Mitlhangano yi hi ‘susumetako liranzweni ni mitirweni yo saseka’

HI MAZANAZANA ya malembe, a vanhu va Jehova va tlhangana zinwe ka zikhati zi yimisilweko. Le Israeli wa kale, a vavanuna vontlhe va wa fanele ku enza makhati manharu hi lembe vaya ka mibuzo ya hombe yi nga mahiwa Jerusalema. (Deut. 16:16) Ka zana ga malembe go sangula, a maKristu ma wa tlhangana hi kukhanzakanya, niku ma wa tala ku tlhangana mitini ya vokari. (Filem. 1, 2) Inyamutlha, ha ti buza hi mitlhangano ya bandla, mitlhangano ya xipanze ni migotsovanyano. Hikuyini a vanhu va Nungungulu va tlhanganako ka zikhati zontlhe lezo? A xigelo-tshinya hi lezaku a mitlhangano xipanze xa lisima wukhozelini ga hina. — Tis. 95:6; Kol. 3:16.

² Lava va yako mitlhanganweni vonawu va vuneka. Xungetano hi mubuzo wa mixaxa lowu wu nga mahiwa anzhako ka ntlhanu wa malembe ni mambiri, a vaIsraeli va wa byelilwe lezi: ‘Tsombanyisani vanhu, a vavanuna, ni vavasati, ni vanana, ni valuveli va nwina lava va nga madoropeni ya nwina, kasi va fela kuzwa va gonza ku chava Jehova Nungungulu wa nwina, va chivirika ku hlayisa timhaka tontlhe ta lowu nayo.’ (Deut. 31:12) Zi laha kubaseni lezaku a xigelo-tshinya xa kuva hi tlhangana inyamutlha, ku hi “gonzisiwa hi Jehova.” (Isa. 54:13, NM) Tlhatakumbiri, a mitlhangano yi hi nyika a lungelo ga ku tivana ni maKristu-kulori ni ku tiyisana nawo.

MITLHANGANO YA BANDLA

³ A vapizani lava va nga tlhangene zinwe anzhako ka Pentekosta wa 33 Nguveni ya Hina va lo ti nyikela kugonziseni ka vapostoli hi timbilu tabye tontlhe, niku “masiku ni masiku va lo simama ku tlhangana hi mbilu yinwe lomu tempeleni.” (Miti. 2:42, 46, NM) Hi nzhako ka xikhati, loku a maKristu ma tlhangene kasi ku khozela zinwe, ma wa gonza mitsalo yi pimisilweko, a ku patsa ni mapapilo ma tsalilweko hi vapostoli ni vapizani vanwani va maKristu. (1 Kor. 1:1, 2; Kol. 4:16; 1 Tes. 1:1; Jak. 1:1) Ku wa mahiwa mikhongelo kambe. (Miti. 4:24-29; 20:36) Ka zikhati zo kari, a varumiwa va wa hlawutela matshango ya le ntirweni wa simu. (Miti. 11:5-18; 14:27, 28) Ku wa kambisisiwa a tigonzo ta Biblia zinwe ni kutatiseka ka ziprofeto za gona. Ku wa nyikiwa zileletelo xungetano hi mahanyela ya wuKristu ni lezi hi nga mu khozelisako zona Nungungulu hi kufaneleko. Vontlhe va wa kuciwa kuva vahuweleli vo hiseka va mahungu yo saseka. — Rom. 10:9, 10; 1 Kor. 11:23-26; 15:58; Efe. 5:1-33.

⁴ Inyamutlha, a mitlhangano ya maKristu yi lanzela a mahela gi tirisilweko hi vapostoli. Ha ingisa a wusungukati gi pimisilweko ka Maheberu 10:24, 25, gi nge: “Ngha hi khatalelana . . . , na hi nga tsiki ku tlhangana khwatsi hi mukhuwo wa vanwani kanilezi hi khongotelana; nguvunguvu kota lezi mu wonako lezaku a siku gi tshinela kusuhani.” (NM) Masikwini lawa yo gumesa ma teleko hi zikarato, hi na ni xilaveko xa hombe xa ku tlhangana hi kukhanzakanya ni maKristu-kulori lezaku hi tiyisana kasi hi tshama hi tiyile hi tlhelo ga moya ni ku simama hi tsumbeka. (Rom. 1:11, 12) Kota maKristu, hi hanya xikari ka xizukulwana xi gombonyekileko ni xi bihileko. Hina hi ala a kunavela ku bihileko ka tiko legi. (Fil. 2:15, 16; Tit. 2:12-14) Hi kwihi hi nga wa ta tsakela kuva kona loku ku nga hi kuva zinwe ni vanhu va Jehova ke? (Tis. 84:10) Niku xini xi nga wa ta hi nehela litsako la hombe a ku hunza ku gonza ni ku kambisisa a Mhaka ya Nungungulu? Wona a mitlhangano yo kari hi mahako ni lezi yi hi vunisako zona.

