Mitlhangano ya simu yi tatisako kungo ga yona

1. Hi gihi a kungo ga mitlhangano ya ntiro wa simu?

¹ Ka khati go kari, Jesu i lo tlhangana ni 70 wa vapizani vakwe na va nga se suka vaya tsimeni ga kuxumayela. (Luka 10:1-11) I lo va tiyisa-hlana hi ku va alakanyisa lezaku va wa nga tava voce niku va wa ta rangelwa hi “Nwinyi wa kutshovela” ku nga Jehova. I lo va nyika kambe a gonziselelo leyi yi nga wa ta va vuna ku maha ntiro lowo, a tlhela a va xaxameta hi “vambiri vambiri.” Inyamutlha, a kungo ga mitlhangano leyi hi yi mahako na hi nga seya sinwini hi galego — ku hi tiyisa, yi hi longisa, ni ku hi xaxameta.

2. A mutlhangano wa ntiro wa simu wu fanele ku mbheta xikhati muni?

² Zalezi a mutlhangano wa ntiro wa simu wu mbheta 10 kuya ka 15 wa timeneti, leti ti patsako ku xaxameta mitlawa, ku avela zipanze zo tirela kona, ni ku maha mukhongelo. Lezo za cica makunu. Kusukela Abril, a mutlhangano wa simu wu ta mbheta 5 kuya ka 7 wa timeneti. Hambulezo, loku wu mahiwa anzhako ka mutlhangano wunwani wa bandla, wu fanele ku tlhela wu koma nguvu, hakuva lava va tova ka wona va sina va zwile mabhulo ma nene ya Mitsalo. A ku maha mitlhangano yo koma ya ntiro wa simu zi ta vuna a kuva ni xikhati xo tala wutirelini. Tlhatakumbiri, loku a maphayona kutani vahuweleli va sangulile ku xumayela mahlweni ka mutlhangano wa ntiro wa simu, va nga ta tsemarisa ntiro wabye hi xikhati xo leha.

3. A mitlhangano ya ntiro wa simu yi nga lulamiseliswa kuyini kasi a vahuweleli va vuneka khwatsi?

³ A mitlhangano ya ntiro wa simu yi fanele ku lulamiselwa hi ndlela ya kuva yi vuna khwatsi a vahuweleli. Ka mabandla yo tala za vuna ku a mitlawa ya simu yi tlhangana yoce ku hunza ku tlhangana vontlhe ka wutshamu ginwe. Lezo zi maha ku a vahuweleli zi va olovela kuya mutlhanganweni wa simu ni ka xipanze lexi ku to tirelwa kona. A vahuweleli va xaxametwa hi kuhatlisa, niku zi nga mu olovela a muwoneleli wa ntlawa a ku khatalela khwatsi lava va nga mandleni yakwe. A hubye ya madota yi nga alakanyela a ziyimo za lomu xipanzeni kasi ku tiva a mahela ga chukwana. Na mu nga se vala a mutlhangano wa ntiro wa simu hi mukhongelo wo koma, vontlhe va fanele ku zi tiva lezaku va ta tira na mani niku kwihi.

4. Hikuyini a mitlhangano ya ntiro wa simu yi nga faneliko ku wonelwa hasi?

⁴ Wa lisima a ku fana ni mitlhangano yinwani ya bandla: Kota lezi a mitlhangano ya ntiro wa simu yi mahelwako ku vuna lava va yako wutirelini, a yi faneli ku mahelwa bandla gontlhe. Hambulezo, a zi wuli lezaku yi fanele ku woniwa kota ya lahasi kutani yi nga hiko ya lisima a ku fana mitlhangano yinwani ya bandla. A ku fana ni mitlhangano le’yinwani, a mitlhangano ya ntiro wa simu malulamiselo ma tako hi ka Jehova lawa ma hi vunako ku susumetana liranzweni ni mitirweni yo saseka. (Maheb. 10:24, 25) Hikwalaho, a mufambisi i fanele ku ti longisela khwatsi kasi a mabhulo lawo ma dumisa Jehova ma tlhela ma vuna lava va nga kona. Loku zi koteka, a vahuweleli lava va yako wutirelini va fanele kuva kona ka mutlhangano lowo.

5. a) Hi wihi a ntiro wa muwoneleli wa ntiro ka malulamiselo ya mitlhangano ya ntiro wa simu? b) A makabye wa xisati i fanele ku fambisisa kuyini a mutlhangano wa ntiro wa simu?

