Hikuyini Jesu a vileko Mugonzisi wa Hombe?

KA XIPIMO xa 2.000 wa malembe ma hunzileko ku lo pswaliwa nwanana wo hlawuleka nguvu, loyi a nga kula a maha wanuna wahombe ku hunza vontlhe va hanyileko misaveni. Ka xikhati lexo a ku na munhu a nga enza hi xihaha-pfhuka kutani mova. Ku wa nga hi na zilo zo kota televizawu, makomputadori, Internet kutani radu.

A n’wana loye i lo chuliwa ku hi Jesu. I lo maha wanuna wo tlhariha nguvu ku hunza vontlhe va tshukileko va hanya misaveni. Jesu kambe i lova mugonzisi wa mu nene. I wa zi kota ku tlhamusela a zilo zo karata hi ndlela ya kuva zi nga karati ku zi zwisisa.

Jesu i wa gonzisa vanhu kontlhe lomu a nga va kuma kona. I wa va gonzisa lomu mabimbini, lomu ka tingalava, lomu mitini ni lomu kuenzeni. Jesu i wa nga hi na mova, a nga tshukangi a enza hi xibhomba kutani xitimela. Jesu i wa famba hi milenge kontlhe lomu a nga fambafamba a gonzisa vanhu.

Hi nga gonza zilo zo tala ka vanwani. Kanilezi, hi nga gonza zilo za lisima nguvu ka Mugonzisi wa Hombe, Jesu. A magezu yakwe ma kumeka lomu ka Biblia. A xikhati lexi hi zwako a magezu lawo lomu ka Biblia, zi fana ni loku Jesu a wulawula na hina.

Hikuyini Jesu a vileko Mugonzisi wa Hombe? A xinwe xa zigelo hi lezaku Jesu wutsumbu i wa gonzisilwe hi wokari, niku i wa li tiva a lisima la ku ingisa. Jesu i wa ingisa mani? I gonzisilwe himani? — Hi zona, hi Papai wakwe. Niku a Papai wakwe hi Nungungulu.

Na a nga seta laha misaveni kota munhu wa nyama, Jesu i hanyile le tilweni na Nungungulu. Hikwalaho, Jesu i wa hambene ni vanhu vanwani hakuva a ku na munhu munwani a hanyileko le tilweni na a nga se pswaliwa laha misaveni. Le tilweni Jesu i wa hi N’wana wa mu nene, loyi a nga ingisa a Papai wakwe. Hikwalaho, Jesu i wa zi kota ku gonzisa vanhu lezi a nga gonzisilwe hi Nungungulu. Loku u ingisa a papai wa wena ni mamani wa wena, u pimanyisa Jesu.

A xigelo xinwani xa kuva Jesu a vile Mugonzisi wa Hombe hi lezaku i wa ranza vanhu. I wa lava ku vuna vanhu lezaku va tiva Nungungulu. Jesu i wa ranza a vanhu va hombe, kanilezi i wa ranza ni vanana kambe. A vanana vonawu va wa zi tsakela nguvu a kuva zinwe na Jesu hakuva i wa bhula navo a tlhela a va ingisela.

Ka siku go kari, a vapswali vo kari va lo neha a vanana vabye ka Jesu. Kanilezi, a vanghana va Jesu va lo alakanya lezaku Mugonzisi wa Hombe i wa khomekile nguvu. Hi ndlela leyo va alakanya lezaku i wa nga ta zi kota a ku wulawula ni vanana. Hikwalaho, a vanghana va Jesu va lo byela a vapswali lezaku va famba ni vanana vabye. Wa zi tiva lezi Jesu a nga wula? —  I te ngalo: “Vumelani a vanana a kuta ka mina, mu nga va beleteli.” Kunene, Jesu i wa lava lezaku a vanana vata kakwe. Hikwalaho, hambu lezi Jesu a nga hi wanuna wa lisima ni wo tlhariha nguvu, i lo mbheta xikhati na a gonzisa a vanana va va tsongwani. — Marku 10:13, 14.

Wa zi tiva a ku hikuyini Jesu a gonzisileko vanana a tlhela a va ingisela? Xo sangula, i wa lava lezaku va tsaka hi kuva a va gonzisa zokari xungetano hi Nungungulu, a Papai wakwe wa le tilweni. U nga maha yini wena kasi a vanhu va tsaka? — U nga va gonzisa zilo lezi u zi gonzileko xungetano hi Nungungulu.

Ka khati go kari, Jesu i tirisile a nwanana wa mu tsongwani kasi ku gonzisa a vanghana vakwe a nchumu wa lisima. I lo teka nwanana a mu yimisa xikari ka vapizani vakwe. Hi kulanzela, Jesu i lo wula lezaku a vanhu lavo va hombe va wa fanele ku cica mawonela yabye va fana ni nwanana loye wa mu tsongwani.

Kasi Jesu i wa lava ku wula yini? Wa zi tiva lezi a munhu wa hombe, kutani a nwanana wa hombana, a nga mahako kasi a fana ni nwanana wa mu tsongwani? — A nwanana wa mu tsongwani a nga tivi zotala a ku fana ni munhu wa hombe niku wa zi lava nguvu a ku gonza. Hikwalaho, Jesu i wa wula lezaku a vapizani vakwe va wa fanele kutikoramisa, a ku fana ni vanana. Ina, hontlheni hi nga gonza zilo zo tala ka vanwani. Niku hi fanele ku tiva lezaku lezi Jesu a nga zi gonzisa za lisima nguvu a ku hunza mawonela ya hina. — Mateu 18:1-5.