MUTLHANGANO WA VANHU VONTLHE

⁵ A mutlhangano wa vanhu vontlhe a kutala ka zikhati wu mahiwa kumbheleni ka viki zinwe ni xigonzo xa Murinzeli xa viki ni viki. Wu vitanwa ku mutlhangano wa vanhu vontlhe hakuva a kanelo yi vekiwako yi mahelwe nguvunguvu a vanhu laha va yileko, niku a vokari vabye ku nga hava khati go sangula va vako kona ka mutlhangano lowo. A mutlhangano lowu wu na ni xipanze xa lisima kutatiseni ka zilaveko za moya za lava va ha sangulako kuta mitlhanganweni, a ku patsa ni ziro zinwani za bandla. — Miti. 18:4; 19:9, 10.

⁶ Jesu Kristu ni vapostoli vakwe zinwe ni vanwani va nga ti tlhanganyisa navo, va mahile mitlhangano yo fana ni leyi yi mahiwako mabandleni ya vanhu va Jehova inyamutlha. Handle ko kanakana, Jesu ive mukaneli wa mu nene nguvu ku hunza vontlhe va tshukileko vava kona laha misaveni. Ka khati go kari va te ngalo ha yena: “Cima a ku seva ni munhu a zi kotako ku wulawula a ku fana na yena.” (Joh. 7:46, NM) Lezi Jesu a nga gonzisisa zona hi ku tirisa Mhaka ya Nungungulu, zi wa hlamalisa a vaingiseli vakwe. (Mat. 7:28, 29) Lava va nga ingisa a mahungu yakwe va amukele makatekwa yo tala. (Mat. 13:16, 17) A vapostoli va lanzele a xikombiso xakwe. Ka Mitiro 2:14-36, hi gonza hi kanelo yo hanya ya Pedro leyi a yi vekileko hi Pentekosta wa 33 Nguveni ya Hina. A mazanazana ya vanhu ma kucekile ku maha xokari anzhako ka kuzwa a kanelo leyo. Hi nzhako ka xikhati, ku lova ni vanhu vo kari va nga kholwa anzhako ka kuzwa kanelo leyi Paule a yi vekileko le Atensi. — Miti. 17:22-34.

⁷ Hi kufanana, masikwini ya hina a timiliyoni ta vanhu ta vuneka hi Mitlhangano ya viki ni viki yi mahelwako vanhu vontlhe lomu mabandleni ya Timboni ta Jehova ni tikanelo ti seketelwako ka Biblia ti vekiwako mitlhanganweni ya hombe ni migotsovanyanweni. A tikanelo leto ta hi vuna a ku simama hi chela kota hi tigonzo ta wuKristu ni ku timisela ntirweni wa Mufumo wa Nungungulu. Loku hi ramba lava va tsakelako ni vanhu vanwani laha va yileko lezaku vata mitlhanganweni leyo, hi ta ngha hi va vuna lezaku va engetela a wutivi gabye hi tigonzo to sangula ta Biblia.

⁸ Ka Mutlhangano wa vanhu vontlhe ku gonziwa timhaka to hambanahambana. A tikanelo leto ti vekiwako ti nga ha wulawula hi tigonzo ta Biblia, ziprofeto, matshinya ya milayo ya Biblia, wusungukati ka ziro za ngango ni ka mipatswa, timhaka ti khumbako vaswa, ni mahanyela ya maKristu. A tokari ti nga ha wulawula hi mitiro yo hlamalisa ya Jehova. A tinwani ti nga ha wulawula hi vanhu va lomu ka Biblia va kombisileko kukholwa, kutiya-hlana ni kutsumbeka ni lezi hina inyamutlha hi nga va pimanyisisako zona.

