Mugonzisi wa Hombe i wa tirela vanwani

WA TSAKA loku a munwani a ku mahela zilo za zi nene? — A vanwani vonawu va tsaka loku va mahelwa za zi nene. Hi lisine, hontlheni ha tsaka. Mugonzisi wa Hombe i wa zi tiva lezo, niku xontlhe xikhati i wa va mahela zilo a vanwani. I naku: ‘A nzi telangi ku ta tirelwa, kanilezi nzi tele ku ta tirela’ vanwani. — Mateu 20:28.

Makunu loku hi lava ku fana ni Mugonzisi wa Hombe, zini hi faneleko ku maha? — Hi fanele ku tirela vanwani. Hi fanele ku va mahela za zi nene. A lisine hi lezaku a vanhu vo tala a va mahi lezo. Xontlhe xikhati va lava ku tirelwa. Ka khati go kari hambu a vapizani va Jesu va ti zwisile zalezo. A munwe ni munwani wabye i wa lava kuva wahombe kutani kuva wa lisima ku hunza vanwani.

Ka siku go kari, Jesu i wa kari a enza ni vapizani vakwe. Anzhako ka kuva va chikele ka doropa ga Kapernaume, kusuhani ni Bimbi ga Galilea, va lo nghena ka yindlu yo kari. Na va hi lomo, Jesu i lo va maha xiwutiso lexi: “Mu wa kanetisana hi yini laha ndleleni ke?” Va lo miyela vaku hwi; hakuva lomu ndleleni va wa kari va kanetisana lezaku hi mani wahombe xikari kabye. — Marku 9:33, 34.

Jesu i wa zi tiva lezaku zi wa nga lulamangi a ku a munwe wa vapizani vakwe a alakanya lezaku wahombe ku hunza vanwani. Hikwalaho, i lo yimisa a nwanana wa mu tsongwani xikari kabye a va byela lezaku va wa fanele ku ti koramisa a ku fana ni nwanana gayani, kota lezi hi gonzileko ka xipimo xo sangula xa bhuku legi. Kanilezi, a va gonzangi nchumu. Hi kota ya lezo, na ku kiyela xikhati xi tsongwani lezaku a dawa, Jesu i lo va gonzisa xigonzo lexi va nga wa ta kala va nga xi rivakelwi. Zini a nga maha? — 

Laha va nga hi zinwe na va lava kuga, Jesu i lo suka a yima laha mezeni a tlhatlha nguwo yakwe ya lahandle. I lo teka thawula a ti boha lomu xiwunwini, a gumesa a teka a basiya a chela mati. Za koteka ku ngha a vapizani vakwe va hlamele va lava ku tiva a ku zini a nga lava ku maha. Laha va nga kari va mu cuwukisela, Jesu i loya ka munwe ni munwani wabye a ya khizama, a mu hlambisa mikonzo. Zonake a teka thawula a sula mikonzo yabye. Hi nga zi alakanyela! Ahati loku wenawu u wa hi kwalaho, na u ti zwisile kuyini? — 

A valanzeli vakwe a va zi wonangi na zi lulamile a kuva Mugonzisi wa Hombe a va tirela hi ndlela leyo. Va lo dana. Hi lisine, Pedro i rangile hi ku ala a ku tsika Jesu a mu mahela ntiro lowo wa lahasi. Kanilezi Jesu i lo mu byela lezaku zi wa hi za lisima a kuva a maha ntiro lowo.

Inyamutlha, a zi tolovelekangi a kuva hi hlambisana mikonzo. Hambulezo, a xikhati lexi Jesu a nga hi laha misaveni zi wa mahiwa. Wa zi tiva a ku hikuyini? — Ka tiko legi Jesu ni vapizani vakwe va nga hanya ka gona, a vanhu va wa famba hi masandalia na va nga rangisangi timeya. Hikwalaho, loku va famba hi maruwa ya lithuri, a mikonzo yabye yi wa tala hi chaka. Yi wa hi ndlela ya ku kombisa wunene a ku hlambisa mikonzo ya mupfhumba.

Kanilezi, ka khati legi i hava xikari ka vapizani va Jesu a nga ti nyikele kasi ku hlambisa mikonzo ya vanwani. Hikwalaho, Jesu wutsumbu i lo va hlambisa. Hi ku maha lezo, Jesu i lo gonzisa valanzeli vakwe a nchumu wa lisima. Va wa fanele ku gonza a nchumu lowo. Niku na hina inyamutlha hi fanele ku wu gonzawu.

