Vapswali, vhunani a vana va n’wina lezvaku va randza Jehovha

1-2. Hikuyini kuzvilava a matshinya yo kari ya milayo ya Bhibhiliya ma nga vako ya lisima ka hina loku a zviyimo zvi cica?

KA SIKU ga muchadho wabye, a noivho ni noivha va ingisela kanelo yi seketelwako ka Bhibhiliya. A matshinya ya milayo lawa ma kumbukiwako ka kanelo leyo a hi ya maswa ka vona. Kanilezvi kusukela ka siku lego ma tava ya lisima nguvhu ka vona. Hikuyini? Hakuva zvi ta lava ku va ma tirisa kota nuna ni sati.

² Zviya hi ku fana a cikhati leci a nuna ni sati va kumako n’wana. Ka malembe wontlhe ma hundzileko, zva koteka ku ngha va zwile tikanelo to tala ti nga wulawula hi ku wundla vana. Kanilezvi zvezvi, a wusungukati ga tikanelo leto ga lisima nguvhu ka vona. Hakuva makunu va na ni n’wana loyi zvi lavako ku va mu wundla. Hi nga wona a wutihlamuleli lego ga hombe! Hi lisine, a zviyimo zviswa zvi nga cica lezvi hi ma wonisako zvona a matshinya ya milayo ya Bhibhiliya hi ma tivako khwatsi. Hi cigelo leco a vakhozeli va Jehovha va lerako Mitsalo va tlhela va ehleketa hi yona ‘masiku wontlhe ya kuhanya kabye’, a ku fana ni lezvi a tihosi ta ka Izrayeli ti nga byelilwe ku maha. — Deut. 17:19.

3. Zvini hi to wulawula hi zvona ka ndzima leyi?

³ Vapswali, mu na ni lungelo ga hombe nguvhu ka wontlhe lawa a muKristu a nga vako nawo, ku nga ku gondzisa a vana va n’wina xungetano hi Jehovha. Kanilezvi mu fanele ku maha zvo hundza ku va byela mahungu xungetano hi Nungungulu wa hina. Zvi lava lezvaku mu va vhuna a ku va mu randza nguvhu Jehovha. Maku zvini mu nga mahako kasi ku vhuna a vana va n’wina a ku randza Jehovha? Ka ndzima leyi, hi ta wulawula hi mune wa matshinya ya milayo ya Bhibhiliya ma nga mu vhunako kota vapswali. (2 Tim. 3:16) Hi ta tlhela hi wona lezvi a vapswali vo kari va nga maKristu va vhunekisako zvona hi ku tirisa a wusungukati ga Bhibhiliya.

MUNE WA MATSHINYA YA MILAYO MA NGA VHUNAKO VAPSWALI

4. Hi gihi a gin’we ga matshinya ya milayo gi nga vhunako a vapswali lezvaku va vhuna vana vabye a ku va randza Jehovha? (Jakobe 1:5)

⁴ Go sangula: Hlota wurangeli ga Jehovha. Kombela Jehovha lezvaku a ku nyika wutlhari gi lavekako kasi ku vhuna vana va wena ku hlakulela lirandzo hi yena. (Lera Jakobe 1:5.) Jehovha hi yena a ringanelwako khwatsi hi ku nyika wusungukati. Ku na ni zvigelo zvo tala zvi mahako ku Jehovha a ringanelwa hi ku nyika wusungukati. Wona zvimbiri basi. Co sangula: Jehovha i na ni wutlhari ga hombe nguvhu ga kuva mupswali. (Lis. 36:9) Ca wumbiri: A wusungukati ga wutlhari legi a hi nyikako, contlhe cikhati ga vhuna. — Isa. 48:17.

5. a) Zvini a hlengeletano ya Jehovha yi humesako kasi ku vhuna vapswali? b) Kota zvi kombisilweko ka vhidhio, zvini u nga gondza ka lezvi makabye Amorim ni sati wakwe va wundlisileko zvona a vana vabye?

⁵ Hi ku tirisa Mhaka yakwe ni hlengeletano yakwe, Jehovha i humesa zvakuga zvo tala nguvhu zva moya zvi seketelwako ka Bhibhiliya zvi nga mu vhunako ku wundla vana va n’wina kasi va randza Jehovha. (Mat. 24:45) Hi cikombiso, u nga kuma wusungukati go vhuna ka xaxamelo wa tindzima ti nge: “Ajuda Para a Família”, ti humesilweko hi malembe yo tala ka Despertai! niku zvezvi ta kumeka ka saite ya hina. A cin’wani kambe, ku na ni tivhidhio to tala ti nga ka jw.org leti ti nga vhunako vapswali a ku tirisa a wusungukati ga Jehovha laha va wundlako a vana vabye.b — Mav. 2:4-6.