⁹ Kasi hi vuneka khwatsi hi Mutlhangano lowu, hi fanele ku ingisela khwatsi, hi lavetela a mitsalo yi kumbukiwako hi mukaneli, hi tlhela hi lanzela a xikhati a lerako ni ku yi tlhamusela. (Luka 8:18) Loku hi tiyiseka hi lezi hi gonzileko, hi ta ti yimisela ku khomelela ka zona hi tlhela hi zi tirisa. — 1 Tes. 5:21.

¹⁰ Loku a vakaneli va hi kona, handle ko kanakana a bandla gi tava ni kanelo ya vanhu vontlhe viki ni viki. Lezo za koteka hi ku kombela vakaneli va mabandla manwani ya laha kusuhani lezaku va ta veka tikanelo bandleni ga nwina. Loku ku hi ni wuna ga vakaneli, a tikanelo leti ti ta vekiwa loku zi koteka.

XIGONZO XA MURINZELI

¹¹ A kutala ka zikhati, a kanelo ya vanhu vontlhe yi lanzelwa hi xigonzo xa Murinzeli — ku nga mabhulo ya ziwutiso ni mihlamulo ma seketelwako ka tinzima ti humesiwako ka Murinzeli wa xigonzo. Hi ku tirisa a Murinzeli, Jehova wa hi phamela zakuga za moya hi xikhati xi faneleko.

¹² A tinzima leto ta xigonzo ti tala ku wulawula hi lezi hi nga ma tirisisako zona a matshinya ya milayo ya Biblia zilweni za siku ni siku. Ti vuna maKristu lezaku ma potsa a “moya wa misava” ni mahanyela yo biha. (1 Kor. 2:12) A tinzima ta A Murinzeli ti hi nyika a kuwonekela loku ku yako kuengetela ka tigonzo ta Biblia ni ziprofeto za gona, lezi zi hi vunako ku simama lisineni. (Tis. 97:11; Mav. 4:18) A ku kumeka ka Xigonzo xa Murinzeli hi tlhela hi nyika mihlamulo zi nga hi vuna a ku tsakela a xitsumbiso xa Jehova xa kuta ka misava yiswa yo lulama. (Rom. 12:12; 2 Ped. 3:13) A ku ti tlhanganyisa ni maKristu-kulori zi hi vuna a ku hlakulela a mihanzu ya moya wa ku basa ni ku tiyisa a kuxuva ka hina ka ku lava ku tirela Jehova hi kuhiseka. (Gal. 5:22, 23) Ha tiyisana kasi hi timisela a zikarato ni ku aka “xiseketelo xi nene [xa] xikhatini xa ha tako” lezaku hi “fela ku kuma wutomi legi gi nga wutomi [hi lisine].” — 1 Tim. 6:19; 1 Ped. 1:6, 7.

¹³ Hi nga vunekisa kuyini hi malulamiselo lawa ya zakuga za moya? Hi fanele ku vuxeta a nzima leyi hi to gonza na ka ha hi mahlweni. Hi nga maha lezo hoce kutani ni ziro za ngango, hi lavetela mitsalo leyi yi tshahilweko hi tlhela hi hlamula hi magezu ya hina wutsumbu a xikhati lexi a xigonzo xi fambako. Lezo zi ta zikisa a lisine mbilwini ya hina, niku a vanwani va ta vuneka hi kuzwa a magezu ya hina ma kombisako kukholwa. Viki ni viki hi ta kuma timhaka ti vunako, loku hi ingisela khwatsi a mihlamulo ya vanwani.

NTIRO WA HINA NI MAHANYELA YA WUKRISTU

¹⁴ Viki ni viki a bandla ga tlhangana Salawini ya Mufumo lezaku gi maha a mutlhangano wu vitaniwako ku, Ntiro wa hina ni mahanyela ya wuKristu. A mutlhangano lowu wu na ni zipanze zinharu zi mahelweko ku hi vuna ku maha khwatsi a ntiro wa Nungungulu. (2 Kor. 3:5, 6) A longoloko wa mutlhangano lowu ni zitiro zinwani zi ta kumeka hweti ni hweti ka Xibhukwana xa Mutlhangano — Ntiro wa hina ni mahanyela ya wuKristu. A xibhukwana lexi, xi na ni zingheniso zo olova kasi ku zi tirisa ntirweni wa ku xumayela.