⁵ Kutilongisela ka mufambisi: Kasi a munhu a ti longisela khwatsi lezaku a ya maha xipanze mitlhanganweni, i fanele ku amukela a xiavelo lexo na ka ha hi mahlweni. Hi zalezo kambe mayelano ni mitlhangano ya simu. Kunene, loku a mitlawa ya simu yi tlhangana yoce, a vawoneleli va mitlawa kutani vavuneteli vabye hi vona va fambisako mutlhangano mitlaweni yabye. Hambulezo, loku a bandla gontlhe gi lava ku maha zinwe mutlhangano wa simu, a muwoneleli wa ntiro i ta avela munhu lezaku a wu fambisa. A vawoneleli vo kari va ntiro va maha longoloko va nyika vafambisi vontlhe va tlhela va wu nameka laha ka kwadru ga zitiviso. A muwoneleli wa ntiro i fanele ku tirisa kupimisisa a xikhati a mahako ziavelo za vafambisi, na a alakanya lezaku a kubuva ka mitlhangano leyo ku ta khegela nguvu kambe ka wuzikoti ga ku gonzisa ni ga ku xaxameta ga lava va yi fambisako. Loku ku hi ni masiku ku nga hava dota, nanza ga wutireli, kutani makabye munwani wa xinuna a bapatizilweko wo ringanelwa kasi ku fambisa mitlhangano ya simu, a muwoneleli wa ntiro i fanele ku avela makabye wa xisati a bapatizilweko loyi a nga ni wutlhari ga ku maha lezo. — Wona a nzima “Loku zi boha ku a makabye wa xisati a fambisa.”

6. Hikuyini zi nga za lisima kuva a mufambisi wa mutlhangano a ti longisela khwatsi?

⁶ Loku hi nyikwa xiavelo Xikoleni xa Wutireli ga Nungungulu kutani Mutlhanganweni wa Ntiro, hi ti karatela ku xi longisela khwatsi. Vatsongwani ka hina va nga wa ta rinzela kala va suka kuya mutlhanganweni kasi ku sangula ku alakanyela lezi va to wula. A xiavelo xa ku fambisa a mutlhangano wa ntiro wa simu xi fanele ku woniswa zalezo. Lezi makunu a mutlhangano wa ntiro wa simu wu tova wo koma, a ku ti longisela khwatsi za lisima nguvu kasi a mutlhangano wu vuna wu tlhela wu mbhela hi xikhati xa kona. A ku ti longisela khwatsi zi patsa kambe ku tiva xipanze xo tirela ka xona na ka ha hi mahlweni.

7. Hi zihi a zilo zo kari lezi a mufambisi a nga wulawulako hi zona?

⁷ Lezi ku nga wulawuliwako hi zona: Kota lezi a xipanze xinwe ni xinwani xi nga ni ziyimo za xona zo hambana, a nanza gi tsumbekileko a gi hi nyiki phepha ga kanelo ya mutlhangano wunwe ni wunwani wa ntiro wa simu. A kwadru “Mutlhanganweni wa ntiro wa simu, u nga tirisa a” gi nyika mawonela yo kari hi nga ma tirisako. Hi tolovelo, a mutlhangano wu ta mahiwa kota mabhulo. Ka zikhati zo kari, wu nga patsa mukombiso wu longiselweko khwatsi kutani vidiyu yi vunako wutirelini yi nga kona loku ka jw.org. A xikhati lexi a longiselako a mutlhangano wa ntiro wa simu, a mufambisi i fanele ku ehleketa hi lezi zi to tiyisa ni ku longisa lava va yako sinwini ka siku lego.

8. Zini zi nga vunako ku wulawula hi zona ka mitlhangano ya ntiro hi Milongiso ni tiSonto?

⁸ Hi xikombiso, hi Milongiso a vahuweleli vo tala va nyikela A Murinzeli ni Despertai! A kutala ka lava va yako wutirelini hi Milongiso a va fambi nzeni ka viki, hikwalaho zi nga ha va karatela ku alakanya zingheniso lezi va vuxetileko Wukhozelini gabye ga Ngango. Hi xigelo lexo, zi nga vuna loku a mufambisi a vuxeta a xinwe xa zingheniso zi nga seno nzhako ka Wutireli ga hina ga Mufumo. A mahela ginwani gi ngava ku wulawula hi ndlela ya ku nghenisa mahungu yo kari ya radu kutani televizawu, ximaho kutani feriado ka xingheniso xa revista kutani ndlela ya ku zima xiseketelo xa lienzo lo wuyela loku a amukela a marevista. Loku va hi kona va sangulileko ku tirisa a marevista lawo ma nyikelwako, a mufambisi a nga ha va kombela lezaku va nyika mawonela matsongwani kutani ku hlawutela matshango ma tiyisako. Hi tiSonto, a mufambisi a nga ha boha ku maha zalezo xungetano hi bhuku legi gi nyikelwako ka hweti leyo. A mabhuku ya xigonzo, yo kota a mabroxura Mahungu yo Saseka ni Ingisa Nungungulu zinwe ni bhuku A Biblia Gi Gonzisako, ma nga nyikelwa ni gihi siku, hikwalaho a mufambisi wa mutlhangano a nga wulawulanyana hi ndlela ya ku ma nyikela.

