Xingheniso

NUNGUNGULU WA NTAMU-WONTLHE i Nwinyi wa xirenzelekwani xa tiko. A wutomi ga hina, xikhatini lexi ni lexi xi tako, gi khegela ka yena. Yena i na ni ntamu wa ku chachazela ni ntamu wa ku tsayisa. I na ni ntamu wa ku nyika wutomi ni ntamu wa ku susa wutomi. Loku hi amukeleka ka yena, hi ta humelela; loku hi nga amukeleki, zilo zi nga ta hi humela khwatsi. Za lisima nguvu aku a wukhozeli ga hina gi vumeleka ka yena!

Vanhu va khozela hi tindlela ti tsalangeneko. Loku a wukhongeli gi kota ndlela, xana gontlhe wukhongeli ga amukeleka ka Nungungulu? Ahihi, a gi amukeleki. Jesu, muprofeti wa Nungungulu, i kombile lezaku ku na ni tindlela timbiri ntsena. Yena i te ngalo: “A nyangwa yi yako kulobyisweni yi anamile, ni ndlela yi komamako kona yi kulile; mbanyingi va fambako ha yona. Kanilezi a nyangwa ya wutomi yi hlonganile, ni ndlela yi yako kona yi khumile, mbatsongwani lava va yi kumako.” — Mateu 7:13, 14.

Ku na ni tixaka timbiri ntsena ta wukhongeli: legi gi yisako wutomini ni legi gi yisako kulobyisweni. A khungo ga broxura legi hi ku ku vuna a ku kuma ndlela yi yisako wutomini ga pinzukelwa.