Tindlela ta ku xumayela mahungu yo saseka

KOTA muhuweleli wo hiseka wa mahungu yo saseka, Jesu i va vekele xikombiso a valanzeli vakwe. I wa yela vanhu, a bhula navo, a va gonzisa mitini yabye ni ka matshamu ya laha kubaseni. (Mat. 9:35; 13:36; Luka 8:1) Jesu i wa bhula ni vanhu hi munwe munwe, a gonzisa vapizani vakwe xihundleni, a tlhela a gonzisa mitlawa yi nga hi ni vanhu vo tala. (Mar. 4:10-13; 6:35-44; Joh. 3:2-21) I wa lonzowota ni wihi mole wu nga mu vululekela kasi a wula magezu ma tiyisako-hlana ni ma nyikako kutsumba. (Luka 4:16-19) Hambu loku a lava ku humulanyana, i wa nga tsiki lungelo ga ku nyika wukustumunyu gi hunza. (Mar. 6:30-34; Joh. 4:4-34) Loku hi gonza matimu ma pimisilweko ya wutireli ga Jesu, xana a hi kuceki ku mu pimanyisa? A ku fana ni vapostoli, handle ko kanakana hinawu ha kuceka. — Mat. 4:19, 20; Luka 5:27, 28; Joh. 1:43-45.

² Ehleketa hi malungelo lawa a maKristu inyamutlha ma nga nawo kasi ku hlengela ntirweni wu sangulilweko hi Jesu Kristu kwalomo ka 2.000 wa malembe ma hunzileko.

KU XUMAYELA HI MUTI NI MUTI

³ Kota Timboni ta Jehova, ha li tiva a lisima la ku xumayela a mahungu yo saseka ya Mufumo hi muti ni muti. Kusukela kale hi tirisa ndlela leyi ya ku xumayela niku hi yona yi hi tivekisako. A wutlhari ga ku tirisa a ndlela leyi kasi ku kuma vanhu va timiliyoni hi xikhati xi tsongwani ga woneka ka mihanzu yo tsakisa leyi gi pswalako. (Mat. 11:19; 24:14) A ku xumayela hi muti ni muti i ndlela yi nene ya ku kombisa liranzo la hina ha Jehova ni vaakelani va hina. — Mat. 22:34-40.

⁴ A ku xumayela hi muti ni muti a hi mahela gi vangilweko hi Timboni ta Jehova ta masikwini ya hina. Mupostoli Paule i wulile lezaku i wa gonzisa mitini ya vanhu. Na a tlhamusela a wutireli gakwe ka madota ya le Efesusi, i te ngalo: “Kusukela siku lego nzi nga chikela le Asia, . . . a nzi mu fihlelangi a timhaka ti vunako, kanilezi nzi lo mu kanelela, nzi mu gonzisa . . . hi muti ni muti.” Hi ku tirisa ndlela leyi ni tinwani, Paule i lo xumayela “vaJuda ni vaGreki lezaku va ti sola ka Nungungulu, ni kukholwa ka Hosi ya hina Jesu Kristu.” (Miti. 20:18, 20, 21, NM) Ka xikhati lexo, a mifumo ya Roma yi wa vuvumisa ku khozela zifananiso, niku a kutala ka vona va wa “khozela nguvu vanungungulu.” Zi wa hi za xihatla lezaku a vanhu va hlota a “Nungungulu loyi a nga maha misava ni zontlhe zi nga ka yona,” loyi makunu a nga kari a “laya vanhu vontlhe, a matshanwini wontlhe, lezaku va hunzuluka.” — Miti. 17:22-31.

⁵ Inyamutlha, za xihatla nguvu a ku xumayela mahungu yo saseka ka vanhu hakuva a kuloviswa ka tiko legi go biha ku laha kusuhani. Hi ku wona xilaveko lexi, ha kuceka ku engetela mizamo ya hina. A ku na ndlela yinwani ya chukwana ya ku hlota vanhu lava va nga ni ndlala ya lisine a ku hunza leyi hi yi tirisako kusukela kale — ku nga ku xumayela hi muti ni muti. A ku fana ni masikwini ya Jesu ni ya vapostoli, a ndlela leyi ya ha pswala mihanzu. — Mar. 13:10.

⁶ Xana wa xumayela hi muti ni muti hi kuhiseka? Loku zi hi tano, tiyiseka lezaku Jehova wa xalala nguvu hi wena. (Ezek. 9:11; Miti. 20:35) Kuzilava a ku xumayela hi muti ni muti a zi ku oloveli. Za koteka ku ngha u hi ni kugumelwa ko kari, kutani ku ngha u xumayela ka xipanze lexi a vanhu vo tala va nga khataliko hi mahungu ya wena. Za koteka kambe ku ngha u xumayela ka xipanze lexi a mufumo wu beletelako. Kuzilava u na ni tingana, niku za ku karatela nguvu a ku sangula mabhulo ni munhu u nga mu tiviko. Hikwalaho, khati ni khati u xumayelako hi muti ni muti, wa karatekanyana. U nga mbheli ntamu. (Ekso. 4:10-12) A xiyimo xa wena xa fana ni xa vamakabye va wena va nga matshanwini yo tala.

