Xana xontlhe xikhati u lava kuva wo sangula?

I KONA u mu tivako loyi xontlhe xikhati a lavako kuva wo sangula? — Kuzilava a nga nikinya munwani kasi ava wo sangula laha bhixeni. Wa tshuka u zi wona na zi maheka lezo? — Mugonzisi wa Hombe i wonile ni vanhu va hombe na va zama ku kuma zitshamu zo sangula, kutani lezi za lisima nguvu. Kanilezi a zi mu tsakisangi. A hi wone lezi zi nga maheka.

A Biblia gi hi byela lezaku Jesu i wa rambilwe ka mubuzo wa hombe laha mutini wa muFarisi, loyi a nga hi murangeli wa wukhongeli. Loku a chikele, Jesu i lo sangula ku wona vapfhumba vanwani na va hlawula matshamu ya lisima. Hikwalaho, i lo hlawutela mufananiso ka lava va nga rambilwe. Wa zi lava ku wuzwa? —

Jesu ite: ‘Loku a wokari a ku ramba ka mubuzo wa muchado, u nga hlawule wutshamu ga le mahlweni kutani ga lisima.’ Wa zi tiva a ku hikuyini Jesu a wulileko lezo? — Jesu i lo tlhamusela lezaku ku nga tshuka ku rambilwe munhu wo kari wa lisima nguvu. Makunu, kota lezi u zi wonako laha ka mufota lowu, a nwinyi wa mubuzo a nga hata a taku: ‘Mu nyike wutshamu legi a munhu loyi, wena famba u ya tshama lahaya.’ Makunu a munhu loye a susiwako i wa ta ti zwisa kuyini? — I wa tawa tingana hakuva vontlhe va rambilweko va wa ta mu cuwukisela na aya ka wutshamu ga lahasi.

Jesu i wa komba lezaku a hi zi nene a ku ranza ku kuma wutshamu ga gi nene nguvu. Hikwalaho, i te ngalo: ‘Loku u rambilwe ka mubuzo wa muchado tshama ka xitshamu xa lenzhako. Loyi a ku rambileko i ta ku wona kuzilava ata a taku: Munghana yana hi le mahlweni. Zonake, u ta kuma wudzunzo mahlweni ka vontlhe lava va rambilweko a xikhati lexi u yako ka wutshamu ga gi nene.’ — Luka 14:1, 7-11.

U zi zwisisile lezi a mufananiso wa Jesu wu wulako zona? — Nzi ta nyika xikombiso kasi ku wona lezaku u zi zwisisile ke. Alakanya ku ngha u rumilwe ku ya xava zilo zonake u ya kuma bhixa ya hombe. Xana zi wa tava zi nene lezaku u rangela vanwani kasi u maha wo sangula? — Jesu i wa ta tsaka loku u maha lezo?

A wokari a nga ha wula lezaku Jesu a nga na mhaka ni lezi hi zi mahako. Wa zi kholwa lezo? — A xikhati lexi Jesu a nga hi mubuzweni le kaya ka muFarisi, i lo yima a cuwukisela vanhu na va hlawula ka ku tshama kona. Lezo zi komba lezaku Jesu wa khatala hi lezi hi zi mahako inyamutlha, a hi zona? — Zalezi Jesu a nga le tilweni, hi lisine hi kona a hi wonako khwatsi.

Loku a wokari a zama kuva wo sangula, zi nga vanga zikarato. A kutala ka zikhati a vanhu va sangula ku holovisana zonake va zangara. Lezo za tshuka zi humelela a xikhati lexi a vanana va yako va ya xava zilo ka wutshamu gi talako hi vanhu. Zalezo va chikelako va tekela ku hunza vontlhe, kasi va maha vo sangula. Zini zi tolovelako ku humelela hi kota ya lezo? — Hi zona, va tolovela ku holova ni ku zangarisana.

