Zini lezi a vanana va zi lavako ka vapswali vabye?

A KUVA mupswali, zi wula ku maha xipanze ka zilo lezi a vanhu va kalako va nga se zi zwisisa khwatsi kala nyamutlha. Vontlhe va vambiri va patseka kasi ku pswaliwa munhu, loyi a rangako hi ku kula lomu nzeni ka mamani wakwe. Hi xigelo lexo, a zi hlamalisi lezi a vanhu va tolovelako ku loku ku pswaliwa n’wana, va vitana a ximaho lexo kota “xihlamaliso xa kupswaliwa ka munhu.”

Kunene, a ku pswala n’wana, masangulo ntsena ya ntiro wa kuva mupswali. Kusanguleni, kasi a xinwanana xi hanya, xi lava ku vuniwa hi vapswali va xona kutani vanhu vanwani va hombe. Kanilezi, laha xi kulako xi lava zo hunza ku hlayisiwa hi tlhelo ga nyama. Xi lava ku vuniwa lezaku xi kula hi tlhelo ga mahanyela, ga moya, kupima ni kutizwa ka xona.

Kasi va kula khwatsi, a vanana va lava nguvu a ku wona lezaku va ranziwa hi vapswali vabye. Hambu lezi zi nga za lisima a ku va byela lezaku va va ranza, a vapswali va fanele ku zi kombisa hi mitiro. Ina, a vanana va lava xikombiso xi nene xa vapswali vabye. Va lava ku nyikiwa milayo ya mahanyela, ni matshinya ya milayo lawa va faneleko ku hanya hi wona. Niku va lava zilo lezo kusukela wunwananeni gabye. Loku a vapswali va rinzela lezaku kala a vana vabye va kula, ku ngava ni wuyelo go biha nguvu.

A matshinya ya ma nene ku hunza wontlhe ma nga kona, hi lawa ma nga lomu ka Biblia. A ku gonzisa vana hi ku tirisa milayo ya Biblia, zi na ni mabhinzu ya hombe nguvu. A ginwe ga mabhinzu lawo, hi lezaku a vanana va ta zi wona a ku lezi va gonzisiwako, a hi zilo zi laviwako hi munhu, kanilezi hi lezi a Muvangi wabye, a Papai wabye wa le tilweni a zi lavako. Lezo zi maha lezaku a wusungukati lego va nyikiwako giva ni ntamu wa hombe.

A Biblia gi kuca vapswali lezaku va ti karata nguvu kasi ku vuna vana vabye a ku zwisisa a lisima la matshinya ya milayo ya Biblia, va ma alakanya va tlhela va hanya hi wona. Hambulezo, laha a vanana va kulako, a kutala ka zikhati a vapswali za va karatela a ku bhula ni vana vabye, nguvunguvu hi timhaka ta lisima nguvu. A bhuku legi; Gonza ka Mugonzisi wa Hombe, gi mahelwe ku vuna vapswali kasi lezo zi nga humeleli. Ka bhuku legi, u ta kuma mahungu yo lerela a vana va wena, lawa ma to tiyisa a kuzwanana ka vona na Nungungulu. A ku hunza zontlhe lezo, a bhuku legi gi fanele ku kuca ni ku vulula ndlela ya lezaku kuva ni mabhulo xikari ka vanana ni lava va va lerelako.

U ta wona lezaku a bhuku legi gi kuca a vanana lezaku vonawu va wula xokari. Ka xipimo xinwe ni xinwani, ku na ni ziwutiso zi mahilweko khwatsi, zi gumesako hi xinzhatana. Loku u chikela ka xiwutiso lexo, u ta wona a xinzhatana xo fana ni lexi, ( — ). A xinzhatana lexo, xi ku alakanyisa lezaku u fanele ku nyima u kuca nwanana lezaku a wula mawonela yakwe. A vanana va zi ranza nguvu a ku vonawu va patseka lomu ka mabhulo. Loku a nga patseki, a nwanana a nga tshuka a tsukula.

A xa lisima nguvu hi lezaku a ziwutiso lezo zi ta ku vuna ku tiva lezi zi nga maalakanyweni ya nwanana. Lisine lezaku a hi xontlhe xikhati a nwanana a to hlamula zona. Kanilezi, a mahungu ma lanzelako xiwutiso xinwe ni xinwani, ma mahelwe ku vuna nwanana lezaku a tiva ku pimisa khwatsi.

A nchumu wunwani wa wu nene nguvu wu nga lomu ka bhuku legi, mifota yo hunza 230 wa yona. A kutala ka mifota leyo yi na ni ziwutiso laha tlhelweni zi mahelako ku a nwanana a tlhamusela a mufota lowo hi kuya hi lezi a zi wonako ni lezi a zi gonzileko. Hikwalaho, bhulisanani hi mifota leyo ni nwanana wa wena kota ndlela ya ku vuxeta. A mifota leyo yi nga vuna a nwanana lezaku a nga rivali lezi a zi gonzileko.

Loku a nwanana a sangula ku zi kota ku lera, mu kuce lezaku a ku lerela hi gezu go tlakuka a tlhela a gi lera na a hi yece. Laha a to gi lera hi makhati yo tala, zi ta maha lezaku a wusungukati ga gi nene legi gi nga lomu ka bhuku legi, gi nghena lomu maalakanyweni ni lomu mbilwini yakwe. Kanilezi, kasi ku engetela liranzo ni xichawo xikari ka wena ni nwanana wa wena, hi ku kuca lezaku mu lera zinwe, mu tlhela mu zi maha hi kukhanzakanya.

Zalezi a vanana va le mhangweni ya hombe nguvu ya kuxakelwa ni ku wona a kutiriswa ka ziro za wubeleki hi ndlela yo biha, wungoma ni zilo zinwani zo biha. Lezo zilo zi nga kala zi nga alakanyelwi ka malembana ma hunzileko. Hikwalaho, a vanana va lava ku vikelwa ka zilo lezo. A bhuku legi gi nyika xivuno lexo hi ndlela ya xichawo, kanilezi yo kongoma. Hambulezo, a xa hombe nguvu, a vanana va lava ku gonzisiwa lezaku va tiva ku tsutsumela ka Xibuka xa wutlhari gontlhe, ku nga Papai wa hina wa le tilweni, Jehova Nungungulu. Lezo, hi lezi Jesu, Mugonzisi wa Hombe, a nga kari a zi maha xontlhe xikhati. I wa kongomisa vanhu ka Jehova Nungungulu. Hi rinzela lezaku a bhuku legi gi vuna wena ni ngango wa wena lezaku mu hanya hi ndlela yi tsakisako Jehova. Lezo zi ta mu nehela makatekwa ya pinzukelwa.