Wa wu tiva a ku i nchumu muni? — Anzhako ka kuva Jesu a bohile nguwo yakwe ni loku a tlhelile laha a nga tshamile kona, i lo tlhamusela lezi: “Ma zi tiva lezi nzi mu maheleko zona ke? Mu nzi vitana muku: Mugonzisi, ni Hosi; mu wula zona, hakuva hi mina yena. Makunu loku mina nzi nga Hosi ni Mugonzisi, nzi mu hlambisile mikonzo, na nwinawu mu fanele ku hlambisana mikonzo.” — Johani 13:2-14.

Hi magezu lawa, Mugonzisi wa Hombe i kombile ku i lava lezaku a valanzeli vakwe va tirelana. I wa nga lavi lezaku va ti alakanyela ga vona ntsena. Ne i wa nga lavi lezaku va alakanya ku va wa hi va lisima nguvu laha kaku va rinzela lezaku xontlhe xikhati va tirelwa hi vanwani. I wa lava lezaku va tsakela ku tirela vanwani.

Xana lexo xi wa nga hi xigonzo xa lisima? — U ta fana na Mugonzisi wa Hombe, u tirela vanwani ke? — Hontlheni hi nga va mahela zilo a vanwani. Lezo zi ta va tsakisa. Kanilezi, a xa xi nene nguvu ka zontlhe, hi lezaku zi ta tsakisa Jesu ni Papai wakwe.

A ku tirela vanwani a zi karati. Loku u cuwuka khwatsi, u ta wona zilo zo tala lezi u nga mahelako vanwani. Alakanyela lezi: Ku na ni zilo zo kari u nga mahako kasi ku vuna mamani wa wena? Wa zi tiva lezaku i maha zilo zo tala zi vunako wena ni vontlhe laha kaya. U nga mu vuna ku maha mitiro leyo? — Mu wutisi a ku: Mama nzi ku vuna a ku maha yini?

Kuzilava u nga longisela a meza loku mu lava kuga zakuga. Kutani ku suselela a mingelo ya chaka laha mezeni loku mu mbhetile kuga. A vanana vanwani mixo ni mixo va wola chaka va ya hoxa. Zontlhe lezi u nga zi mahako, u va u tirela vanwani, kota lezi Jesu a nga maha.

U na ni tinzisana leti u nga ti tirelako? Alakanya lezaku Jesu, Mugonzisi wa Hombe, i wa tirela vanwani hambu ni valanzeli vakwe. Loku u tirela a tinzisana ta wena, u tava na u pimanyisa Jesu. Zini u nga va mahelako? — Kuzilava u nga va vuna ku tiva ku susa lezi va hlakanako hi zona loku va mbhetile ku hlakana. Kutani ku va boha tinguwo, ni ku va vuna ku petsa mikumba loku va vuka. Wa alakanya zinwani u nga va mahelako? —  Loku u va mahela zilo lezo va ta ku ranza, a ku fana ni lezi a valanzeli va Jesu va nga mu ranza.

Le xikoleni kambe u nga tirela vanwani. U nga tirela lava u gonzako navo kutani a mugonzisi wa wena. Loku a wokari a wisa bhuku, zi ngava zi nene a ku rola u mu nyiketa. U nga tirela a mugonzisi wa wena hi ku ti nyikela lezaku u basisa a kwadru legi a tsalelako ka gona kutani ku mu mahela a zilo zinwani. Hambu ku mu lomba a lapizera kutani lapi a munhu munwani; lezo zonawu zi kombisa wunene.

Ka zikhati zinwani, u ta wona lezaku a vanhu va nga ta hi bonga hi lezi hi va mahelako. U alakanya lezaku lezo zi fanele ku hi tsikisa ku maha zilo za zi nene? — Ahihi! A vanhu vo tala a va mu bongangi Jesu hi zilo za zi nene lezi a nga va mahela. Kanilezi, lezo a zi mu tsikisangi ku maha za zi nene.

Hikwalaho, hi nga tsiki ku tirela vanwani. Xontlhe xikhati alakanya Jesu, Mugonzisi wa Hombe, u tlhela u zama ku pimanyisa a xikombiso xakwe.