Hikuyini hi faneleko ku mu ranza Jesu?

TI ALAKANYELE na u famba hi ngalava zonake yi sangula ku mbombomela lomu matini. U wa nga ta tsaka loku a wokari i wo ku ponisa ke? — Ahati loku a munhu wo kari i wofa hi ku lava ku ku ponisa? — Hi zalezo Jesu Kristu a nga maha. Kota lezi hi gonzileko ka Xipimo 37, i lo nyikela wutomi gakwe kota nzhiho kasi a hi ponisa.

Hi lisine, Jesu a nga hi ponisi lomu ka ngalava yi mbombomelako. Wa zi alakanya lezaku i hi ponisa ka yini? — I hi ponisa ka xionho ni kufa lezi hi zi kumileko ka Adamu. Hambu lezi a vanhu vo kari va mahileko a zilo zo biha nguvu, Jesu i fele ni vanhu valavo kambe. U wa ta nyikela a wutomi ga wena kasi ku ponisa a vanhu va mahileko a zilo zo biha ke? —

A Biblia gi ngalo: “Za karata ku a wokari a fela munhu wo lulama, kanilezi, kuzilava a munhu a nga xinyata ku fela munhu wa mu nene.” Hambulezo, a Biblia gi tlhamusela lezaku Jesu ‘i lo fela vanhu va nga chaviko Nungungulu.’ Lezo zi patsa ni lava va kalako va nga tireli Nungungulu! A Biblia gi tlhela giku: “Na ha hi vaonhi [na ha ha maha zilo za kubiha] Kristu i lo hi fela.” — Va Le Roma 5:6-8, NM.

Wa mu tiva ku himani a mupostoli loyi a nga mahile zilo zo biha nguvu na a nga se maha mupostoli? — A mupostoli loye i lo tsala lezi: “Kristu Jesu i lota misaveni ku ta hanyisa vaonhi, lava mina nzi nga nhonzwa yabye.” A mupostoli loyi a nga wula lezo hi Paule. I lo wula lezaku ‘i wa hi xipumbu’ ni lezaku i lo simama ku hanya hi ‘kubiha.’ — 1 Timote 1:15; Titusi 3:3.

Hi nga alakanyela a liranzo leli Nungungulu a nga li kombisa hi ku rumela a N’wana wakwe a ta fela vanhu vo khwatsi hi lavo! Teka a Biblia ga wena hi lera xungetano hi lezo lomu ka Johani xipimo 3, a vesi ga 16. Hi gonza lezi: “Nungungulu i lo ranza tiko kota lezi, a kala a nyikela a N’wana wakwe a belekilweko yece, kasi ni wihi loyi a kholwako kakwe a nga lovi, kanilezi ava ni wutomi ga pinzukelwa.”

Jesu i lo komba lezaku i wa hi ni liranzo lo fana ni leli la Papai wakwe. Kuzilava wa zi alakanya lezaku ka Xipimo 30 xa bhuku legi, hi gonzile hi zilo zo kari lezi Jesu a nga xaniseka hi zona ka wusiku legi a nga khonwa. I lo yisiwa ka Mupristi wa Hombe Kayafasi, ku nga lomu a nga lamulelwa kona. Ku lo tisiwa a vakustumunyu va mawunwa kasi va ta hembela Jesu, niku a vanhu va lo sangula ku muba hi zibhakela. Lezo zi mahekile ka xikhati lexi Pedro a nga kaneta ku wa mu tiva Jesu. Zalezi a hi mahisi ku khwatsi hi wa hi konawu na hi wona zinwani zi nga gumesa zi maheka.

Ku wa hi ni mixo. Jesu i wa nga etlelangi a matolo wa kona. Kota lezi a matolo wa kona va nga xuxile Jesu va nga tsemi mhaka, a vapristi va lo tekela ku vitanana le Hubyeni ya hombe ya vaJuda, zonake va sangula ku yi xuxa kambe. Ka khati legi kambe va lo lumbeta Jesu lezaku i wa onhele Nungungulu.

Hi kulanzela, a vapristi va lo laya lezaku Jesu a bohiwa, va mu yisa ka Pilatu, a mufumeli wa muRoma. Va lo byela Pilatu vaku: ‘Jesu i vukela mufumo. I fanele kufa.’ Kanilezi, Pilatu i lo wona lezaku a vapristi va wo hemba. Hikwalaho, i lo va byela lezi: ‘Nzi lava ku mu tsika a famba, hakuva mina a nzi kumi nanzu ka yena.’ Kanilezi a xitshungo ni vapristi va lo hlamula vaku: ‘Ahihi! Mu dayi!’

