Mitlhangano Ya Ntiro Wa Simu

1. Hikuyini hi khatalako nguvu hi kuya ntirweni wa simu hi ndlela yi xaxametilweko?

¹ Jesu i nyikile xikombiso xa ku khatalela a ntiro wa kuxumayela a Mufumo hi ndlela yi xaxametilweko ni yi pswalako mihanzu. Hi kufanana inyamutlha, lava va nga ni wutihlamuleli ga tsima legi ga misava yontlhe ga ku xumayela a Mufumo va xuva nguvu a ku wona a ntiro lowu na wu mahiwa hi ndlela yo fana ni leyo. Hi kuyelana ni kutikarata loko, a mabandla misaveni yontlhe ma tirisa mitlhangano ya ntiro wa simu kota yinwe ya tindlela ta ku xaxameta a mitlawa ya vaxumayeli va Mufumo lezaku vaya ntirweni wa simu. — Mat. 24:45-47; 25:21; Luka 10:1-7.

2. Zini zi rinzelwako mitlhanganweni ya ntiro wa simu?

² I Lulamiselo Gi Nene: A mitlhangano ya ntiro wa simu yi mahelwe ku tiyisa, ku nyika zileletelo, ni ku kongomisa lava va lavako kuya ntirweni wa simu. A mutsalo wa siku wu nga ha kambisiswa hi kukomisa loku zi woneka kubaseni lezaku wa zwanana ni ntiro wa simu. Ka zikhati zo kari, a zialakanyiso zi nga ka Wutireli Ga Hina Ga Mufumo, bhuku Raciocínios, kutani bhuku Escola do Ministério za kambisiswa kasi ku hlomisa vontlhe lava va nga kona ntirweni a siku lego. Ku nga ha tlhela ku mahiwa a mukombiso wo koma wa bhuku legi gi nyikelwako. Mahlweni ka mukhongelo wo gumesa, vontlhe va fanele ku tiva loyi va ta nga tira naye wutirelini zinwe ni xipanze lexi va to tira ka xona. Xikhatanyana nzhako ka mutlhangano lowu wu nga hunzisiko a 15 wa timeneti, vontlhe va fanele ku ngha va ti yela xipanzeni xabye.

3. Himani a nga ni wutihlamuleli ga ku xaxameta a mitlhangano ya ntiro wa simu?

³ Xana Yi Xaxametiswa Kuyini? A muwoneleli wa ntiro, hi yena a nga ni wutihlamuleli ga ku xaxameta a mitlhangano ya ntiro wa simu. A vawoneleli va mitlawa kutani vavuneteli vabye va na ni wutihlamuleli ga ku famba zinwe ni mitlawa yabye ya ntiro wa simu kumbheleni ka viki. A vawoneleli vo kari kutani malanza ya wutireli va nga ha zi kota a ku famba zinwe ni mitlawa yabye ya ntiro xikari ka viki. A vawoneleli va mitlawa va tirisana khwatsi ni muwoneleli wa ntiro kasi va kuma a xipanze xi enelako ku tiriwa hi ntlawa wabye kumbheleni ka viki. Xikari ka viki, a muwoneleli wa ntiro i ta byela lava va to rangela a mitlawa ntirweni wa simu lezi a ntiro wu faneleko ku fambisa zona.

4-6. (a) Xungetano hi xipanze xa bandla, hi gihi a kungo ga mitlhangano ya ntiro wa simu? (b) Zini zi nga kambisiswako kasi ku wona a xilaveko xa mitlhangano ya ntiro wa simu?