6. A papayi wo kari i ti zwisisa kuyini hi wurangeli legi yena ni sati wakwe va nyikiwako hi hlengeletano ya Jehovha?

⁶ A vapswali vo tala va bonga nguvhu a civhuno leci Jehovha a va nyikako hi ku tirisa hlengeletano yakwe. A papayi wo kari wa ku hi Joe i wulile lezvi: “A ku wundla vana vanharu lisineni a hi zvilo zvo vevuka. Mina ni sati wa mina contlhe cikhati hi khongela ka Jehovha kasi a hi vhuna. Niku a kutala ka zvikhati hi ti zwisa ku khwatsi a ndzima yo kari kutani vhidhio yo kari yi humesilwe hi cikhati ci nene kasi ku hi vhuna ku lwisana ni ciyimo leci hi nga kumana naco. Contlhe cikhati hi tsumba a wurangeli ga Jehovha.” Joe ni sati wakwe va polile lezvaku a malulamiselo lawo ma vhuna a vana vabye a ku tshinela nguvhu ka Jehovha.

7. Hikuyini zvi nga zva lisima a ku a vapswali va chela kota hi cikombiso leci va vekelako vana vabye? (Va Le Roma 2:21)

⁷ Ga wumbiri: Va vekele cikombiso ci nene. A vana va zvi wona lezvi a vapswali vabye va mahako niku a kutala ka zvikhati va va pimanyisa. Lisine ku a ku na mupswali a mbheleleko. (Rom. 3:23) Hambulezvo, a vapswali vo tlhariha va maha zvontlhe va zvi kotako kasi ku va vekela a cikombiso ca cinene a vana vabye. (Lera Va Le Roma 2:21.) Na a wulawula hi vana, a papayi wo kari i te: “A vanana va fanana ni zviponja, va pswonga zvontlhe.” I engeta aku: “Va ta hi byela loku a cikombiso ca hina ci nga yelani ni lezvi hi zamako ku va gondzisa.” Hikwalaho, loku hi lava ku a vana va hina va randza Jehovha, zvi lava ku a lirandzo la hina hi Jehovha liva la hombe li tlhela li woneka.

8-9. Zvini u nga gondza ka lezvi zvi nga wuliwa hi Andrew na Emma?

⁸ Ku na ni tindlela to tala leti a vapswali va nga gondzisako hi tona a vana vabye a ku randza Jehovha. Wona lezvi a makabye wo kari wa ku hi Andrew wa 17 wa malembe a nga wula, i te: “Contlhe cikhati a vapswali va mina va wa khanyisa a lisima la mukhongelo. Ni wusiku, papayi i wa ndzi mahela mukhongelo hambu loku ndzi sina ndzi ti mahele mukhongelo. Contlhe cikhati a vapswali va mina va wa ndzi alakanyisa ku: ‘Ndzi nga bhula na Jehovha wontlhe makhati lawa ndzi ma lavako.’ Lezvo zvi ndzi khumbile nguvhu niku zvezvi ndza tlhatlheka nguvhu a ku khongela ka Jehovha ni ku mu wona kota Papayi wa lirandzo.” Vapswali, contlhe cikhati alakanyani ku a lirandzo la n’wina hi Jehovha li nga vhuna a vana va n’wina a ku vonawu va mu randza.

⁹ Wona a cikombiso ca Emma kambe. A cikhati leci a papayi wakwe a nga bhangula ngango wabye, i siyile a mamani wakwe na a hi ni mangava yo tala nguvhu. Emma i te: “Ku wa hi ni zvikhati zvo tala mamani a nga vhumala ni kinyeta, kanilezvi contlhe cikhati i wa wulawula hi lezvi Jehovha a khatalisako zvona ni ku hlayisa malandza yakwe. Ndzi wa zvi wona lezvaku mamani wa zvi kholwa lezvo hi ndlela leyi a nga hanya hi yona. Mamani i wa hanya hi lezvi a nga chumayela.” Hi gondza yini? A vapswali va nga gondzisa hi cikombiso cabye hambu ka zviyimo zvo nonoha. — Gal. 6:9.

10. Hi ka zvikhati muni lezvi a vapswali va vaIzrayeli zvi nga koteka ku va bhula ni vana vabye? (Deuteronome 6:6, 7)

¹⁰ Ga wunharu: Bhula ni vana va wena hi kukhandzakanya. Jehovha i wa byelile vaIzrayeli a ku va gondzisa a vana vabye xungetano hi yena hi kukhandzakanya. (Lera Deuteronome 6:6, 7.) Hi siku, a vapswali lavo va wa hi ni cikhati co tala ca ku va bhula ni vana vabye ni ku va gondzisa ku randza Jehovha. Hi cikombiso, a jaha ga muIzrayeli gi wa mbheta cikhati na gi vhuna a papayi wakwe a ku byala kutani ku tshovela. Loyi wa nhanyana i wa mbheta cikhati na a vhuna mamani wakwe a ku runga, ku luka ni mitiro yin’wani ya laha kaya. Laha a vapswali va nga mbheta cikhati na va tira ni vana vabye zvi wa koteka ku va bhula hi zvilo zvo tala zva lisima. Hi cikombiso, va wa bhula hi wunene ga Jehovha ni lezvi a nga vhunisa zvona a ngango wabye.