9. Zini ku nga wulawuliwako hi zona ka kumbhela ka viki loku ku kotlanako ni tsima go hlawuleka ke?

⁹ Loku a bandla gi hi ka tsima go hlawuleka kumbheleni loko ka viki, a mufambisi a nga ha wulawula hi ndlela ya ku nyikela marevista ya hweti leyo zinwe ni xirambo kutani xiphephana lexi xi nyikelwako, kutani ku wulawula hi lezi zi nga mahiwako loku a munhu a kombisa kutsakela. A wonela ginwani ku ngava ku hlawutela matshango ma khanyisako a lisima la matsima lawo.

10, 11. Hikuyini zi nga za lisima kuva a vahuweleli va ti longisela kasi a mutlhangano wa ntiro wa simu wu famba khwatsi?

¹⁰ Kutilongisela ka vahuweleli: A vahuweleli vonawu va maha xipanze kuhumeleleni ka mutlhangano wa ntiro wa simu. Hi ku ti longisela na ka ha hi mahlweni, kuzilava wukhozelini gabye ga ngango, va ta kuma zo bhula ni vahuweleli vanwani. A ku ti longisela khwatsi zi patsa kambe a ku longa a marevista ni mabhuku na u nga se chikela mutlhanganweni wa ntiro wa simu kasi vontlhe va tekela ku suka vaya lomu ku to tirelwa kona na va nga gangi xikhati.

¹¹ Za lisima kambe ku maha makungo ya ku chikela mutlhanganweni wa ntiro wa simu na ka ha sele timeneti ti tsongwani kasi wu sangula. Kunene ha ti karatela ku chikela hi xikhati mitlhanganweni yontlhe ya bandla. Hambulezo, a ku celwa mutlhanganweni wa ntiro wa simu za colopetela nguvu. Hi ndlela muni? Ku na ni zotala lezi a makabye loyi a rangelako a zi alakanyelako na a nga se sangula ku xaxameta a ntlawa. Loku ku hi ni vahuweleli va tsongwani, a nga ha hlawula ku rumela vontlhe ka xipanze xi sinako xi tirilwe xi sala. Loku a vokari va tile hi milenge mitlhanganweni kuveni a xipanze lexi va to tira ka xona xi le kule, a nga ha avela vahuweleli lavo ni lava va tileko hi mimova. Loku xipanzeni lexo ku hi ni wugevenga go tala nguvu, a nga ha avela vamakabye va xinuna lezaku va tira ni vamakabye va xisati kutani kusuhani ni mitlawa ya vamakabye lavo. A vahuweleli va nga ni zitshetshela va nga ha avelwa ku tira ka miti yo kala yi nga lavi ku kwela zikada kutani yi nga hiko na zikada zo tala. A vahuweleli va vaswa va nga ha avelwa ku tira ni vahuweleli vo buva. Kanilezi, loku a vahuweleli vo kari va chikela na va celwe, a kutala ka zikhati zi boha ku cica malulamiselo lawo kasi ku kuma ko veka la’vo celwa. Lisine lezaku hi nga tshuka hi celwa hi xigelo xo zwala. Hambulezo, loku hi tolovela ku celwa, hi nga ha ti wutisa lezaku hi celwa hi ku kala hi nga nyiki lisima a mitlhangano ya ntiro wa simu kutani ho kala hi nga zi koti ku xaxameta khwatsi a zilo za hina na ka ha hi mahlweni ke.