⁴ Xana Yi Fanele Ku Mahiwa Kwihi Niku Rini? Wutshanwini ga lezaku a bandla gontlhe gi tlhangana ka wutshamu ginwe, i chukwana a ku maha malulamiselo ya lezaku a mitlhangano leyo yi mahiwa ka matshamu ma faneleko, hi tolovelo lomu mitini yi nga xipanzeni xa nwina kasi a xipanze lexi xi lumbako bandla xi fela ku tiriwa hi kumbhelela. A maSalawu ya Mufumo wonawo ma nga tiriswa. A mabandla yo tala ma tirisa a Salawu ya Mufumo lezaku mava ni mutlhangano wa ntiro wa simu xikhatanyana nzhako ka kumbhela ka kanelo wabye wa laha kubaseni ni Xigonzo xa A Sentinela hi Sonto. Ku fanele ku mahiwa mizamo kasi ku hungula a pfhuka wa ku suka hi laha mutlhanganweni muya xipanzeni lexi mu to tira ka xona. Hikwalaho, a malulamiselo lawo ma nga ha vuxetiwa hi xikhati ni xikhati kasi ku tiyiseka lezaku a matshamu lawa ma tiriswako zalezi ma ha simama kuva yo faneleka lezaku a xipanze xi tiriwa hi ndlela yi nene ni yo mbhelela.

⁵ A xikhati xi faneleko xa kumahiwa ka mitlhangano leyo ni lezi a kutala ka zikhati yi faneleko ku fambisiswa zona nzeni ka viki kutani ka siku go kari zi khegela ka matshamela ya xipanze. A ziwutiso lezi zi lanzelako zi nga ha vuna a ku hlawula a wutshamu ni xikhati xa chukwana xa ku maha a mitlhangano ya ntiro wa simu.

⁶ Hi gihi a wutshamu legi gi faneleko ku tiriwa nguvu? Hi xihi a xikhati xa chukwana xa ku tira hi muti-ni-muti? Xana za fanela a ku yimisa xikhati xo kari ni gambo kasi ku tira hi muti-ni-muti kutani ku maha maenzo yo wuyela? A malulamiselo wontlhe ya ntiro wa simu ma fanele ku namekiwa laha ka kwadru ga zitiviso za bandla. A vahuweleli vontlhe va Mufumo va navela ku eneta a xipanze xabye xontlhe lexi va avelweko xona kasi va wula a magezu yo fana ni ya mupostoli Paule, a xikhati a ngaku: ‘A nza ha hi na ntiro’ ka matiko lawa. — Rom. 15:23.

7. Hi gihi a wutihlamuleli ga loyi a nyikilweko xiavelo xa ku rangela a ntlawa wa ntiro wa simu?

⁷ Mafambisela Ya Mitlhangano Ya Ntiro Wa Simu: Loyi a nyikilweko xiavelo xa ku fambisa a mutlhangano lowu i kombisa a xichawo xa hombe hi lulamiselo legi ga Nungungulu hi ku ti longisela khwatsi. A mitlhangano leyi yi fanele ku sangula hi xikhati xi yimisilweko ni kuva yo koma, ya 10 kuya ka 15 wa timeneti. Loyi a ta nga fambisa wona i fanele ku xi tiva na ka ha hi mahlweni a xipanze lexi xi to tiriwa hi ntlawa na mutlhangano wu nga se sangula. Hambu lezi ku nga hiko na xilaveko xa ku rinzela lava va to celwa, za vuna a ku siya xitiviso xa laha a ntlawa wu to tira kona. Vontlhe va fanele kuya xipanzeni lexi va avelweko xona zalezo a mutlhangano wu mbhelako. A mutlhangano wa ntiro wa simu lowu wu mahiwako hi ku lanzela a zileletelo lezi handle ko kanakana wu vuna vontlhe lava va nga kona lezaku va tatisa a wutireli gabye ka siku lego. — Mav. 11:14.