⁷ Jesu i tsumbisile vapizani vakwe aku: “Nzi na nwina a masiku wontlhe, kala kugumeseni ka tiko.” (Mat. 28:20, NM) A xitsumbiso lexo xa hi tiyisa ntirweni wa hina wa ku maha vapizani. Hi ti zwisa ku khwatsi hi mupostoli Paule, loyi a ngaku: “Nza zi kota ku maha zilo zontlhe hi kota ya loyi a nzi tiyisako.” (Fil. 4:13, NM) Lonzowota khwatsi a malulamiselo ya bandla ya ku xumayela hi muti ni muti. Loku u tira ni vanwani, u ta tiyiswa hlana u tlhela u kuma xivuno. Khongela u kombela xivuno xa ku hlula ni xihi xihingakanyiso u nga ha kumanako naxo, u tlhela u ti karatela kuva muxumayeli wo hiseka wa mahungu yo saseka.— 1 Joh. 5:14.

⁸ A xikhati u bhulako ni vanwani hi mahungu yo saseka, u tava ni lungelo ga ku va byela a ‘xigelo xa kutsumba loku u nga nako.’ (1 Ped. 3:15) U taya u ku wona khwatsi a kuhambana ku nga kona xikari ka lava va rinzelako lezaku a Mufumo wa Nungungulu wu maha xokari ni lava va nga hiko na kutsumba. (Isa. 65:13, 14) U tava ni kuxalala hi ku tiva lezaku u ingisile a xileletelo xa Jesu xaku: “Ngha na kuwonekela ka nwina ku woninga,” niku kuzilava u tava ni lungelo ga ku vuna vanwani lezaku va tiva Jehova ni lisine leli li yisako wutomini ga pinzukelwa. — Mat. 5:16; Joh. 17:3; 1 Tim. 4:16.

⁹ Xikari ka viki ni kumbheleni ka gona ka mahiwa malulamiselo ya lezaku hi xumayela hi muti ni muti. Ka zipanze lezi zi karatako ku kuma vanhu laha kaya ni mumu, a mabandla yo kari ma maha malulamiselo ya ku xumayela ni wusikwana. A vanhu va nga ha byekelela ku amukela vapfhumba ni gambo kutani ka tihora to sangula ta wusiku wutshanwini ga ni mixo.

HLOTA VANHU VA TIMBILU TI NENE

¹⁰ Jesu i gonzisile vapizani vakwe a ku hlota vanhu va timbilu ti nene. (Mat. 10:11) A ku hlota kakwe a vanhu lavo ku wa nga gumelwi ka wutireli ga muti ni muti. Kunene, i wa nyika wukustumunyu ga laha kubaseni ni ga xitshuketi ka ni xihi xikhati zi nga fanela. (Luka 8:1; Joh. 4:7-15) A vapostoli vonawu va wa nyika wukustumunyu ka matshamu yo hambanahambana. — Miti. 17:17; 28:16, 23, 30, 31.

¹¹ Hi kufanana, a kungo ga hina ku xumayela a muhungu ya Mufumo ka ni wihi munhu zi kotekako. Lezi zi wula ku pimanyisa a ndlela leyi Jesu ni vapostoli vakwe va nga tatisa ha yona a ntiro wa ku maha vapizani ni ku tlhela hi tiva a ku cicacica ka zikhati ni ziyimo za vanhu va lomu xipanzeni xa hina. (1 Kor. 7:31) Hikwalaho, ha xumayela kambe laha kubaseni ka xipanze lexi xi lumbako a bandla ga hina. (Miti. 20:20) A vahuweleli va bhinzula nguvu hi ku xumayela mabazarini. A wukustumunyu ga lomu maruweni ga pswala mihanzu matikweni yo tala, a ku fana ni wukustumunyu ga lomu maparki, laha ku nyimako mimova, kutani ka matshamu manwani ku nga ni vanhu. A mabandla yo kari ma ti vekela timeza kutani zikarinyana zo kombisa mabhuku xipanzeni xabye. Tlhatakumbiri, a hofisa ya ravi yi nga ha maha a malulamiselo ya lezaku a vahuweleli va mabandla yo tala va hlengela tsimeni go hlawuleka ga ku nyika wukustumunyu ga laha kubaseni madoropeni ku fambafambako nguvu vanhu. Kota wuyelo ga lezo, a vanhu lava va vumaliwako mitini yabye, va nga ha xumayelwa ni ka gihi wutshamu.

¹² A ku nyikela A Murinzeli ni Despertai! i ndlela yinwani yi bhinzulako ya ku nyika wukustumunyu ga laha kubaseni. Hi nga tshinelela vanhu hi ndlela ya xichawo hi bhula navo hi mhaka yo kari yi chikeleko hi xikhati xi faneleko leyi yi tlhamuselwako ka ginwe ga marevista ya hina. Kutani ku va nyika mabhuku manwani. Anzhako ka lezo, hi nga maha malulamiselo ya ku va tlhelela mitini yabye. Kuzilava a ku nyika a wukustumunyu ga laha kubaseni yi tava ndlela yo tsakisa ya ku engetela a wutireli ga wena.