A ku lava kuva wo sangula zi nga ha vanga zikarato za hombe. Lezo zi zile zi vanga xikarato xikari ka vapostoli va Jesu. Kota lezi hi zi wonileko ka xipimo 6 xa bhuku legi, ku vukile kukanetisana xikari kabye xungetano hi loyi a nga hi wa hombe. Zini lezi Jesu a nga maha? — Hi zona, i lo va kawuka. Kanilezi, hi nzhako ka xikhati va lo tlhela va kanetisana kambe. A hi wone lezi zi nga sangulisa zona.

A vapostoli, ni vanwani vanhu va wa kari va enza zinwe na Jesu vaya doropeni ga Jerusalema hi khati go gumesa. Jesu i wa wulawulile navo xungetano hi Mufumo wakwe. Hikwalaho, Jakobe na Johani va wa lava ku fuma na Jesu kota tihosi. Makunu, va lo bhula ni mamani wabye Salome xungetano hi mhaka leyo. (Mateu 27:56; Marku 15:40) Makunu, laha va nga hi ndleleni ya kuya Jerusalema, Salome i loya ka Jesu, a ya mu khizamela, a kombela ku mahelwa wuxinji.

Jesu i lo mu wutisa aku: “U lava yini ke?” I lo hlamula lezaku i lava ku Jesu a tshama ni vana vakwe kusuhani naye le Mufunweni wakwe, a munwe a mu veka ka tlhelo ga xinene loyi munwani a mu veka ka tlhelo ga xibhabha. U alakanya lezaku a vapostoli lava va khume va ti zwisile kuyini a xikhati lexi va nga zi tiva lezi Jakobe na Johani va nga byelile a mamani wabye lezaku a ya kombela? —

Ina, va lo zangarela Jakobe na Johani. Hikwalaho, Jesu i lo va nyika wusungukati ga gi nene a vapostoli vakwe vontlhe. Jesu i lo va byela lezaku a vafumeli va tiko va ranza kuva va hombe ni va lisima nguvu. Va lava kuva ni zikhundla zo tlakuka kasi a vanhu vontlhe va va ingisa. Kanilezi, Jesu i lo byela vapizani vakwe lezaku a va faneli kuva vanhu va tshamela lego. Wutshanwini ga lezo, Jesu ite: ‘Loyi a lavako kuva wahombe xikari ka nwina ngha a maha nanza ga nwina.’ Hi nga zi alakanyela! — Mateu 20:20-28.

Wa wu tiva a ntiro wa nanza? — A ntiro wa gona ku tirela vanwani, na gi nga rinzeli lezaku a vanwani va gi tirela. Gi tshama ka wutshamu ga lahasi nguvu, na ku nga hi ga le mahlweni. Gi ti wona kota ga lahasi, a gi ti woni na gi hi ga lisima. Niku alakanya ku Jesu i wulile lezaku loyi a lavako kuva wa hombe i fanele ku tirela vanwani.

Makunu u alakanya lezaku lezo zi wula yini ka hina? — U alakanya lezaku a nanza gi wa ta kanetisana ni hosi ya gona xungetano hi lezaku himani a to tshama ka xitshamu xa lisima? Kutani ku kanetisana hi lezaku himani a to ranga aga? U zi wonisa kuyini? — Jesu i wulile lezaku xontlhe xikhati a nanza gi wona a hosi ya gona kota ya lisima ka gona. — Luka 17:7-10.

Makunu, wutshanwini ga ku zama kuva vo sangula, zini hi faneleko ku maha? — Ina, hi fanele ku tirela vanwani. Niku lezo zi wula ku rangisa vanwani. Zi tlhela zi wula ku wona vanwani na va hi va lisima a ku hunza hina. Wa alakanya a tindlela to kari ta ku tirela vanwani? — A hi tlhele hi wona maphajina 40 ni 41 ya bhuku legi, kasi hi wona a tindlela to kari ta ku tirela vanwani.

U nga rivakelwi lezaku Mugonzisi wa Hombe i wa rangisa vanwani hi ku va tirela. Ka wusiku go gumesa a nga hanya ni vapostoli vakwe, i zile a va hlambisa mikonzo yabye. Loku hinawu hi rangisa vanwani hi ku va tirela, hi ta tsakisa Mugonzisi wa Hombe ni Papai wakwe, Jehova Nungungulu.