MAHANYELA YA WUKRISTU
Lezvi u nga mahako kasi a mitlhangano ya ntiro wo chumayela yi vhuna khwatsi
A ku fana ni mitlhangano leyi yin’wani ya bandla, a mitlhangano ya ntiro wo chumayela i lulamiselo ga Jehovha gi hi vhunako ku kucana, ku randzana ni ku maha mitiro ya yi nene. (Mah. 10:24, 25) Yi fanele ku mahiwa hi 5 kutani 7 wa timinuto basi. Ndzeni ka cikhati leco, ku aviwa vamakabye, va byeliwa lomu va to tirela kona, ni ku maha mukhongelo. (Loku a mutlhangano lowu wu mahiwa andzhako ka mutlhangano wa bandla, a wu faneli ku mbheta cikhati leco.) Loyi a rangelako i fanele ku longisela mahungu ma to vhuna lava va yako kuchumayeleni a siku lego. Hi cikombiso, hi Mulongiso, laha a votala va sangulako kuya kuchumayeleni a cima va famba kumbheleni ka vhiki gi nga hundza, zvi nga vhuna nguvhu a ku tlhamusela lezvi hi nga wulako ka lava hi to va chumayela. Mahungu muni man’wani hi nga ma tirisako ya ku ma nga vhuna?
Hi nga tirisa zvingheniso zva Cibhukwana ca mutlhangano wa Ntiro wa hina ni mahanyela ya wuKristu
Hi nga tlhamusela lezvi hi nga sangulisako zvona bhulo hi ku kumbuka cimaho co kari kutani mahungu yokari ya tiko ma nga haxiwa zvezvi
Hi nga tlhamusela lezvi hi nga wulako ka lava va tolovelako ku hi tsema bhulo
Hi nga tlhamusela lezvi hi nga wulako ka lava va nga kholwiko ka Nungungulu, ka lava va kholwako evholusawu, lava va wulawulako lirimi lin’wani, kutani va wukhongeli go kala ku toloveleka
Hi nga tlhamusela ndlela yo tirisa Bhibhiliya kutani cipandze co kari ca saite jw.org kutani JW Library®
Hi nga tlhamusela ndlela yo tirisa feramenta yo kari ya ku gondzisa hi yona
Hi nga tlhamusela lezvi hi nga chumayelisako zvona hi telefone, mapapilo, lomu ko tala vanhu, ku maha marevhizita, kutani ku fambisa zvigondzo
Hi nga va alakanyisa zvikhumbuxeto zvo kari zvi yelanako ni ku ti wonela, ku kombisa wunene, ku ti zwananisa ni zviyimo, ku kombisa matshamela ma nene kutani zvin’wani
Hi nga tirisa cigondzo co kari ca broxura Ti karatele ku lera khwatsi ni ku gondzisa khwatsi kutani vhidhio ya kona
Hi nga tlhamusela ndlela ya ku tiyisa loyi hi chumayelako naye
Hi nga tlhamusela mutsalo wo kari wu yelanako ni ntiro wo chumayela kutani ku hlawutela tshango go tiyisa ga ntiro wo chumayela