Hi nzhako ka xikhati xo kari, Pilatu i lo tlhela a zama ku byela vanhu lezaku i lava ku tsika Jesu a famba. Kanilezi a vapristi ni xitshungo va lo wula lezi hi gezu go tlakuka: ‘Loku u tsika a munhu loyi, wenawu wa vukela mufumo! Mu dayi!’ A xitshungo xi lo vanga guwa ga hombe nguvu. Wa zi tiva a ku zini lezi Pilatu a nga maha? —

I lo nyikela Jesu. A kusangula, i lo mu nyikela lezaku a biwa. Zonake a mu tlhelisa ka masochwa kasi ma mu daya. Va lo mu tlhateka simbu ya mizwa hlokweni yakwe va tlhela va mu poyila hi ku mu khizamela. Va lo gumesa va mu rwexa a sinya ya hombe va huma naye lomu doropeni vaya ka wutshamu gi vitaniwako ku Golgota. Loku va chikele ka wutshamu lego, va lo belela mandla ni mikonzo ya Jesu laha sinyeni, zonake va yimisa a sinya leyi Jesu a nga belelwe ka yona. I lo huma nkhata. I wazwa a kubayisa ka hombe.

Jesu a nga tekelangi kufa. I lo hayekiwa laho sinyeni. A varangeli va wukhongeli va lo mu hleka. A vahunzi va ndlela va wa wula lezi: “Loku u hi N’wana wa Nungungulu, chika laha mhanzeni ya xanisa!” Kanilezi, Jesu i wa zi tiva lezi a Papai wakwe a nga mu rumela zona laha misaveni lezaku a ta zi maha. I wa zi tiva lezaku i wa fanele ku nyikela a wutomi gakwe go mbhelela kasi hi kuma wutomi ga pinzukelwa. Hi kugumesa, Jesu i lo rilela Papai wakwe a gumesa afa hi ma 15 ya gambo lego. — Mateu 26:36–27:50, NM; Marku 15:1; Luka 22:39–23:46; Johani 18:1–19:30.

Jesu i wa hambene nguvu na Adamu! Adamu a nga kombisangi lezaku i wa mu ranza Nungungulu. I lo hlawula a ku nga ingisi Nungungulu. Niku a nga kombisangi liranzo ka hinawu. Kota lezi a nga onha, hontlheni hi pswaliwa na hi hi ni xionho. Kanilezi, Jesu i lo kombisa liranzo ka Nungungulu ni ka hinawu. Xontlhe xikhati i wa ingisa Nungungulu. Niku i lo nyikela wutomi gakwe kasi a hi susela a zilo zontlhe zo biha, lezi Adamu a hi maheleko.

Wa zi nyika lisima a zilo lezi Jesu a hi maheleko ke? — A xikhati lexi u khongelako ka Nungungulu, wa alakanya a ku mu bonga hi kota ya lezi a hi nyikileko N’wana wakwe? — Mupostoli Paule i wa bonga nguvu lezi Kristu a nga mu mahela. Paule i lo tsala lezi: ‘A N’wana wa Nungungulu i lo nzi ranza, a ti nyikela hi kota ya mina.’ (Va Le Galatia 2:20) Jesu i fele wena na minawu. I lo nyikela wutomi gakwe go mbhelela kasi hi kuma wutomi ga pinzukelwa! Hakunene lexo xigelo xa hombe nguvu xa kuva hi mu ranza Jesu.

Mupostoli Paule i lo tsalela a maKristu ya le doropeni ga le Korinte aku: ‘A liranzo la Kristu la hi kuca.’ Zini lezi a liranzo la Kristu li hi kucako ku maha? U zi wonisa kuyini? — Wona a hlamulo wa Paule: ‘Kristu i lo fela vontlhe kasi va hanyela Yena. A va ha faneli ku hanyela ku ti tsakisa.’ — 2 Va Le Korinte 5:14, 15.

Ku na ni tindlela to kari u ti alakanyako ta ku komba lezaku u hanyela ku tsakisa Kristu ke? — A yinwe ya tindlela, ku byela vanwani lezi u gonzileko xungetano hi Jesu. Ahandle ka lezo, ti alakanyele na u hi wece lomu ndlwini, a ku na loyi a zi wonako lezi u mahako, ne papai ne mamani. Xana u ta wona a zilo zo kari lomu ka televizawu kutani lomu ka Internet, lezi u zi tivako ku zi nga ta mu tsakisa Jesu? — Alakanya lezaku zezi, Jesu wa hanya niku a nga zi wona zontlhe lezi hi mahako!

A xinwani xi mahako lezaku zi fanela a kuva hi mu ranza Jesu hi lezaku hi lava ku pimanyisa Jehova. Jesu i wulile lezi: ‘Papai wa nzi ranza.’ Wa zi tiva a ku hikuyini Nungungulu a ranzako Jesu niku hikuyini hinawu hi faneleko ku ranza Jesu? — Hi ku Jesu i ti nyikele hi kuziranza lezaku afa kasi a kuranza ka Nungungulu ku maheka. (Johani 10:17) Hikwalaho, hi fanele ku maha lezi a Biblia gi hi byelako ku maha. Gi ngalo: “Mahani vapimanyisi va Nungungulu, khwatsi hi vanana va ranzekako, mu famba hi liranzo kota lezi Kristu a nga mu ranza, a ti nyikela hi kota ya hina.” — Va Le Efesusi 5:1, 2.