¹⁵ A xipanze xo sangula xa mutlhangano xi vitaniwa ku: Titshomba ti nga ka mhaka ya Nungungulu. Xona xi ta hi vuna ku etisa wutivi ga hina hi matimu ya Biblia ni ku tiva lezi hi nga ma tirisisako zona wutomini ga hina. A mutlhangano lowu wu patsa kanelo, kugonza ka Biblia ni kubhulisana ku seketelweko ka timhaka-tshinya ta ku gonza ka Biblia ka viki. A xibhukwana xa Mutlhangano wa Ntiro wa hina ni mahanyela xi na ni mifota, mimapa ni wutshamu ga lezaku hi tsala a zingheniso za hina wutsumbu. Zontlhe lezo zi hi vuna a ku gonzisa khwatsi a matimu ya Biblia. A kukambisisa loko ko eta ka Biblia ka hi vuna hina wutsumbu ni ntirweni wa hina wa ku gonzisa vanwani, kasi hi ‘fela ku mbhelela, na hi longiselelwe a mitiro yontlhe yo saseka.’ — 2 Tim. 3:16, 17.

¹⁶ A xipanze xa wumbiri xa mutlhangano lowu xi vitaniwako ku Ti tsitsirite ntirweni wa kuxumayela xi mahelwe ku hi vuna ku gonzisa khwatsi. Ka kambisiswa a tinzima ti wulawulako hi ntiro wa ku xumayela — ti nga ka xibhukwana Ntiro wa hina ni mahanyela ni ka mabhuku manwani a ku patsa ni tividiyu. Tlhatakumbiri, kasi ku hi ti longisela kuya ntirweni wa ku xumayela, a vamakabye va xinuna kutani va xisati va maha mikombiso ya lezi hi nga sangulisako zona mabhulo ni venyi va miti, mamahela ya lienzo lo wuyela, kutani ku fambisa xigonzo xa Biblia. A xipanze lexi xa mutlhangano xi hi vuna kuva ni “lirimi” la vanhu va gonzisilweko kasi hi “zi kota ku tangalisa loyi a kareleko.” — Isa. 50:4.

¹⁷ A xipanze xa wunharu xi vitaniwako ku Mahanyela ya wuKristu xi komba lezi hi nga ma tirisisako zona a matshinya ya milayo ya Biblia wutomini ga hina ga siku ni siku. (Tis. 119:105) A xinwe xa zilo za lisima nguvu ka mutlhangano lowu Xigonzo xa Biblia xa bandla. A kufana ni Xigonzo xa Murinzeli, a Xigonzo xa Biblia xa Bandla kubhulisana ka ziwutiso ni mihlamulo. Ku gonziwa tinzimana, ku mahiwa ziwutiso, ku nyikiwa mihlamulo, ku tlhela ku gonziwa mitsalo. Na mutlhangano wu nga se valiwa hi lisimu ni mukhongelo, ku vuxetiwa timhaka-tshinya ta lisima ti gonzilweko mutlhanganweni, ni ku nyika masemanyana ya lezi zi to gonziwa ka viki gi tako.

¹⁸ Hweti ni hweti, neti a xibhukwana Ntiro wa hina ni mahanyela xi chikela, a mutlhanganyisi wa hubye ya madota kutani muvuneteli wakwe, i xi kambisisa hi wukheta a tlhela a maha longoloko. I fanele ku kuma mahungu ma tako hi ka Muwoneleli wa Mutlhangano wa Ntiro ni Mahanyela. Viki ni viki, a muwoneleli wa Mutlhangano wa Ntiro ni Mahanyela kutani dota ginwani gi ringanelwako hi ku gonzisa na gi yimisilwe hi hubye ya madota gi ta tira kota Mukhomi wa xitshamu wa Mutlhangano. A ntiro wakwe wu patsa ku wonelela xikhati xa mitlhangano — kuva yi sangula yi tlhela yi mbhela hi xikhati — ni ku nyika wusungukati ka zigonzani zi vileko ni zipanze.