8. Xana lava va tako mitlhanganweni ya ntiro wa simu va nga tirisanisa kuyini ni lava va rangelako?

⁸ Kuva Kona Mitlhanganweni Ya Ntiro Wa Simu: A ku tirisana za lisima nguvu. (Maheb. 13:17) Loyi a rangelako a ntlawa i ta vuna wihi ni wihi a lavako a wa ku tira naye, hi laha zi kotekako ha kona. Zi nene lezaku a vahuweleli lava va buvileko vava kona kasi ku vuna a vahuweleli lava va ha hiko vaswa, va kalako va nga se buva. Lava va tshamako na va ti yimisele a ku tira ni wihi loyi va aviwako naye, va nyika a xivuno xa hombe nguvu. (Mav. 27:17; Rom. 15:1, 2) Vontlhe va fanele ku ti karatela nguvu a ku chikela hi xikhati. A xichawo hi nga naxo hi lulamiselo legi ga Nungungulu zinwe ni kukhatala ka hina hi vatiri-kulori zi ta hi kuca a ku chukwatisa ni xihi xi lavekako mhakeni leyi. — 2 Kor. 6:3, 4; Fil. 2:4.

9. Xana a maphayona ma nga seketelisa kuyini a lulamiselo legi?

⁹ Xivuno Xa Maphayona: A xivuno xa maphayona ka mitlhangano ya ntiro wa simu xa lisima niku xi tiyisa vontlhe. Za zwisiseka lezaku a maphayona ma na ni wutihlamuleli ginyingi. Ahandle ka ku fambisa a zigonzo za Biblia, ni ku maha maenzo yo wuyela, a mitiro yabye ya siku ni siku yi nga ha patsa ku khatalela a wutihlamuleli ga ngango kutani ntiro wa kutihanyisa. Hi kota ya lezo, a maphayona a ma faneli ku tizwa na ma rinzelwa a kuva kona ka mutlhangano wihi ni wihi wa ntiro wa simu wu longiselweko hi bandla, nguvunguvu loku ku hi lezaku a mitlhangano leyo yi mahiwa siku ni siku. Hambulezo, kuzilava zi nga koteka lezaku a maphayona mava kona ka mitlhangano yo kari ya ntiro wa simu viki ni viki hi wutsongwani ga kona. Hi ndlela yo kari, a mitlhangano ya ntiro wa simu yi gonzisa a ziro za bandla, niku a wumoya ga maphayona zinwe ni kubuva ka wona zi ngava xivuno xa hombe ka vanwani. A kuva kona kabye ntirweni wa simu hi kukhanzakanya ku va mahile va buva wutirelini. A kubuva loko ku nga hlengelwa ni vanwani. A kuhlengela kabye hi kuhiseka wutirelini ni mitlhanganweni ya ntiro wa simu zi va maha vava xikombiso xi faneleko ku pimanyiswa. Niku a kuvakona kabye mitlhanganweni leyo ya ntiro ka bongiwa.

10. Hikuyini zi faneleko lezaku a vahuweleli vontlhe va Mufumo va seketela hi mbilu yabye yontlhe a lulamiselo legi?

¹⁰ Kota lezi a nga maha Jesu ni vapizani vakwe, a xipanze xa hombe xa ntiro wa hina wa kuxumayela a Mufumo xi mahiwa hi ku kustumunya hi muti-ni-muti. A mitlhangano ya ntiro wa simu yi mahelwe lezaku hi tiyisana ni kuva hi hlengela khwatsi ntirweni lowu. A vahuweleli vontlhe va mahungu yo saseka va fanele ku seketela nguvu a malulamiselo lawo ya Nungungulu hi laha va zi kotako hi kona. (Miti. 5:42; 20:20) Ngha hina hontlhe hi seketela hi mbilu ya hina yontlhe a lulamiselo legi. Hi ku maha lezo, ha zi kota ku tiyiseka lezaku hi ta amukela a makatekwa ya Jehova niku hi ta maha a mbilu ya Murangeli wa hina, Jesu Kristu, yi tsaka a xikhati lexi hi xumayelako a mahungu yo saseka ya Mufumo wa Nungungulu. — Mat. 25:34-40; 28:19, 20.