12. Loku u tolovela ku ti mahela malulamiselo ya simu ha wece, zini u nga zi alakanyelako?

¹² A vahuweleli lava va tlhanganako kasi kuya sinwini va nga ha hlawula ku ti mahela malulamiselo na wu nga se sangula a mutlhangano, kutani ku nyikwa munhu wo tira naye. Loku u tolovela ku ti mahela malulamiselo ha wece, xana u nga ‘anamisa’ hi ku tira ni vahuweleli vo hambanahambana ku hunza ku tira ni vanghana valava va vanwe siku ni siku ke? (2 Kor. 6:11-13) U ngata na u hlawula ku tira ni muhuweleli wa muswa kasi ku mu vuna ku engetela wutlhari gakwe ga kugonzisa ke? (1 Kor. 10:24; 1 Tim. 4:13, 15) Demba khwatsi ndleve ka ni xihi xileletelo u nyikwako, a ku patsa ni xileletelo xa laha mu to sangulela kona ku xumayela. A xikhati lexi a mutlhangano wu mbhelako, potsa ku cica munhu loyi u avelweko naye; tekela ku suka uya lomu mu to tirela kona.

13. Loku vontlhe lava va patsekako va chela kota va tlhela va maha xipanze xabye, a mitlhangano ya simu yi ta hi vunisa kuyini?

¹³ Anzhako ka ku xumayela, a 70 wa vapizani lava Jesu a va xaxametileko kasi kuya wutirelini “va lo wuya hi kutsaka.” (Luka 10:17) Handle ko kanakana, a mutlhangano lowu Jesu a wu mahileko navo na va nga se famba wu va vunile ku humelela. Inyamutlha, a mitlhangano ya ntiro wa simu yi ngava ni mabhinzu yalawa ya manwe. Loku vontlhe lava va patsekako va chela kota va tlhela va maha xipanze xabye, a mitlhangano ya ntiro wa simu yi ta hi tiyisa, yi hi longisa, yi tlhela yi hi xaxameta kasi ku tatisa a ntiro wa hina wa ku nyika “wukustumunyu ka matiko wontlhe.” — Mat. 24:14.

A makabye wa xisati i fanele ku fenengeta hloko niku a kutala ka zikhati i ta fambisa mutlhangano wa simu na a tshamile. A mahungu ya ku wulawula hi wona ma fana ni yalawa ma nga tiriswako hi makabye wa xinuna. I fanele ku potsa ku maha ku khwatsi o gonzisa lava va nga kona, kanilezi a nga tirisa mabhulo. Loku a kombela makabye munwani wa xisati a bapatizilweko lezaku a maha mukhongelo, yenawu i fanele ku fenengeta hloko. Loku ku chikela makabye wa xinuna a bapatizilweko na wu sangulile mutlhangano, hi tolovelo a makabye wa xisati i wa ta mu kombela lezaku a mbhetisa mutlhangano lowo. A muwoneleli wa ntiro i fanele ku alakanyela ziyimo lezo zi nga tshukako zi humelela, zonake a nyika zileletelo zi faneleko kasi ku hungula kukarateka. Hi xikombiso, ku nga tshuka ku chikela makabye wa xinuna a bapatizilweko loyi a ha hiko mutsongwani, kuzilava a kalako a nga se chikela tangeni yo sangula ku ti tshotshota, kanilezi a madota ma mu wona na a nga se ringanelwa hi ku fambisa mutlhangano wa simu. Ka xiyimo lexo, a muwoneleli wa ntiro i wa ta tivisa vamakabye lavo lezaku a makabye wa xisati i fanele ku fambisa a mutlhangano, kanilezi loyi wa jaha i ta maha mukhongelo loku a madota ma mu wona na ringanelwa. Kutani ku ngava ni makabye a xinuna a kulileko loyi a nga hiko na malungelo ya ku fambisa mutlhangano wa ntiro wa simu ge hambu ku maha mukhongelo bandleni hi zigelo zi tiviwako hi madota. A ku na xilaveko xa ku wula mahungu lawo ya xihundla, kanilezi a madota ma fanele ku tivisa vamakabye va xisati lava va avelweko ntiro lowo lezaku va fanele ku rangela mutlhangano ni ku maha mukhongelo hambu loku a hi kona. A madota ma nga tivisa makabye loye wa xinuna kambe lezaku hi wahi masiku lawa a mutlhangano wa simu wu to fambiswa hi vamakabye va xisati.

[Mufota ka phajina 4]

A mitlhangano ya ntiro wa simu a yi faneli ku wonelwa hasi kutani ku woniwa yi nga hi ya lisima ku fana ni mitlhangano yinwani ya bandla

[Mufota ka phajina 5]

Loku a longisela mutlhangano wa ntiro wa simu, a mufambisi i fanele ku ehleketa hi lezi zi to tiyisa ni ku longisa lava va yako wutirelini ka siku lego

[Mufota ka phajina 6]