¹³ Hambulezo, a ku xumayela mahungu yo saseka a hi zona basi zi patsekako ka ntiro lowu wu nyikilweko maKristu inyamutlha. Loku u lava ku humelela ntirweni wa ku vuna vanhu lezaku va amukela lisine leli li yisako wutomini, u fanele ku tlhelela hi kuphindaphinda lava va tsakelako kasi va kula vava maKristu yo buva.

KU MAHA TIENZO TO WUYELA

¹⁴ Jesu i te ngalo ka valanzeli vakwe: “Mu ta maha vakustumunyu va mina . . . ku kala le magemeta-musi ya misava.” (Miti. 1:8) Kanilezi, i tlhelile a va byela lezi: “Hikwalaho fambani, mu va maha vapizani a matiko wontlhe . . . mu va gonzisa a ku hlayisa zontlhe lezi nzi mu layileko zona.” (Mat. 28:19, 20, NM) A ku maha tienzo to wuyela zi nga hi nyika litsako la hombe nguvu ntirweni wa Jehova. A vanhu lava va tekelako ku tsakela a mahungu yo saseka loku va mazwa hi khati go sangula, va nga ha tsaka loku u va enzela kambe. Laha mu yako mu bhula hi timhaka to engeteleka ta Biblia, kuzilava u ta tiyisa a kukholwa loku va nga nako ha Nungungulu u tlhela u va vuna a ku wona lezaku va na ni ndlala ya moya. (Mat. 5:3) Loku u ti longisela khwatsi u tlhela u va tlhelela hi xikhati xa xi nene ka vona, kuzilava u ta sangula a xigonzo xa Biblia. Handle ko kanakana a ku sangula a zigonzo za Biblia zi fanele kuva gona kungo ga wena a xikhati lexi u mahako a tienzo to wuyela. Hina a hi byali lisine ntsena timbilwini ta vanhu kanilezi ha tlhela hi li cheletela mati. — 1 Kor. 3:6.

¹⁵ A ku maha tienzo to wuyela zi nga ha karatela vokari. Kuzilava lezi u zi toloveleko ni ku zi ranza ku xumayela hi muti ni muti. Kanilezi loku u ehleketa hi ku tlhelela a nwinyi wa muti kasi mu ya bhula zo engeteleka hi Biblia, zi nga ha ku tlhatlha ni misisi. U nga ti zwisi lezo! Kuzilava, ka khati go sangula u nga enzela munhu loye u mu siyele a mabhuku yo kari ma seketelweko ka Biblia. Hikuyini mu nga bhuliko hi mhaka yo kari yi nga nzeni ka mabhuku lawo? U nga ha longisela a mabhulo lawo na ka ha hi mahlweni. Loku u chava, kombela muhuweleli wo buva lezaku a ku pangalata.

KUFAMBISA ZIGONZO ZA BIBLIA

¹⁶ Na a wulawula ni muEtiopia a nga kari a gonza a Mhaka ya Nungungulu, Filipu i te ngalo kakwe: “Xana wa zi zwisisa lezi u zi gonzako?” A wanuna loye i lo hlamula aku: “Nzi nga zi zwisisa hi ndlela muni na nzi nga hi na mutlhamuseli?” A matimu ya bhuku ga Mitiro xipimo 8 ma hi komba lezaku Filipu i lo sangula hi mutsalo walowu a wanuna loye a nga kari a gonza kasi ku mu “gonzisa a mahungu yo saseka xungetano hi Jesu.” (Miti. 8:26-36, NM) A hi xi tivi hi kukongoma a xikhati lexi Filipu a mbhetileko na a mu gonzisa, lexi hi tiyisekako ku a wanuna loye i tlhamuselwe mahungu yo saseka laha kuza ava mukholwa a tlhela a kombela ku bapatizwa. A wanuna loye i lo maha mupizani wa Jesu Kristu.

¹⁷ A kutala ka vanhu a va tivi zotala hi Biblia, hikwalaho zi nga ha lava lezaku hi gonza navo hi maviki, tihweti, lembe, hambu ni ku hunza na va nga se tiyisa a kukholwa kabye ni ku ringanelwa hi kubapatizwa. Kanilezi a lihlaza-mbilu leli u li kombisako a xikhati lexi u vunako a vanhu va timbilu ti nene lezaku vava vapizani la chachazelwa kota lezi Jesu a wulileko aku: “Ku katekile ku nyika ku hunza ku nyikiwa.” — Miti. 20:35.

¹⁸ Handle ko kanakana wa zi ranza ku fambisa a xigonzo xa Biblia hi ku tirisa a ginwe ga mabhuku ya hina lawa ma mahelweko ku fambisa zigonzo za Biblia. Loku u lanzela a xikombiso xa loyi a ku gonzisileko a Biblia, u ta zi kota ku fambisa a zigonzo zi pswalako mihanzu, hi ndlela leyo u vuna vanwani lezaku vava vapizani va Jesu Kristu.

¹⁹ Loku u nga zi tivi lezi u nga xi fambisisako zona xigonzo xa Biblia, kombela a dota kutani Mboni yinwani yi humelelako kufambiseni ka zigonzo za Biblia lezaku yi ku vuna. U nga vuneka kambe hi mawonela ma kombisiwako mutlhanganweni hi ku tirisa a Xibhukwana xa Mutlhangano wa Ntiro ni Mahanyela. Tsumba Jehova, u tlhela u mu byela kuxuva ka wena hi mukhongelo. (1 Joh. 3:22) Za koteka ku ngha u gonza Biblia ni vanhu va laha kaya, kanilezi loku zi koteka ti karatele ku sangula xigonzo xa Biblia ni vanhu vanwani laha va yileko. Loku u fambisa zigonzo za Biblia, u ta engetela litsako la wena wutirelini.

