XIGONZO 11

Hikuyini hi mahako mitlhangano ya hombe?

Gotsovanyano wa muganga wa Timboni ta Jehova le México — México

Kuhumeswa ka bhuku gotsovanyanweni wa muganga le Jerimani — Jerimani

Timboni ta Jehova ti nga ka gotsovanyano le Botsuana — Botsuana

Jaha gi bapatizwako le Nicarágua — Nicarágua

Drama yi mahiwako gotsovanyanweni wa muganga le Itália — Italia

Hi xihi a xigelo xa litsako li wonekako tinghoheni ta vanhu lava? Va lomu ka wunwe wa mitlhangano ya hina ya hombe. A ku fana ni malanza ya Nungungulu ya kale, lawa ma nga leletelwa ku tsombana makhati manharu hi lembe, hinawu ha xuva ku tlhangana hi mitlawa ya hombe. (Deuteronome 16:16) Lembe ni lembe, hi na ni mitlhangano yinharu ya hombe: Mitlhangano yimbiri ya xipanze ya siku ginwe, ni gotsovanyano wa muganga wa masiku manharu. Xana hi vunekisa kuyini hi mitsombano leyi?

Yona ya tiyisa a wumakabye ga hina ga wuKristu. A ku fana ni lezi a vaIsraeli va nga tsaka hi ku “dumisa Jehova lomu mitsombanweni,” hinawu ha tsaka hi ku mu khozela zinwe mitlhanganweni yo hlawuleka. (Tisimu 26:12; 111:1) A mitsombano leyo yi hi nyika lungelo ga ku tlhangana ni ku bhulisana ni Timboni ta manwani mabandla; niku hambu ni ta matiko manwani. Hi dina, hi tshama zinwe hi ti gela kwalaho hi tlhanganako kona, lezi zi engetelako a moya wa wunghana lowu wu nga kona ka zimaho lezo za moya. (Mitiro 2:42) Kwalaho, ha zi kota ku li wona ha hoce a liranzo leli li tlhanganyisako “vamakabye” va hina va misava yontlhe. — 1 Pedro 2:17.

Yi hi vuna a ku kula hi tlhelo ga moya. A vaIsraeli va wa tlhela va vuneka hi kuva va “pimile a timhaka” ta Mitsalo leyi va nga tlhamuselwa. (Nehemia 8:8, 12) Hinawu ha nyika lisima a gonziselelo ya Biblia leyi hi yi kumako mitlhanganweni ya hina ya hombe. A longoloko wunwe ni wunwani wa mitlhangano leyo wu seketelwa ka hloko ya mhaka ya lomu Mitsalweni. Hi ku tirisa tikanelo, mixaxamelo, ni miwoniso yi kokako kupima, hi gonza ku maha kuranza ka Nungungulu wutomini ga hina. Ha tiyiswa a xikhati lexi hi zwako matshango ya lava va hlulako a xikarato xa ku hanya wutomi ga wuKristu masikwini lawa ya zikarato. Lomu migotsovanyanweni ya muganga, hi gonzisiwa zilo za lisima hi tidrama ti kombisako mitlhatlhambutelo ya Biblia hi ndlela yo hanya. Ka mitlhangano yontlhe ya hombe ka bapatizwa lava va lavako ku kombisa a kutihendleleta kabye ka Nungungulu.

Hikuyini a mitlhangano ya hina ya hombe yi nga zikhati za kutsaka?
U nga vunekisa kuyini hi kuva kona ka wunwe wa mitlhangano ya hina ya hombe?