U nga vunekisa kuyini ka ntlawa wa nwina wa ntiro wa simu?
1. Zivuno muni za kale ka Xigonzo xa Bhuku xa Bandla lezi za ha hiko kona ntlaweni wa hina wa ntiro wa simu?
1 Xana wa vilela zokari zi nga hi kona xikhatini xa Xigonzo xa Bhuku xa Bandla? A mitlawa ya xigonzo lexo yi wa hi yi tsongwani niku hontlheni hi wa tizwa na hi tlhatlhekile. Lezo zi wa hi vuna a ku maha vanghana lava va nga kari va hi tiyisa hi tlhelo ga moya. (Mav. 18:24) A muwoneleli wa xigonzo xa bhuku i wa tiva a xiyimo xa lisine xa munwe ni munwani wa hina a tlhela a hi tiyisa hi kuya hi xilaveko xa hina wutsumbu. (Mav. 27:23; 1 Ped. 5:2, 3) A zivuno lezo za ha hi kona ntlaweni wa ntiro wa simu.
2. Xana hi nga maha yini kasi ku maha vanghana ntlaweni wa hina wa ntiro wa simu lava va to hi tiyisa ni ku hi seketela hi tlhelo ga moya?
2 Maha xokari: A mitlawa ya ntiro wa simu yi tolovela kuva ni ntsengo wa vahuweleli wo fana ni kale ka mitlawa ya xigonzo xa bhuku. Hi maha wunghana ga hombe ni vanwani hi ku tira navo sinwini “hi mbilu yinwe.” (Fil. 1:27) Vangani ntlaweni wa nwina u tshukileko u huma navo simu? Xana u nga ‘anamisa a mbilu’ mhakeni leyi? (2 Kor. 6:13) Ahandle ka lezo, ha zi kota kuta na hi ramba munhu wa ntlawa wa hina lezaku a ta hlengela na hina Wukhozelini ga hina ga Ngango kutani kuga zinwe naye. Ka mabandla yo kari, a mitlawa ya ntiro wa simu ya cicisana lezaku yi nyika zakuga a vakaneli va enzelako bandla. Ka viki legi wu avelweko ku bhika hi gona, a ntlawa wa tlhangana lezaku wuga zinwe ni ku tiyisana hambu loku a mukaneli a tsanzeka ku tshama aga.
3. Hi rini hi nga ni lungelo ga ku risiwa ntlaweni wa hina ntiro wa simu?
3 Hambu lezi a bandla makunu gi tlhanganako kumbiri ntsena hi viki, a zi wuli ku a vahuweleli va fanele ku risiwa kutsongwani. A vawoneleli va mitlawa va yimiswa ka ntlawa wunwe ni wunwani lezaku va tiyisa ni ku gonzisa a ntiro wa simu a xiro xinwe ni xinwani xa ntlawa. Loku a muwoneleli wa ntlawa a nga se ku ramba lezaku mu huma zinwe simu, hikuyini u nga kombeliko ku tira naye? Ahandle ka lezo, a muwoneleli wa ntiro i huma simu ni ntlawa wo kari kumbheleni ka viki ginwe hweti ni hweti. Ka mabandla ya ma tsongwani lomu ku nga ni mitlawa yitsongwani ya ntiro wa simu, yena a nga ha enzela a ntlawa ni ntlawa kumbiri hi lembe. Xana wa maha malulamiselo ya kuya ntirweni wa simu a xikhati lexi a enzelako a ntlawa wa nwina?
4. (a) Yi mahiswa kuyini a mitlhangano ya ntiro wa simu? (b) Hikuyini hi faneleko ku alakanyela ku hendleleta a muti wa hina lezaku ku mahiwa kona mitlhangano ya ntiro wa simu?
4 Za vuna nguvu lezaku a ntlawa wunwe ni wunwani wu huma simu woce kumbheleni ka viki. A kuva ni matshamu yo hlaya ya ku tlhangana kona kasi ku huma simu hi xikhati xa xinwe zi nga olovisela vahuweleli kuya mutlhanganweni wa simu ni xipanzeni xa kuxumayela. A vahuweleli va nga aviwa hi xihatla va tlhela va tekela kuya xipanzeni xa kuxumayela. Niku zi ta olovela a muwoneleli wa ntlawa a ku khatalela khwatsi a vahuweleli va ntlawa wakwe. Kanilezi, kuzilava ku nga ha humelela ziyimo lezi zi kurumetako mitlawa yimbiri kutani kuhunza lezaku yi patsana kuhumeni ka simu. Loku a bandla gontlhe gi tlhangana lezaku gi huma simu hi Mulongiso wo sangula wa hweti kutani anzhako ka Xigonzo xa A Murinzeli, za vuna a ku lava va lumbako ntlawa wunwe va tshama zinwe zonake a muwoneleli wa ntlawa a nyikwa timeneti to kari lezaku a ava vanhu vakwe na mutlhangano wa simu wu nga se gumesa hi mukhongelo. — Wona a kwadru “Xana u nga hendleleta a muti wa wena?”
5. Hambu lezi a lulamiselo ga Xigonzo xa Bhuku xa Bandla gi gumesileko, xini hi faneleko ku xi tsumba?
5 Hambu lezi a lulamiselo ga Xigonzo xa Bhuku xa Bandla gi gumesileko, Jehova wa ha simama ku hi nyika zontlhe lezi hi zi lavako kasi ku maha a kuranza kakwe. (Maheb. 13:20, 21) Loku hi hi mandleni ya Jehova a hi vumali nchumu. (Tis. 23:1) Ha kuma makatekwa yo tala ntlaweni wa hina wa ntiro wa simu. Loku hi ti yimisela ku ‘xwanya nguvu,’ hi ta “tshovela nguvu” kambe. — 2 Kor. 9:6.
[Tlhamuselo wa mifota ka phajina 6]
Xana u nga hendleleta a muti wa wena?
A mabandla yo kari ma patsa a mitlawa ya ntiro wa simu kumbheleni ka viki hi kuvumaleka ka miti ya ku tlhanganela kona. A mitlhangano ya ntiro wa simu i lulamiselo ga bandla, hikwalaho i lungelo ga hombe a kuva yi mahelwa mutini wa hina. Xana u nga hendleleta a muti wa wena? U nga kanakani ku hendleleta a muti wa wena hi ku alakanya lezaku a wu na matshamela ya chukwana. A madota ma ta khatalela a wutshamu legi a muti wa wena wu kumekako kona ni zinwani ziyimo zo fana ni lezi va nga kari va zi khatalela loku va hlawula matshamu ya mahela kona a xigonzo xa bhuku. Loku u zi lava ku hendleleta a muti wa wena byela a muwoneleli wa wena wa ntlawa.