KONGOMISA LAVA VA TSAKELAKO HLENGELETANWENI YA JEHOVA

²⁰ A vanhu lava hi va vunako a ku tiva Jehova Nungungulu ni kuva vapizani va Jesu Kristu hi magumo va maha ziro za bandla. A zigonzani za Biblia zi ta kula khwatsi hi tlhelo ga moya loku zi vumela lezaku leyi i hlengeletano ya Jehova zi tlhela zi tirisana khwatsi nayo. Va tlhamusele a lisima la ku maha lezo. A tividiyu ni broxura Hi vamani va mahako a kuranza ka Jehova inyamutlha? zi mahelwe ku vuna a zigonzani a ku tiva a hlengeletano ya Jehova. A mahungu yo kari ma nga ka Xipimo 4 xa bhuku legi wonawu ma nga vuna.

²¹ Neti u sangula ku bhula ni munhu hi Biblia, mu vune a ku wona lezaku Jehova i kari a tirisa a hlengeletano yo kari lezaku yi xumayela a mahungu yo saseka misaveni yontlhe. Mu kombe a lisima la mabhuku lawa hi ma tirisako kasi ku gonza Biblia, u tlhela u mu tlhamusela lezi ma mahisiswako zona ni lezi ma aveliswako zona hi vanhu vo zi ranza lava va ti hendleletileko ka Nungungulu. Mu rambe lezaku ata mitlhanganweni. Loku ata, ti nyike xikhati xa ku mu tlhamusela lezi a mitlhangano yi mahiswako zona ni ku mu tivekisa ka vanghana va wena. Kunene, loku mu hi ka mitlhangano ya hombe kutani ka migotsovanyano, u ta mu vuna a ku tivana ni Timboni tinwani. Ka mitlhangano leyo ni ka zimaho zinwani, mu tsike a ti wonela hi yakwe mahlo a liranzo li nga kona xikari ka vanhu va Jehova — leli li nga xifungo xi tivekisako a maKristu ya lisine. (Joh. 13:35) Laha a yako a yi tsakela nguvu a hlengeletano ya Jehova, a wunghana gakwe na Jehova gi ta tiya nguvu.

TIRISA MABHUKU MA SEKETELWEKO KA BIBLIA

²² A maKristu yo sangula ma vile vahuweleli vo hiseka va Mhaka ya Nungungulu. Ma wa kopiyara a Mitsalo kasi ku yi tirisa vona wutsumbu ni ku yi tirisa bandleni. Ma lo kuca vanwani lezaku va kambisisa a lisine li nga Mhakeni ya Nungungulu. A mapapilo lawo yo tsaliwa hi mandla ma wa hi matsongwani kanilezi ma wa hi ya lisima nguvu. (Kol. 4:16; 2 Tim. 2:15; 3:14-17; 4:13; 1 Ped. 1:1) Inyamutlha, a Timboni ta Jehova ti tirisa a michini yo gandla ya masikwana lawa kasi ku humesa a timiliyoni ta maBiblia ni mazanazana ya timiliyoni ta mabhuku yo gonza hi wona a Biblia. A mabhuku lawo ma patsa a ziphephana, mabroxura, mabhuku, ni marevista niku zontlhe lezi zi humesiwa hi tirimi to tala.

²³ Laha u hlengelako ni vanwani kuxumayeleni ka mahungu yo saseka, ma lonzowote khwatsi a mabhuku lawa ma humesiwako hi hlengeletano ya Jehova. Hi na ni lungelo ga ku nyikela mabhuku yo hambanahambana xikari ka hweti. Tlhatakumbiri, ni ka xihi xikhati xikari ka hweti a ku patsa ni Milongiso u tava ni lungelo ga ku nyikela a marevista. A ku wona lezi wena wutsumbu u vunekisileko zona hi ku lera ni ku gonza a mabhuku ya Timboni ta Jehova zi ta ku kuca ku xumayela vanwani. — Maheb. 13:15, 16.

²⁴ A vanhu va ya va yi tirisa nguvu internet kota xibuka xa ku kuma mahungu. Hikwalaho, ahandle ka mabhuku ma gandlilweko, a saite ya hina ya nayo ya jw.org, xitiro xi nene xa ku hangalasa a mahungu yo saseka. A vanhu misaveni yontlhe va tirisa komputadori kasi ku lera ni ku ingisela Biblia ni mabhuku ma seketelwako ka Biblia hi tirimi to tala. Lava va kanakanako ku bhula na hina kutani lava va hanyako ka matshamu lawa zi karatako ku bhula ni Timboni ta Jehova va nga ha nghena ka saite ya hina ya jw.org va kambisisa lezi hi zi kholwako na va hi lomu mitini yabye.

