hosi ya mufumo wakwe, lowu wu to fumela misava hi 1.000 wa malembe. (Kuvululelwa 20:6) Anzhako ka kuva Jesu a bapatizilwe, i lo sangula “ku kanela, aku: Hunzulukani, hakuva a mufumo wa tilo wu tshinele.” — Mateu 4:17.

Hikuyini Jesu a nga wula lezaku a Mufumo wu tshinele? — I wulile lezo hakuva a Hosi leyi yi nga wa ta fuma le tilweni, yi wa hi navo kwalaho! Hi lexo xi nga maha Jesu a wula lezi ka vanhu vo kari: “A mufumo wa Nungungulu wu kona xikari ka nwina.” (Luka 17:21) Zi wa nga ta tsakisa a ku tshinela kusuhani ka Hosi ya Nungungulu laha ka kuza u yi henya? —

Makunu, hi nga nzi byela: I ntiro muni wa lisima lowu Jesu a ngata a ta wu maha laha misaveni? — Jesu i hlamulile a xiwutiso lexi laha a ngaku: “Nzi yimelwe hi ku kanela a ivangeli ya mufumo wa Nungungulu ni ka yinwani miti; hakuva nzi rumelwe lezo.” (Luka 4:43) Jesu i wa zi tiva lezaku a nge zi koti a ku maha ntiro wontlhe wa kuxumayela na a hi yece. Makunu, u alakanya lezaku zini a nga maha? —

Jesu i lo teka vanhu a famba navo a va komba lezi va nga fanele ku maha loku va hi kuxumayeleni. A vanhu vo sangula a ku va gonzisa ku vile 12 wa vapostoli lava a nga va hlawulile. (Mateu 10:5, 7) Xana Jesu i no gonzisa a vapostoli vakwe ntsena a ku maha ntiro lowo? Ahihi, a Biblia gi wula lezaku i gonzisile a vanwani kambe lezaku va xumayela. Hi kufamba ka xikhati, i lo rumela a 70 wa vapizani hi vambiri vambiri. Zini lezi va nga kari va gonzisa vanhu? — Jesu i te ngalo: Xumayelani muku: “A mufumo wa Nungungulu wu tshinele ka nwina.” (Luka 10:9) Hi ndlela leyo a vanhu va lo gonza xungetano hi mufumo wa Nungungulu.

Xikhatini xa kale nguvu, le Israeli, a tihosi ta tiswa ti wa nghena lomu doropeni na ti khilele ximbongolana kasi ti ti tivekisa ka vanhu. Hi zalezo Jesu a nga maha a xikhati lexi a nga enzela a Jerusalema hi khati go gumesa. Hi ndlela leyo, Jesu i lo komba lezaku i wa ta maha Hosi ya Mufumo wa Nungungulu. A vanhu va mu tsakele lezaku a maha a Hosi yabye? —

Laha a nga kari a chikela, a vanhu vo tala va lo andlalela tinguwo tabye lomu ruweni legi a ngata hi gona. A vanwani va lo tshova maravi ya tisinya va ma veketela laha ruweni. Hi ku maha lezo va wa komba lezaku va mu lava Jesu lezaku ava Hosi yabye. Vontlhe va lo wula hi gezu go tlakuka vaku: “A yi khesiwe a Hosi leyi yi tako vitweni ga Jehova”! Kanilezi a hi vontlhe va nga tsakile. A varangeli vo kari va wukhongeli va zile va byela Jesu vaku: ‘Byela a vapizani va wena va miyela.’ — Luka 19:28-40.

Anzhako ka ntlhanu wa masiku, Jesu i lo khonwa a yisiwa ndlwini ya wuhosi, mutini wa hosi Pontiu Pilatu. Lava va nga kari va venga Jesu va lo wula lezaku Jesu i wa ti wula hosi ni lezaku i vukela mufumo wa Roma. Hikwalaho, Pilatu i lo kombela Jesu lezaku a wula xokari xungetano hi nanzu lowo. Jesu i lo komba lezaku i wa nga zami ku wutla mufumo. I lo byela Pilatu aku: “A mufumo wa mina a hi wa misava.” — Johani 18:36.

Pilatu i lo huma lomu ndlwini ya wuhosi a ya byela vanhu lezaku i wa nga woni nanzu ka Jesu. Kanilezi, ka xikhati lexo a vanhu va wa nga ha mu lavi Jesu lezaku ava Hosi yabye. Va wa nga zi lavi lezaku Pilatu a mu tlhatlhisa. (Johani 18:37-40) Anzhako ka kuva a wulawulile kambe na Jesu, Pilatu i lo zi wona khwatsi lezaku Jesu i wa nga hi na nanzu. Hikwalaho, anzhako ka kuva a humesile Jesu hi khati go gumesa, Pilatu i lo wula lezi: ‘Wonani! A hosi ya nwina!’ Kanilezi a vanhu va lo wula hi gezu go tlakuka vaku: “Mu suse, mu suse, mu belele!”