11. Nyamutlha, a vapswali ni vana va nga tshama va bhula hi cikhati muni?

¹¹ Zvezvi a wutomi a ga ha fani ni kale. Ka matiko yo tala, a vapswali ni vana a va mbheti cikhati co tala na va hi zvin’we. Kuzvilava a vapswali va ngha na va hi ntirweni a vanana na va hi cikoleni. Hikwalaho, a vapswali va fanele ku hlota tindlela ta ku bhula ni vana vabye. (Efe. 5:15, 16; Filp. 1:10) A wukhozeli ga ngango yin’we ya tindlela ta ku a vapswali va bhula ni vana vabye. A jaha go kari ga ku hi Alexander gi wulile lezvi: “Contlhe cikhati papayi i maha malulamiselo ya wukhozeli ga ngango niku a nga tsiki nchumu wu hi colopetela kuva zvin’we ka cikhati leco. Andzhako ka ku gondza, hi tshama hi ti buza hi mabhulo.”

12. Zvini a hloko ya ngango yi nga faneliko ku zvi rivala a cikhati va mahako wukhozeli ga ngango?

¹² Loku u hi hloko ya ngango, zvini u nga mahako kasi a wukhozeli ga ngango gi tsakisa a vana va wena? U nga gondza ni vana va wena hi bhuku ga hina ga giswa ga ku Ti buze hi wutomi kala kupindzuka!. A cigondzo leco ci nga vhula tindlela ta ku u bhula ni vana va wena na mu tlhatlhekile. Loku u lava ku a vana va wena va ku byela lezvi va ti zwisako zvona ni lezvi va zvi pimisako u nga tirisi cikhati ca wukhozeli ga ngango kasi ku va laya ni ku va komamisa. Niku zama ku nga va kwateli loku va tshuka va wula zvilo zvi nga yelaniko ni matshinya ya milayo ya Mitsalo. Wutshan’wini ga lezvo, kombisa kubonga hi lezvi va ku byelako lisine xungetano lezvi va ti zwisako zvona u tlhela u va kuca ku va simama ku maha lezvo. U nga vhuna khwatsi a vana va wena ntsena loku u tiva lezvi hakunene va ti zwisisako zvona.

13. Hi tihi tin’wani tindlela ta ku a vapswali va vhuna a vana vabye a ku tshinela ka Jehovha?

¹³ Vapswali, hlotani tindlela ta ku ndzeni ka siku mu vhuna a vana va n’wina lezvaku va tshinela ka Jehovha. Mu nga rindzeli ku muva ni cigondzo ca Bhibhiliya kasi ku gondzisa a vana va n’wina xungetano hi Nungungulu wa hina wa lirandzo. Wona lezvi a mamani wo kari wa ku hi Lisa a nga wula, i te: “Hi vhunile a vana va hina a ku wona kuyelana ku nga kona ka Jehovha ni zvivangwa. Hi cikombiso, loku a mbyana ya hina yi maha zvilo zvo kari zvi tsakisako vanana, hi va byela ku lezvo zvi komba ku Jehovha i Nungungulu wo tsaka niku i mahile ku hinawu hi tsaka hi tlhela hi ti buza hi zvilo zvo tsakisa.”

14. Hikuyini zvi nga zva lisima a ku a vapswali va vhuna a vana vabye a ku hlawula vanghana hi wutlhari? (Mavingu 13:20)

¹⁴ Ga wumune: Vhuna vana va wena a ku hlawula vanghana va vanene. A Mhaka ya Nungungulu yi zvi veka laha kubaseni lezvaku a vanghana va hina va nga hi kucetela ku maha zvazvinene kutani zvakubiha. (Lera Mavingu 13:20.) Vapswali, ma va tiva a vanghana va vana va n’wina? Mu tshuka mu va wona niku tshama mu bhula navo? Zvini mu nga mahako kasi ku vhuna a vana va n’wina a ku va maha wunghana ni lava va randzako Jehovha? (1 Kor. 15:33) Mu nga vhuna a vana va n’wina a ku va maha zviboho zva zvinene hiku ramba lava va nga ni wuxaka ga ginene na Jehovha kasi mu ta maha navo a mitiro yo kari ya laha kaya. — Lis 119:63.