²⁵ Hikwalaho, ni kwihi lomu zi fanelako, hi kuca a vanhu lezaku va nghena ka jw.org. Loku a nwinyi wa muti a hi maha xiwutiso xungetano hi lezi hi zi kholwako, hi nga tirisa a fone kutani komputadori ya hina lezaku hi tekela ku mu komba a hlamulo wa kona. Loku hi kumana ni munhu a wulawulako lirimi hi nga li tiviko, kutani lirimi la mawoko, hi nga mu komba a saite ya hina lezaku a lera a Biblia kutani mabhuku manwani ma seketelwako ka gona hi lirimi lakwe. A vahuweleli vo tala va tirisa a tividiyu ti nga ka saite ya hina kasi ku sangula mabhulo ya Biblia.

WUKUSTUMUNYU GA XITSHUKETI

²⁶ Jesu i te ngalo ka vaingiseli vakwe: “Nwina mu kuwonekela ka tiko. . . . Hizalezo ngha na kuwonekela ka nwina ku woninga mahlweni ka vanhu, kasi va wona mitiro ya nwina yo saseka, va dumisa a Raru wa nwina wa le tilweni.” (Mat. 5:14-16) A vapizani lavo va wa kombisa a matshamela ya Nungungulu hi ku pimanyisa Jesu, loyi a ngaku: “Mina nzi kuwonekela ka tiko.” Jesu i hi vekele xikombiso xi nene mhakeni ya ku tsika “kuwonekela ka wutomi” ku woninga kasi ku vuna vontlhe lava va nga wa ta mu ingisela. — Joh. 8:12.

²⁷ Mupostoli Paule yenawu i hi vekele a xikombiso hi faneleko ku xi lanzela. (1 Kor. 4:16; 11:1) A xikhati lexi a nga hi Atensi, wontlhe masiku i wa xumayela vontlhe lava a nga tlhangana navo mabazarini. (Miti. 17:17) A maKristu ya le Filipi ma lanzele a xikombiso xakwe. Hi kota ya lezo, Paule i lo va tsalela lezaku va wa ‘woninga khwatsi hi kuwonekela laha misaveni’ hambu lezi va nga kari va hanya “xikari ka xizukulwana xi gombonyekileko ni xi bihileko.” (Fil. 2:15) Hinawu inyamutlha hi nga tsika a lisine la Mufumo li woninga hi magezu ni zimaho ni kwihi lomu hi kumako mole wa ku xumayela mahungu yo saseka. Lisine lezaku a xikombiso xa hina xa xi nene kota vanhu vo tsumbeka ni vo lulama xi nga komba lava va hi wonako lezaku hi hambanile ni tiko. Hambulezo, loku hi va byela a mahungu yo saseka, va ta zi tiva lezaku hikuyini hi hambanileko ni tiko.

²⁸ A kutala ka vanhu va Jehova va xumayela a mahungu yo saseka ka lava va tlhanganako navo ntirweni, xikoleni, lomu ku nyimako mimova, kutani na va maha mitiro yinwani ya siku ni siku. Loku hi hi kuenzeni, hi nga hava ni lungelo go bhula ni vaenzi-kulori. Hi fanele ku tshama hi longile ku cica mabhulo yo toloveleka mava wukustumunyu. Ngha hi ti yimisela ku bhula ni vanwani ka ni xihi xikhati zi fanelako.

²⁹ Hi ta kuceka ku maha lezo loku hi nga rivali lezaku hi kari hi dumisa Muvangi hi tlhela hi neha wudzunzo vitweni gakwe. Tlhatakumbiri, hi ta vuna a vanhu va timbilu ti nene lezaku va tiva Jehova kasi na vonawu va mu tirela va tlhela vava ni kutsumba ka wutomi loku va kholwa ka Jesu Kristu. Jehova wa xalala hi mizamo leyo niku i yi wona kota ntiro wu basileko. — Maheb. 12:28; Kuv. 7:9, 10.

ZIPANZE

³⁰ Jehova i lava lezaku a mahungu ya Mufumo ma xumayelwa misaveni yontlhe, madoropeni ni handle ka wona. Kasi lezo zi koteka, a hofisa ya ravi ya nyika a mabandla ni vahuweleli lava va tirako ka matshamu ya le kule a zipanze lezi va faneleko ku xumayela ka zona. (1 Kor. 14:40) A mahela legi gi yelana khwatsi ni lulamiselo gi mahilweko hi Nungungulu ka zana ga malembe go sangula. (2 Kor. 10:13; Gal. 2:9) Kota lezi a ntiro wa Mufumo wu vuvumako hi kuhatlisa masikwini lawa yo gumesa, a lulamiselo ga ku avela a zipanze zo xumayela kona gi vuna bandla a ku tatisa a ntiro wa gona hi ndlela yi xaxametilweko khwatsi.

³¹ A malulamiselo lawa ma wonelelwa hi muwoneleli wa ntiro. A nanza ga wutireli gi nga avela zipanze za simu ni ku wona lezaku hi zihi lezi zi nga xumayelwa ni lezi zi kalako zi nga se xumayelwa ni xikhati lexi zi nga naxo na zi xumayelwe. Ku na ni tixaka timbiri ta zipanze — ku nga zipanze za ntlawa ni zipanze za munhu wutsumbu. Loku a ntlawa wu hi ni xipanze xitsongwani xo xumayela kona, a muwoneleli wa ntlawa lowo i ta ti karatela ntsena kuva ni xipanze lexi a vahuweleli va ntlawa wakwe va to xumayela ka xona. Hi tlhelo ginwani, loku a bandla gi hi ni xipanze xa hombe xa ku xumayela kona, a muhuweleli a nga tsemelwa xipanzana xo xumayela kona.

