Xana zi nene a kulwa?

WA TIVA vafana kutani vanhanyana vo kari va ranzako ku ti maha va lisima nguvu kutani va wulako lezaku va na ni ntamu nguvu? — Wa zi ranza ku tshama ni vanhu vo fana ni lavo? Kutani u ranza ku tshama ni munhu wa mu nene ni wo rula? — Mugonzisi wa Hombe i te ngalo: “Va tsaka lava va hlotako kurula, hakuva va ta vitanwa vana va Nungungulu.” — Mateu 5:9, NM.

Kanilezi, ka zikhati zinwani a vanhu vanwani va maha zilo zi hi zangarisako. A hi lisine lezo? — Kuzilava hi nga ha lava ku phota. Lezo zi humelele a vapizani va Jesu a xikhati lexi va nga kari va enza zinwe naye na vaya Jerusalema. Nyima nzi ku byela lezi zi nga humelela.

Laha va nga fambile a pfhuka wa hombe, Jesu i lo rumela a vapizani vo kari lezaku va ranga va ya lava wutshamu ga ku humula kona ka doropa ga Samaria. Kanilezi, a vaSamaria a va vumelangi hakuva va wa hi ni wukhongeli go hambana ni ga vona. Niku va wa nga mu tsakeli a munhu loyi a ngaya Jerusalema kasi ku ya khozela.

Loku va wa no alela wena, na u mahile yini? Na u zangarile u tlhela u lava ku phota? — Hi zalezo Jakobe na Johani, a vapizani va Jesu, va nga lava ku maha. Va lo byela Jesu vaku: ‘Wa zi lava ku hi laya nzilo wu relela hi le tilweni, wu ta va lovisa ke?’ Kanilezi, Jesu i lo va byela lezaku zi wa nga hi zi nene a ku va mahela lezo vanwani. — Luka 9:51-56.

Lisine lezaku ka zikhati zinwani a vanhu va nga hi mahela zilo zo biha. A vanana vanwani va nga tshuka va nga zi lavi a ku hlakana na hina. Va nga ha wula lezi: “A hi zi lavi ku hlakana na wena.” Loku a zilo zo fana ni lezo zi hi humelela, hi nga bayiseka, a hi zona? Hi nga lava ku phota. Kanilezi, hi fanele ku phota? —

Teka a Biblia ga wena. A hi vulule a bhuku ga Mavingu xipimo 24, a vesi ga 29. Hi gonza lezi: “U nga wuli lezaku, nzi ta maha kakwe khwatsi hi lezi a nga maha ka mina, nzi ta tlhelisela munhu khwatsi hi mitiro yakwe.”

U alakanya lezaku a vesi legi gi lava ku wula yini? — Gi hi byela lezaku a hi faneli ku phota. A hi faneli ku phota kutani ku mahela kubiha vanwani hi kota ya lezi va hi maheleko. Kanilezi, ahati loku a wokari a ranga a ku vuka na a lava lezaku mulwa ke? A nga ha zama ku u zangara hi ku ku vitana hi mavito yo swara. A nga ha ku hleka a wula lezaku wa chava a tlhela aku u na ni wutoya. U fanele ku maha yini? Xana u fanele kulwa naye? —

A hi tlhele hi wona kambe lezi a Biblia gi zi wulako. Vulula bhuku ga Mateu xipimo 5, a vesi ga 39. Ka vesi legi Jesu ite: “Mu nga tsimbeteli loyi wa kubiha; kanilezi kani hi mani a ku phakatako a rama ga xinene, hunzuluka u mu nyika ginwani kambe.” U alakanya lezaku Jesu i wa lava ku wula yini? Xana i wa lava ku wula lezaku loku a wokari a kuba pama laha ka rama u fanele ku mu nyika a rama legi ginwani? —

Ahihi, Jesu i wa nga wuli lezo. A pama a yi fani ni xibhakela. Yi nga fana ni ku nikinya munhu. A munhu a nga hiba pama na a lava ku hilwa naye. A munhu loye i lava a ku hi zangara. Ahati loku hi zangara zonake hi mu nikinyawu, zini zi to humelela? — Kuzilava hi nga ha sangula kulwa.

Kanilezi, Jesu i wa nga lavi lezaku a valanzeli vakwe valwa. Hi zalezo zi nga mu maha a wula lezaku loku a munhu a hiba pama, a hi faneli ku phota. A hi faneli ku zangara hi sangula kulwa. Loku hi maha lezo, hi komba lezaku hi fana ni munhu loye a nga ranga a hi vuka kasi hi sangula kulwa.

Loku ku sangula tiholova, u alakanya lezaku i chukwana ku maha yini? — I chukwana ku suka u famba. A munhu wo kari a nga ha ku nikinyetela makhati yo tala. Kanilezi, i ta gumesa a ku tsika. Loku u suka u famba, a zi wuli ku a wu na ntamu. Zi wula a ku u tiyile, u ti yimisele ku maha lezi zi lulamileko.

Kanilezi, ahati loku u sangula kulwa zonake u mu hlula loyi u lwako naye? Zini zi nga humelelako anzhako ka lezo? — Loyi u nga mu hlula a nga tshuka a wuya ni vanghana vakwe. Kuzilava va ta kuba hi nhonga va ku bayisa kutani va ku tlhava hi mukwana. Makunu wa zi wona a ku hikuyini Jesu a kalako a nga zi lavi a ku hilwa? —

Zini hi faneleko ku maha loku hi wona vanhu na valwa? Hi fanele ku seketela munwe wabye? — A Biblia gi hi byela lezi zi nga zi nene. Vulula a bhuku ga Mavingu xipimo 26, vesi ga 17. Gi ngalo: “A muhunzi loyi a ti enghenisako timholoveni, na ti nga mu henyi, i fanana ni loyi a khomako a mbyana hi tindleve.”

Ku nga humelela yini loku u khoma mbyana hi tindleve? U wa ta yi bayisa, niku yonawu yi wa ta ku luma, a hi zona? Laha a mbyana yi yako yi zama ku chukula, ku wa ta laveka lezaku u khoma tindleve ta yona zi tiya, niku yonawu yi wa ta engetela ku zangara. Loku u yi tsika, kuzilava yi wa ta ku luma. Kanilezi, u wa ta zi kota a ku tshama na u khometele tindleve ta yona kala kupinzuka? —

Hi wa tava ni zikarato zo fana ni lezo loku hi wo ti nghenisela ka tiholova ta vanwani. Za koteka ku hi nga mu tivi loyi a nga ranga a vuka munghana kutani ku va lwela yini. Kuzilava loyi a biwako i no yiva zilo za vambe. Loku hi mu vuna, hi tava na hi vuna khamba. Lezo zi wa nga tava zi nene, a hi zona?

Makunu, zini u faneleko ku maha loku u wona vanhu na valwa? — Loku ku hi le xikoleni tekela ku tsutsuma u ya byela mugonzisi. Loku ku hi kule ni le xikoleni, u nga ha vitana vapswali va wena kutani phoyisa. Hi lisine, hambu loku a vanhu va lava kulwa na hina, hi fanele kuva vo rula.

A vapizani va lisine va Jesu va maha zontlhe va zi kotako kasi va potsa kulwa. Hi ndlela leyo, hi komba lezaku hi na ni ntamu wa ku maha za kululama. A Biblia gi wula lezaku a mupizani wa Jesu ‘a nga faneli kulwa, kanilezi i fanele kuva wo rula ka vontlhe.’ — 2 Timote 2:24.