Loku zi boha ku a makabye wa xisati a fambisa

A makabye wa xisati i fanele ku fenengeta hloko niku a kutala ka zikhati i ta fambisa mutlhangano wa simu na a tshamile. A mahungu ya ku wulawula hi wona ma fana ni yalawa ma nga tiriswako hi makabye wa xinuna. I fanele ku potsa ku maha ku khwatsi o gonzisa lava va nga kona, kanilezi a nga tirisa mabhulo. Loku a kombela makabye munwani wa xisati a bapatizilweko lezaku a maha mukhongelo, yenawu i fanele ku fenengeta hloko. Loku ku chikela makabye wa xinuna a bapatizilweko na wu sangulile mutlhangano, hi tolovelo a makabye wa xisati i wa ta mu kombela lezaku a mbhetisa mutlhangano lowo. A muwoneleli wa ntiro i fanele ku alakanyela ziyimo lezo zi nga tshukako zi humelela, zonake a nyika zileletelo zi faneleko kasi ku hungula kukarateka. Hi xikombiso, ku nga tshuka ku chikela makabye wa xinuna a bapatizilweko loyi a ha hiko mutsongwani, kuzilava a kalako a nga se chikela tangeni yo sangula ku ti tshotshota, kanilezi a madota ma mu wona na a nga se ringanelwa hi ku fambisa mutlhangano wa simu. Ka xiyimo lexo, a muwoneleli wa ntiro i wa ta tivisa vamakabye lavo lezaku a makabye wa xisati i fanele ku fambisa a mutlhangano, kanilezi loyi wa jaha i ta maha mukhongelo loku a madota ma mu wona na ringanelwa. Kutani ku ngava ni makabye a xinuna a kulileko loyi a nga hiko na malungelo ya ku fambisa mutlhangano wa ntiro wa simu ge hambu ku maha mukhongelo bandleni hi zigelo zi tiviwako hi madota. A ku na xilaveko xa ku wula mahungu lawo ya xihundla, kanilezi a madota ma fanele ku tivisa vamakabye va xisati lava va avelweko ntiro lowo lezaku va fanele ku rangela mutlhangano ni ku maha mukhongelo hambu loku a hi kona. A madota ma nga tivisa makabye loye wa xinuna kambe lezaku hi wahi masiku lawa a mutlhangano wa simu wu to fambiswa hi vamakabye va xisati.

[Kwadru ka phajina 6]

Mutlhanganweni wa ntiro wa simu, u nga tirisa a:

• Zingheniso zi kumekako ka Wutirelini ga hina ga Mufumo.

• Vidiyu ya lomu ka jw.org yi wulawulako hi wutireli.

• Nchumu wo kari wu mahako xingheniso xi bhinzula, wo kota magezu yo sangula, mhaka yo bhula hi yona ka lienzo lo wuyela, kutani ku kumbuka a lulamiselo ga minyikelo ya kuziranza loku munhu a amukela bhuku.

• Mutsalo wu tiyisako kutani ku gonzisa wu yelanako ni wutireli.

• Tshango ga lomu xipanzeni kutani gi humesilweko ka bhuku go kari.

• Mahungu ma nga ka nzima ya Wutireli ga hina ga Mufumo.

• Mahungu ku wulawulilweko ha wona ka xipanze xa Mutlhangano wa Ntiro.

• Mahungu ma wulawulako hi wutireli lomu ka Murinzeli.

• Mahungu ma wulawulako hi wutireli ma nga ka mabhuku yo kota Escola do Ministério ni “Ngona U Nzi Lanzela.”

• Xipanze xa jw.org lexi xi nga tiriswako wutirelini.

• Mahungu ya xibhukwana Xingheniso ka Mhaka ya Nungungulu.

• Ndlela ya ku sangula bhulo ni munhu loyi mu nga mu kumako xipanzeni xa nwina, wo kota munhu a nga kholwiko ka Nungungulu, munhu a kholwako a evolusawu, muHindu, kutani muBhuda.

• Ndlela ya ku hlamula magezu yo kari va tolovelako ku tsema hi wona bhulo.

• Ndlela ya ku vuna munghana wa wena wa simu lezaku a humelela mabhulweni yakwe ni vanhu.

• Ndlela ya ku xumayela munhu a wulawulako lirimi limbe.

• Ndlela ya ku tirisa a mahela go kari ga wutireli legi a vokari va to gi tirisa, go kota ku lavetela vanhu va wulawulako lirimi lo kari lo kongoma, ku nyikela wukustumunyu hi telefone, wukustumunyu ga laha kubaseni, maenzo yo wuyela, kutani zigonzo za Biblia.

• Xikhumbuxeto xungetano hi kutiwonela, kutlharihisa, wumunhu, kuva ni mawonela ma nene, kutani nchumu wunwani.