³² A muhuweleli loyi a nga ni xipanze xakwe wutsumbu i tava ni wutshamu go xumayela ka masiku lawa ku nga hiko na malulamiselo ya kuya sinwini hi mitlawa kutani loku a tshuka a tsanzeka kuya ntlaweni hi zigelo zo kari. Hi xikombiso, a vahuweleli vo kari va kombela a xipanze xi nga kusuhani ni lomu va tirako kona kasi va xumayela hi zikhati za ku humula kutani anzhako ka ntiro. A mingango yo kari yi kombela a xipanze xi nga kusuhani ni miti yabye kasi yi xumayela ka xona ni wusikwana. Loku a xipanze lexi a muhuweleli a kombelako xi hi kusuhani ni lomu a kumekako kona zi ta mu vuna a ku lonzowota khwatsi a xikhati lexi a xi vekeleko a ntiro wa simu. Anzhako ka mutlhangano wa ntiro wa simu, a vahuweleli lava va nga ni zipanze zabye wutsumbu va nga ha ramba a vahuweleli vanwani lezaku va ya xumayela zinwe. Loku u tsakela kuva ni xipanze xa wena xo xumayela kona, kombela ka nanza ga xipanze.

³³ Kani xipanze xa ntlawa kutani xipanze xi kombelilweko hi muhuweleli, lava va tirako ka xipanze lexo va fanele ku ti karatela ku xumayela a miti yontlhe. Lezi zi patsa ku ti karatela ku bhula ni wokari ka muti wunwe ni wunwani. Kuzilava a venyi va miti va nga ha kumiwa hi tindlela tinwani, to kota ku va tsalela papilo, ku va fonela, kutani wukustumunyu ga lomu maruweni. A muwoneleli wa ntlawa kutani muhuweleli loyi a nga ni xipanze xo xumayela kona i fanele ku ti karatela ku xi eneta nzeni ka mune wa tihweti. Neti a mbheta, i fanele ku tivisa a nanza ka xipanze lezaku a xipanze xakwe xi mbhelile, kasi a mibiko ya zipanze yi ciciwa. A muwoneleli wa ntlawa kutani muhuweleli a nga ha hlawula ku tlhela a tira ka xipanze lexo kutani ku xi tlhelisa ka nanza ga zipanze.

³⁴ Loku vontlhe lomu bandleni va tirisana khwatsi, a xipanze xi nga ha enetwa hi kumbhelela. A vahuweleli vambiri kutani kuhunza a va faneli ku tira ka miti yaleyi ya yinwe hi xikhati xalexi xa xinwe hakuva zi nga zangarisa a venyi va miti. Hi ndlela leyo hi kombisa ku khatala hi vamakabye va hina ni vanhu va lomu xipanzeni.

XUMAYELA VANHU VA TIRIMI TONTLHE

³⁵ A vanhu vontlhe va ni fanelo ya ku gonza xungetano hi Jehova Nungungulu, N’wana wakwe ni Mufumo wa Nungungulu. (Kuv. 14:6, 7) Hi xuva ku vuna vanhu va tirimi tontlhe lezaku va tiva vito ga Jehova kasi va hanyisiwa va tlhela vava ni mahanyela ya wuKristu. (Joe. 2:32; Kol. 3:10, 11) Zikarato muni hi kumanako nazo a xikhati hi xumayelako a mahungu yo saseka ka zipanze ku wulawuliwako tirimi to tala? Hi nga zi hlulisa kuyini a zikarato lezo kasi hi vuna vanhu vo tala hi laha zi kotekako hi kona lezaku vazwa mahungu ya Mufumo hi lirimi va li tivako khwatsi?— Rom. 10:14.

³⁶ Hi tolovelo, a bandla ginwe ni ginwani gi nyikiwa a xipanze xi yelanako ni lirimi la gona. Hikwalaho, ka zipanze lezi ku wulawuliwako tirimi to tala, a vahuweleli va mabandla yo hambanahambana va xumayela ka zipanze zalezi za zinwe. Ka ziyimo zo khwatsi hi lezo, zi chukwana nguvu ku a vahuweleli va bandla ginwe ni ginwani va ti karatela ku xumayela a vanhu lava va wulawulako a lirimi la bandla gabye. Lezo zi wula ku a xikhati lexi a vahuweleli va nga kuxumayeleni hi muti ni muti va fanele ku nyikela a marevista ya lirimi la bandla gabye ntsena. A va faneli ku xumayela ka miti leyi yi wulawulako a tirimi ta mabandla manwani. A mahela legi ga tira kambe a xikhati lexi hi nga matsimeni ya ku nyikela a zirambo za Xialakanyiso kutani za gotsovanyano. Hambulezo, loku zita kunyikeni ka wukustumunyu ga xitshuketi kutani ga laha kubaseni, a vahuweleli va ta wulawula ni wihi munhu va tlhanganako naye va tlhela va nyikela a mabhuku hi ni lihi lirimi.