Pilatu i lo va wutisa lezi: “Nzi belela a hosi ya nwina ke?” A varangeli va vapristi va lo hlamula vaku: “A hi na hosi ahandle ka Kesari.” Lezo zi wa bihile nguvu! A vapristi lavo vo biha va wa zi kotile a ku cica vanhu lezaku va nga ha mu lavi Jesu! — Johani 19:1-16, Tradução do Novo Mundo.

Inyamutlha, a zilo a zi hambani nguvu ni xikhatini xa Jesu. A vanhu vo tala a va zi lavi lezaku Jesu a maha Hosi yabye. Va nga ha wula lezaku va kholwa ka Nungungulu, kanilezi a va zi lavi a ku maha lezi Nungungulu na Kristu va va byelako. Va lava ku a mifumo yabye yi simama ku fuma laha misaveni.

Hina ke? A xikhati lexi hi gonzako xungetano hi Mufumo wa Nungungulu, ni zilo zontlhe za zi nene lezi wu to zi maha, zi hi maha hi ti zwisa kuyini hi Nungungulu? — Ha mu ranza, a hi zona? — Makunu hi nga mu kombisa kuyini Nungungulu lezaku ha mu ranza, niku hi lava ku fumelwa hi Mufumo wakwe? —

Hi nga komba Nungungulu lezi hi ti zwisako zona hi ku pimanyisa xikombiso xa Jesu. Zini lezi Jesu a nga maha kasi ku komba lezaku i wa mu ranza Jehova? — Jesu i lo wula lezi: “Xontlhe xikhati nzi maha lezi zi mu xalalisako.” (Johani 8:29) Ina, Jesu i tile laha misaveni ‘kasi ku ta maha kuranza ka Nungungulu’ ni ku “mbhetisa a ntiro wakwe.” (Maheberu 10:7; Johani 4:34) Ehleketa hi lezi Jesu a nga maha na a nga se sangula ntiro wakwe.

Jesu i lo famba a ya kumana na Johani Mubapatizi le Congweni wa Jordani. Anzhako ka kuva va nghenile lomu matini, Johani i lo bapatiza Jesu hi ku peta a miri wakwe wontlhe lomu matini, a gumesa a mu humesa. Wa zi tiva a ku hikuyini Johani a nga bapatiza Jesu? —

Jesu i lo kombela Johani lezaku a maha lezo. Kanilezi, hi zi tivisa kuyini lezaku Nungungulu i wa lava lezaku Jesu a bapatizwa? — Hi tiva lezo hakuva a xikhati lexi Jesu a nga huma hi lomu matini i zwile a gezu ga Nungungulu na gi huma hi le tilweni giku: “Wena u Nwananga a ranzekako, nzi xalalako khwatsi ha wena.” Nungungulu i lo rumela a moya wakwe wa kubasa hi tshamela ga tuva hehla ka Jesu. Hikwalaho, a kuva Jesu a bapatizilwe i wa komba lezaku i lava ku tirela Jehova wutomini gakwe gontlhe kutani kala kupinzuka. — Marku 1:9-11.

Zezi wa hi nwanana, makunu u ta maha yini loku u kula? — U ta fana na Jesu u bapatiziwa? — U fanele ku mu pimanyisa, hakuva a Biblia gi wula lezaku i ku siyele ‘xikombiso, kasi u lanzela a nkonzo wakwe.’ (1 Pedro 2:21) Loku u ta bapatiziwa, u ta komba lezaku hakunene u lava ku fumelwa hi Mufumo wa Nungungulu. Kanilezi, a hi kubapatizwa ntsena ku lavekako.

Hi fanele ku ingisa zontlhe lezi Jesu a zi gonzisileko. Jesu i wulile lezaku a hi faneli a kuva “va tiko.” Zi wa tava ku ingisa Nungungulu loku hi wo ti nghenisela ka zilo za tiko? Jesu ni vapostoli vakwe va lo simama va ti hambanyisa ni zilo za tiko. (Johani 17:14) Wutshanwini ga ku ti nghenisela ka zilo lezo, zini va nga maha? — Va lo wulawula ni vanwani xungetano hi Mufumo wa Nungungulu. Lowo ku wa hi ntiro wa lisima wutomini gabye. Hinawu hi nga maha lezo ke? — Hi zona, hakuva loyi a kombelako lezaku a Mufumo wa Nungungulu wuta, i fanele ku byela vanwani xungetano hi wona.