¹⁹ Loku hi ti longisela, hiva kona hi tlhela hi patseka ka Mutlhangano wa Ntiro ni Mahanyela, hi ta kuma wutivi ga Mitsalo, hi zwisisa a matshinya ya milayo ya Biblia, hi tlhela hiva ni wutlhari go xumayela a mahungu yo saseka ni ku maha vapizani. A vatsakeli lava va tako mitlhanganweni vonawu va ti buza hi kuva zinwe ni vanhu va ranzanako va tlhela va tiyisiwa hi mabhulo ya moya ma akako. Ku na ni zitiro zo tala zi nga ku vunako ku longisela mutlhangano lowu zo kota Watchtower Library, JW Library, BIBLIOTECA ON-LINE da Torre de Vigia (loku zi hi kona hi lirimi la wena) ni biblioteka yi nga Salawini ya Mufumo. A biblioteka yi nga Salawini ya Mufumo yi fanele kuva ni mabhuku wontlhe ma humesilweko hi Timboni ta Jehova, Índice das Publicações Torre de Vigia kutani Bhuku go kambisisa hi gona ga Timboni ta Jehova zinwe ni wuhunzuluseli go hambanahambana ga Biblia, concordância, disionario ni manwani mabhuku ya lisima. A biblioteka leyi, yi nga tirisiwa hi ni wihi munhu mahlweni kutani anzhako ka mitlhangano.

MITLHANGANO YA NTIRO WA SIMU

²⁰ Xikari ka viki ni kumbheleni ka gona, a mitlawa ya vahuweleli ya tlhangana kasi yi maha mitlhangano ya ntiro wa simu. A kutala ka zikhati a mitlhangano leyo yi mahiwa mitini ya vamakabye kutani ka matshamu manwani ma ringanelwako. A Salawu ya Mufumo yonawu yi nga ha tiriselwa ku maha a mitlhangano leyo. A kuva ni mitlawa yi wumbiwako hi vahuweleli vatsongwani ka matshamu yo hambanahambana, zi olovela a vahuweleli a kuya wutshanwini ga mutlhangano ni xipanzeni lexi va to tirela ka xona. Ahandle ka lezo, za olova a ku va ava ni ku va nyika a xipanze. Niku zi nga olovela a muwoneleli wa ntlawa a ku va khatalela khwatsi lava va nga ntlaweni wakwe. Hambu lezi ku nga ni mabhinzu wontlhe lawo, a ziyimo zo kari zi nga ha kurumeta lezaku a mitlawa yi tlhangana ka wutshamu ginwe. Hi xikombiso, loku ku hi lezaku vatsongwani lava va yako ntirweni wa simu xikari ka viki, zi ngava chukwana nguvu a ku a mitlawa yo kari yi tlhangana ka wutshamu ginwe kutani ku yontlhe yi tlhangana Salawini ya Mufumo kutani ka wutshamu ginwani gi ringanelwako. A mahela legi gi ta vuna a vahuweleli lezaku vava ni vo tira navo. Hi tiferiado, a bandla gi nga ha boha ku maha mutlhangano wa ntiro wa simu Salawini ya Mufumo. Kutani kuva ni mutlhangano lowu anzhako ka Xigonzo xa Murinzeli.

²¹ Loku a mitlawa yi tlhangana ka matshamu yo hambanahambana, a muwoneleli wa ntlawa hi yena a fambisako a mutlhangano wa ntiro wa simu. Ka zikhati zo kari, a muwoneleli wa ntlawa a nga ha kombela a muvuneteli wakwe kutani makabye munwani a ringanelwako lezaku a fambisa mutlhangano lowo. Wutshanwini ga ku kambisisa a mutsalo wa siku, a mufambisi i fanele ku bhula hi zilo zi to va vuna ntirweni wa simu. Anzhako ka ku maha malulamiselo ya ntiro wa simu ku kombeliwa wokari lezaku a maha mukhongelo. Makunu a ntlawa wu longile kuya kuxumayeleni. A mitlhangano leyo yi mahiwa hi 5 kutani 7 wa timeneti ntsena, kanilezi loku yi mahiwa anzhako ka mitlhangano ya bandla a yi faneli ku chikela ka timeneti leto. Tlhatakumbiri, yi fanele ku tiyisa, yi nyika zileletelo zi vunako, ni wurangeli ka lava va yako kuxumayeleni. A vahuweleli va nga buvangiko kutani vanwani va ha lavako xivuno va nga ha tira ni vahuweleli va buvileko kasi va kuma gonziselelo.

MALULAMISELO YA MITLHANGANO KA MABANDLA MASWA KUTANI KA MITLAWA

²² Laha a vanhu vo tala va mahako vapizani, a ntsengo wa mabandla wa engeteleka. A xikombelo xa kuyimiswa ka bandla giswa a kutala ka zikhati xi mahiwa hi muwoneleli wa xipanze. Hambulezo, ka zikhati zo kari, a mitlawana yo kari yi nga ha zi wona na zi vuna a ku ti patsa ni bandla ga laha kusuhani.