³⁷ Ka zikhati zo kari, za koteka ku ngha a mabandla ma wulawulako tirimi tinwani ma nga zi koti ku chikela hi kukhanzakanya ka zipanze za le kule zi lumbako wona niku ma nga zi wona zi hi chukwana ku a mabandla lawa ma tirelako ka zipanze lezo ma nghenela a miti yontlhe. A vahuweleli va fanele ku maha zontlhe va zi kotako kasi ku xumayela vanhu va wulawulako tirimi tinwani. Hambulezo, zi chukwana ku lava va kombisako kutsakela va khatalelwa hi vahuweleli va mabandla lawa ma wulawulako tirimi tabye. A ziyimo za hambanahambana, hikwalaho a vawoneleli va ntiro va mabandla lawa ma patsekako va fanele ku bhulisana kasi va boha lezi a mabandla ma nga tirisako zona hi ndlela yi nene kala ma eneta xipanze xontlhe. Lezo zi ta vuna vontlhe lezaku vazwa a mahungu ya Mufumo, zi tlhela zi vuna a vahuweleli a ku nga ngheni ka miti leyi yi sinako yi xumayelwe a siku lego, hakuva lezo zi nga ha zangarisa a venyi va miti. — Mav. 15:22.

³⁸ Hi fanele ku maha yini loku hi kuma munhu a wulawulako lirimi hi nga li tiviko? A hi faneli ku mu tsika na hi alakanya lezaku i ta enzelwa hi vahuweleli va wulawulako lirimi lakwe. Kanilezi, hi fanele ku tirisa xibhukwana Boas Novas para Pessoas de Todas as Nações kasi hi tiva lirimi lakwe hi tlhela hi mu xumayela. A vahuweleli vo kari va gonza xingheniso xo koma hi lirimi leli li wulawuliwako hi vokari lomu xipanzeni lexi va xumayelako ka xona. Hi nga mu komba lezi a nga gonzisako zona mabhuku hi lirimi lakwe ni ku ma chisa ka saite ya hina ya nayo ya jw.org, kutani ku mu yisela mabhuku hi lirimi lakwe.

³⁹ Loku a wokari a kombisa kutsakela, hi fanele ku lavetela a muhuweleli loyi a to mu vuna hi lirimi leli a li zwisisako. Tlhatakumbiri, hi nga mu leletela lomu ku nga ni bandla gi mahako a mitlhangano hi lirimi lakwe. Loku a xuva ku enzelwa hi munhu a wulawulako a lirimi lakwe, hi nga mu komba lezi a nga mahisako zona a xikombelo lexo ka jw.org. A hofisa ya ravi yi ta ti karatela ku kuma a muhuweleli, ntlawa kutani bandla legi gi to simama gi mu vuna.

⁴⁰ Hi fanele ku simama hi enzela munhu loyi a kombisileko kutsakela kala a hi byela lezaku wa enzelwa hi wokari loyi a wulawulako lirimi lakwe. Ka ziyimo zo kari, a hofisa ya ravi yi nga tivisa madota lezaku a yi kumangi a muhuweleli a wulawulako lirimi la munhu loye. Loku lezo zi humelela, hi fanele ku simama hi hlakulela a kutsakela kakwe. Loku zi koteka, hi nga gonza naye a Biblia, kuzilava hi kutirisa bhuku ga lirimi lakwe. Loku hi tirisa khwatsi a zithombe, hi tlhela hi mu tsika a ti gonzela hi yece a mitsalo yi tshahilweko, i ta zwisisa a tigonzo-tshinya to kari ta Biblia. Loku a xiro xa ngango wakwe xi li tiva khwatsi a lirimi leli a wulawulako ni leli li wulawuliwako lomu xipanzeni, hi nga ha mu kombela a hi hunzuluselela.

⁴¹ Kasi ku kongomisa munhu a tsakelako hlengeletanweni ya Nungungulu, hi fanele ku mu ramba lezaku ata mitlhanganweni ya hina, hambu lezi a to kala a nga zi zwisisi khwatsi lezi zi to gonziwa. A xikhati ku gonziwako mitsalo, hi nga mu vuna ku yi lavetela hi ku tirisa Biblia ga lirimi lakwe loku gi hi kona. A ku ti patsa ni vanwani laha bandleni zi nga mu tiyisa zi tlhela zi mu vuna ku simama a kula hi tlhelo ga moya.

⁴² Loku ku hi ni vanhu vo tala va wulawulako lirimi linwani lomu xipanzeni xi xumayelwako hi bandla ga wena, a hubye ya madota yi nga ha tlhamusela a hofisa ya ravi lezaku yi alakanyela ku wumba ntlawa. A ntlawa lowo a wu na dota kutani nanza ga wutireli gi nga rangelako mitlhangano, wova ni vahuweleli ntsena va xumayelako hi lirimi lelo. A madota ma ngata na ma ehleketa hi lezi ma nga wu seketelisako zona hi ku longisela a kanelo ya vanhu vontlhe kutani Xigonzo xa Murinzeli hi lirimi lelo, hambu ku maha a malulamiselo ya lezaku wu ingisela a mitlhangano ka bandla gi wulawulako a lirimi la wona hi ku tirisa a fone kutani vidiyu.