15. Zvini a vapswali va nga mahako kasi ku vhuna a vana vabye a ku vava ni vanghana va vanene?

¹⁵ Ehleketa hi lezvi zvi wulilweko hi papayi wo kari wa ku hi Tony. I tlhamusela lezvi yena ni sati wakwe va zvi mahako kasi ku vhuna a vana vabye ku vava ni vanghana va vanene. I wula lezvi: “Hi malembe yo tala, mina ni sati wa mina hi ramba vamakabye va titanga to hambanahambana ni midhawuko yo hambanahambana laha kaya. Higa zvin’we zvakuga hi tlhela hi maha zvin’we a wukhozeli ga ngango. Leyo i ndlela ya yinene ya ku tivana ni lava va randzako Jehovha ni ku mu tirela hi kutsaka. Hi katekisilwe hi ku a vawoneleli va zvipandze, varumiwa ni vamakabye van’wani va rurela laha kaya. A vana va hina va gondzile zvotala ka matimu yabye, ka kuhiseka kabye ni ka ntiro wa kutikarata lowu va wu mahileko ntirweni wa Jehovha. Lezvo zvi vhunile a vana va hina a ku va tshinela nguvhu ka Jehovha.” Vapswali, ti yimiseleni a ku vhuna a vana va n’wina a ku vava ni vanghana va vanene.

U NGA MBHELELWI HI KUTSUMBA

16. A mupswali a nga ku yini loku a n’wana wabye a ku a nga zvi lavi ku tirela Jehovha?

¹⁶ Ahati ke, hambu loku u ti karata, a mun’we wa vana va wena a ku a nga zvi lavi ku tirela Jehovha? U nga chikeleli magumo ya ku zvi kona u nga kala ku mu gondzisa kota mupswali. Jehovha i nyikile hontlheni, a ku patsa ni n’wana wa wena, a cinyikiwo ca ku ti hlawulela lezvi hi zvi lavako, ku ngava ku hlawula ku tirela Nungungulu kutani ku nga mu tireli. Loku a n’wana wa wena a boha ku tsika Jehovha, u nga luzi kutsumba ka lezvaku siku gin’we i ta wuya. Alakanya a mufananiso wa n’wana a pengileko. (Luka 15:11-19, 22-24) A n’wana loye i no tsika ndlela ya kululama, kanilezvi hi kugumesa i no tlhela kaya. A vokari va ngaku: “Lowo wu wa hi mufananiso, kanilezvi a ku hakunene zvi nga humelela?” Ina, zvi nga humelela! Hi zvalezvo futsi zvi nga humelela a jaha go kari ga ku hi Elie.

17. A matimu ya Elie ma ku tiyisisa kuyini?

¹⁷ Xungetano hi vapswali vakwe, Elie i wula lezvi: “Va mahile zvontlhe va nga zvi kota kasi ku ndzi gondzisa ku randza Jehovha ni Mhaka yakwe, a Bhibhiliya. Hambulezvo, a cikhati ndzi nga hi muswa ndzi no sangula ku nga ha ingisi.” Elie i no sangula ku maha zvilo zvobiha cihundleni, a vapswali vakwe va no mu vhuna kanilezvi a nga vhumelangi. Andzhako ka loku a sukile laha kaya i no hanya wutomi go biha. Hambulezvo, ka zvikhati zvin’wani i wa bhula xungetano hi Bhibhiliya ni mun’we wa vanghana vakwe. Elie i wula lezvi: “Laha ndzi nga bhula nguvhu xungetano hi Jehovha ni munghana wa mina, ndzi no pola ku ndzi wa ehleketa nguvhu xungetano hi Jehovha. Hi kutsongwani-kutsongwani, a timbewu ta lisine leti ti nga kala ti nga mili mbilwini ya mina, leti a vapswali va mina va nga zamile ku ti byala ti no sangula ku kula.” Hi ndzhako ka cikhati, Elie i no tlhelela lisineni.c Hi nga alakanyela lezvi a vapswali vakwe va nga tsakisa zvona hiku wona lezvaku va zamile ku mu gondzisa a ku randza Jehovha na a ha hi n’wanana. — 2 Tim. 3:14, 15.

18. U ti zwisisa kuyini hi vapswali lava va ti karatako kasi ku gondzisa a vana vabye a ku randza Jehovha?

¹⁸ Vapswali, mu na ni thomo go hlawuleka, ku nga ku wundla a cizukulwana ciswa ca vakhozeli va Jehovha. (Lis. 78:4-6) Lowo a hi ntiro wo olova niku ha mu dzundza nguvhu hi lezvi mu ti karatako kasi ku vhuna a vana va n’wina! Loku mu simama ku maha zvontlhe mu zvi kotako kasi ku vhuna a vana va n’wina lezvaku va randza Jehovha niku va wundla hi kugondzisa kakwe, tiyisekani lezvaku a Papayi wa hina wa lirandzo wa le tilweni i ta tsaka.— Efe. 6:4.