A xigelo xinwani xa kuva Jesu a vile Mugonzisi wa Hombe, hi lezaku i wa zi tiva ku maha zilo zi tsakisako vanhu. I wa tlhamusela zilo hi ndlela yo olova. I wulawulile hi tinyanyani, zitsangi ni zilo zinwani zo toloveleka kasi ku vuna vanhu lezaku va zwisisa zilo zo kari xungetano hi Nungungulu hi ndlela yo olova.

Ka siku go kari, laha Jesu a nga hi ka xitsunga xo kari, ku lota vanhu vo tala laha a nga hi kona. Jesu i lo tshama hasi, a kanela kabye, kota lezi u zi wonako laha ka mufota. A kanelo leyi yi vitanwa ku i Kanelo ya le Xitsungeni. I te ngalo: ‘Cuwukani khwatsi a tinyanyani ta tilo: A ti byali, a ti tshoveli, a ti hlengeleteli nchumu ka wutshamu go hlengeletela zakuga; kanilezi a Raru wa nwina wa le tilweni wa ti phamela. A mu ti hunzi nguvu ke?’

Jesu i tlhelile aku: ‘Gonzani zokari ka makhon’wa ya lomu khwatini, lezaku ma kulisa kuyini; a ma tiri, hambu ni ku luka; kanilezi nziku ka nwina, hambu Solomoni hi wukosi gakwe gontlhe a nga ambalangi kota ginwe ga wona. Loku Nungungulu a ambexisa lezo a byanyi ga lomu khwatini, xana a nga ta mu khatalela nwinawo ke?’ — Mateu 6:25-33.

U zi zwisisile lezi Jesu a nga kari a gonzisa? — I wa nga lavi lezaku hi karateka hiku hi ta zi kuma kwihi zakuga kutani tinguwo ta ku ambala. Nungungulu wa zi tiva lezaku ha zi lava zontlhe lezo. Jesu a nga wulangi lezaku a hi faneli ku tira kasi hi kuma zakuga ni tinguwo. Kanilezi, i wulile lezaku hi fanele ku rangisa Nungungulu. Loku hi maha lezo, Nungungulu i ta vulula tindlela ta ku hi kuma zakuga ni tinguwo ta ku ambala. Wa zi kholwa lezo? — 

A xikhati lexi Jesu a nga gumesa ku wulawula, xana a vanhu va ti zwisile kuyini? —  A Biblia gi wula lezaku va lo hlamala nguvu hi magonzisela yakwe. Zi wa tsakisa nguvu a ku mu ingisela. Lezi a zi wulileko zi vunile vanhu lezaku va maha a zilo zi lulamileko. — Mateu 7:28.

Hikwalaho, za lisima nguvu a ku hi gonza ka Jesu. Wa zi tiva a ku hi nga zi mahisa kuyini? — A magezu yakwe ma tsalilwe lomu ka bhuku go kari. Wa gi tiva a ku i bhuku muni galego? — I Biblia go Basa. Lezo zi wula ku hi ngazwa Jesu na a wulawula hi ku chela kota hi lezi hi zi lerako lomu ka Biblia. Hi lisine, a Biblia gi na ni matimu yo tsakisa ma wulawulako hi Nungungulu na a hi byela lezaku hi ingisa Jesu. A hi wone lezi zi nga maheka.

Ka siku go kari, Jesu i lo teka a vanghana vakwe va vanharu a famba navo le hehla ka xitsunga xo kari. A mavito yabye hi Jakobe, Johani, na Pedro. Hi kufamba ka xikhati, hi ta tiva zotala hi vavanuna lava, hakuva vontlhe va vanharu va wa hi vanghana va hombe va Jesu. Kanilezi, ka ximaho lexi xo hlawuleka, a nghohe ya Jesu yi lo sangula ku hatima. Niku a tinguwo takwe ti lo ngangamela a ku fana ni gambo, kota lezi u zi wonako laha ka mufota.

Anzhako ka lezo, Jesu ni vanghana vakwe va lozwa a gezu na gi huma hi le tilweni. Giku: “Loyi hi Nwananga a ranzekako, nzi xaleleko ha yena; mu ingiseni.” (Mateu 17:1-5) Wa zi tiva ku gi wa hi gezu ga mani? — Gi wa hi gezu ga Nungungulu! Kunene, ku wa hi Nungungulu a nga wula lezaku va fanele ku ingisa N’wana wakwe.

Ahati hina inyamutlha ke? Hi ta maha lezi Nungungulu a hi byelako, hi ingisela N’wana wakwe, a Mugonzisi wa Hombe? — Lezo hi lezi hontlheni hi faneleko ku maha. Wa ha zi alakanya a ku hi nga zi mahisa kuyini? — 

Hi nga ingisela a N’wana wa Nungungulu hi ku lera a matimu ya wutomi gakwe lomu ka Biblia. Lomu ka Biblia ku na ni zilo zo tala za zi nene lezi Mugonzisi wa Hombe a lavako ku hi byela. U ta tsaka nguvu hi ku gonza a zilo lezo zi tsalilweko lomu ka Biblia. Niku u ta xalala nguvu hi ku bhulela vanghana va wena a zilo za zi nene lezi u gonzako.