²³ Ka zikhati zo kari, a mitlawa yi nga ha wumbiwa hi vamakabye va xisati basi. Loku zi tshamisile lezo, a makabye wa xisati loyi a mahako mukhongelo kutani ku fambisa mitlhangano laha ntlaweni, i fanele ku boha dhuku, kota lezi zi kombisiwako hi Mitsalo. (1 Kor. 11:3-16) A kutala ka zikhati, i maha lezo na a tshamile mahlweni ka ntlawa. A vamakabye va xisati a va veki tikanelo. Kanilezi va lera a timhaka ti humesilweko hi hlengeletano va tlhela va tlhamusela, kutani ku ti songa hi ku tirisa kubhulisana ni mikombiso. A hofisa ya ravi yi ta kombela a makabye munwe wa xisati lezaku a tirisana ni hofisa a tlhela a khatalela mitlhangano. Hi kufamba ka xikhati, loku ku kumeka a vamakabye va xinuna va ringanelwako, va ta nyikiwa a wutihlamuleli legi.

MITLHANGANO YA XIPANZE

²⁴ Lembe ni lembe ka mahiwa malulamiselo ya lezaku a mabandla ma lumbako xipanze xo kari mava ni mitlhangano yimbiri ya xipanze ya siku ginwe. A mitlhangano leyo yo tsakisa nguvu yi nyika vontlhe a lungelo ga ku tivana ni vamakabye vo tala. (2 Kor. 6:11-13) A hlengeletano ya Jehova yi hlawula a mhaka yo kari yi yelanako ni zilaveko za vanhu zonake yi longisela tihloko ta mhaka ti seketelwako ka Biblia ni zipanze zinwani za mitlhangano leyi. A mahungu lawo ma tlhamuselwa hi ku tirisa tikanelo, mikombiso, ku kombisa zilo zi mahekileko, kuwulawula ka munhu na a hi yece ni kubhulisana. A gonziselelo leyo yi chikelako hi xikhati xi faneleko yi tiyisa vontlhe va nga kona. Ka mitlhangano leyi, a vapizani vaswa va bapatizwa kota xikombiso xa kutihendleleta kabye ka Jehova.

MIGOTSOVANYANO YA MUGANGA

²⁵ Ka mahiwa mutlhangano wa hombe nguvu khati ginwe hi lembe. A kutala ka zikhati, wu mahiwa hi masiku manharu, niku ku patseka a mabandla ya zipanze zo tala. A ravi legi gi wonelelako a mabandla matsongwani gi nga zi wona na zi vuna ku a mabandla wontlhe ma nga lomu xipanzeni xa ravi lego ma tlhangana ka wutshamu ginwe. Lezi a mitlhangano leyi yi mahiswako zona za tshuka zi hambananyana hi kuya hi ziyimo za matiko yo kari kutani zileletelo zi tako hi ka hlengeletano. Ka zikhati zinwani, ka mahiwa migotsovanyano ya matiko manyingi kutani yo hlawuleka ka matiko yo kari niku ku nga kumeka Timboni ta mazanazana ta kuta hi ka matiko yo tala. A vanhu vo tala va kari va gonza a mahungu yo saseka ya Mufumo hi kota ya lezi va zi wonako ka mitlhangano leyi ya hombe ya Timboni ta Jehova.

²⁶ A malanza ya Jehova ma ti hendleletileko ma wona a migotsovanyano kota zikhati zo hlawuleka za ku khozela Jehova ni makholwa-kulobye. Ka mitlhangano leyo ha kuma kuzwisisa kuswa ka lisine la moya. Ka migotsovanyano yo kari ka humesiwa mabhuku maswa lezaku ma gonziwa hi vanhu hi munwe munwe, bandleni kutani ku ma tirisa ntirweni wa simu. Tlhatakumbiri, ka bapatizwa a vapizani vaswa. A migotsovanyano ya hi vuna nguvu a ku simama hi kula hi tlhelo ga moya. Ka zimaho lezi, za woneka kubaseni lezaku a Timboni ta Jehova ti wumba a ngango wunwe wu nga misaveni yontlhe wa maKristu ma ti hendleletileko lawa ma nga ni xifungo xi tivekisako a valanzeli va Jesu Kristu. — Joh. 13:35.

²⁷ Loku hi hi mitlhanganweni ya bandla, mitlhanganweni ya hombe, ni migotsovanyanweni ya vanhu va Nungungulu ha tiyisiwa lezaku hi maha a kuranza ka Jehova. A mitlhangano leyo ya hi vikela kambe ka mikucetelo leyi yi nga hehlako a kukholwa ka hina. Tlhatakumbiri, a mitlhangano leyi yi dumisa Jehova. (Tis. 35:18; Mav. 14:28) Ha mu bonga nguvu Jehova hi lezi a hi longiselelako a mitlhangano leyi yi tangalisako a Timboni takwe xikhatini lexi xo gumesa.

XILALELO XA HOSI

²⁸ Khati ginwe hi lembe, a Timboni ta Jehova misaveni yontlhe ta tlhangana lezaku ti maha Xialakanyiso xa kufa ka Kristu lexi xi tiviwako kambe kota Xilalelo xa Hosi. (1 Kor. 11:20, 23, 24) Lowu hi wona a mutlhangano wa lisima nguvu ka yontlhe ka vanhu va Jehova. Hina hi nyikilwe a xileletelo xo kongoma xa ku maha a Xialakanyiso lexi. — Luka 22:19.

²⁹ A siku ga Xialakanyiso gi yelana ni siku legi ku nga mahiwa a Pasika zikhatini za kutsaliwa ka Biblia, kota lezi yi kombako a Mitsalo. (Ekso. 12:2, 6; Mat. 26:17, 20, 26) A Pasika gi wa hi mubuzo wa lembe ni lembe wu nga alakanyisa a vaIsraeli a kuhumesiwa kabye le tikweni ga Gipite hi 1513 Mahlweni ka Nguva ya Hina. Hi lexo xikhati, Jehova i lo yimisa a siku ga wu 14 ga kusangula ka hweti yabye ya xiJuda, kota siku legi va nga fanele kuga Pasika ya yivana ni ku huma wukhumbini ga le Gipite. (Ekso. 12:1-51) A siku legi gi wa tiveka hi ku hlayela a 13 wa masiku anzhako ka kuwoneka ka hweti yiswa yi fungako a kusangula ka nguva ya ximumu le Jerusalema. A Xialakanyiso xi tolovela ku mahiwa kuwonekeni ka hweti yo tala kusuhani ni kusangula ka nguva ya ximumu le Jerusalema.

³⁰ A bhuku ga Mateu 26:26-28 gi komba lezi Jesu a wulileko xungetano hi lezi a Xialakanyiso xi faneleko ku mahiswa zona. A xialakanyiso a hi mukhuwo wo kala tlhamuselo kanilezi xilalelo xo fananisa xi giwako hi lava va nga ni kutsumba ka kuva ziga-tshomba na Jesu Kristu Mufunweni wa le tilweni. (Luka 22:28-30) Vontlhe a vanhu va ti hendleletileko ni vatsakeli va kuciwa kuva kona ka Xilalelo xa Hosi kota vacuwukeli. A kukumeka kabye ku komba lezaku va bonga a lulamiselo legi Jehova a gi mahileko lezaku a vuna a vanhu vontlhe hi ku tirisa a N’wana wakwe, Jesu Kristu. Masiku matsongwani anzhako ka Xialakanyiso, ku vekiwa a kanelo yo hlawuleka ya vanhu vontlhe leyi yi mahelweko ku kuca a vanhu lezaku va gonza a Biblia.

³¹ A vanhu va Jehova va zi donela mari a zikhati lezi za ku tlhangana kasi hi ‘khatalelana ni ku susumetana liranzweni ni mitirweni yo saseka.’ (Maheb. 10:24) A nanza gi tsumbekileko ni go tlhariha gi tshama na gi longile a ku hi longiselela a mitlhangano leyi yi enelisako a ndlala ya hina ya moya. Wontlhe a malanza ya Jehova ni vatsakeli va kuciwa lezaku va ma lonzowota khwatsi a malungelo lawa ya ku tlhangana zinwe ni makholwa-kulobye. Na ma bonga hi mbilu yontlhe a malulamiselo lawa Jehova a mahako hi ku tirisa a hlengeletano yakwe, a malanza ya Nungungulu ma hanya zinwe hi kuzwanana. A xa lisima nguvu hi lezaku a zimaho lezi zi hi nyika lungelo ga ku dumisa Jehova. — Tis. 111:1.