⁴³ Kasi ku wumba ntlawa, ku na ni mune wa zilo zi lavekako. Ku nga lezi: 1) Ku fanele kuva ni vanhu vo hlayanyana va tsakelako hi lirimi lelo na zi woneka lezaku a hlayo leyo yi ta kula. 2) Hi wutsongwani ga kona, wu fanele kuva ni vahuweleli vo kari va wulawulako lirimi lelo kutani va li gonzako. 3) Wu fanele kuva ni dota kutani nanza ga wutireli gi ringanelwako kasi ku rangela ni ku fambisa mutlhangano munwe hi wutsongwani ga kona viki ni viki hi lirimi lelo. 4) A hubye ya madota yi fanele ku ti yimisela ku seketela a ntlawa lowo. Loku a zilo lezi zi tatiswa hi kufaneleko, a hubye ya madota yi ta tsalela a hofisa ya ravi xungetano hi matshamela ya ntlawa lowo zonake yi maha a xikombelo xa kuva a bandla gabye gi vumelelwa hi nayo lezaku gi seketela a ntlawa wa lirimi linwani. Loku loyi a rangelako ntlawa a hi dota i vitaniwa ku muwoneleli wa ntlawa, kanilezi loku a hi nanza ga wutireli i vitaniwa ku i nanza ga ntlawa.

⁴⁴ Hi tolovelo, a ntlawa wa lirimi linwani wu sangula hi ku maha a Xigonzo xa Biblia xa Bandla, ku nga xinwe xa zipanze za Mutlhangano wa Ntiro ni Mahanyela. A kutala ka zikhati a mutlhangano lowo wu mahiwa sala-B ya Salawu ya Mufumo. Hi kufamba ka xikhati, loku ku hi ni dota kutani nanza ga wutireli gi li kotako khwatsi lirimi lelo, gi nga ha tira kota mukhomi wa xitshamu, gi fambisa xipanze xa zigonzani za Mutlhangano wa Ntiro ni Mahanyela kwalomu sala-B. A madota ma nga ha wu vumelela lezaku wu maha mitlhangano yinwani, yo kota kanelo ya vanhu vontlhe ni Xigonzo xa Murinzeli. Ka ntlawa lowo, ku nga ha mahiwa malulamiselo kambe ya mutlhangano wa ntiro wa simu. Vontlhe laha ntlaweni va wonelelwa hi hubye ya madota leyi yi wu seketelako. A madota ma fanele ku wu rangela khwatsi ma tlhela ma khatalela a zilaveko za wona. Loku a muwoneleli wa xipanze a enzela bandla legi gi seketelako a ntlawa lowo a tlhela a tira nawo, i ta nyikela mubiko wo koma ka hofisa ya ravi xungetano hi kukula ka ntlawa ni zilaveko za wona zo kongoma. Hi xikhati xi faneleko, za koteka ku a ntlawa lowo wu maha bandla. Jehova i ta xalala loku vontlhe va tirako ka xipanze xi wulawulako lirimi linwani va lanzela wurangeli gakwe. — 1 Kor. 1:10; 3:5, 6.

KU XUMAYELA HI NTLAWA

⁴⁵ A muKristu munwe ni munwani a ti hendleletileko ka Jehova i na ni wutihlamuleli ga ku xumayela a mahungu yo saseka. Ku na ni tindlela to tala to xumayela, hambulezo a yinwe ya tindlela ta lisima nguvu hi ti tirisako kuya kuxumayeleni ni maKristu-kulori. (Luka 10:1) Hi kota ya lezo, a vahuweleli va tlhangana mabandleni yabye nzeni ni kumbheleni ka viki lezaku va maha mutlhangano wa ntiro wa simu. A masiku ya tiferiado wonawu ma nyika vahuweleli a lungelo go hlawuleka ga ku xumayela hi mitlawa, hakuva a kutala ka vamakabye a vayi mitirweni. A muwoneleli wa ntiro ni hubye ya madota va fanele ku boha zinwe a wutshamu ni xikhati xa mitlhangano ya ntiro wa simu — ku ngava ni mumu kutani ni wusikwana.

⁴⁶ A ku xumayela hi ntlawa zi vuna vahuweleli a ku tira zinwe ni ku “tiyisana.” (Rom. 1:12, NM) A vahuweleli vaswa va nga tira ni vahuweleli va nga ni wutlhari ni va buvileko kasi va kuma gonziselelo. Ka zipanze zo kari, zi ngava wutlhari ku a vahuweleli vambiri kutani kuhunza va tira zinwe kota ndlela yo ti vikela. Hambu loku u maha makungo ya ku famba wece wutirelini, a ku tlhangana ni ntlawa zi nga tiyisa vontlhe va nga kona. A ku tiva ntsena lezaku a vanwani va yilewo kuxumayeleni, niku va tira ka xipanze xalexi u tirako ka xona, zi nga ku tiyisa-hlana. A maphayona ni vahuweleli vanwani a va kurumeteki ku kumeka ka mitlhangano yontlhe ya ntiro wa simu yi lulamiselwako hi bandla, nguvunguvu loku ku hi lezaku yi mahiwa siku ni siku. Hambulezo, kuzilava za koteka ku viki ni viki va kumeka ka mitlhangano yo kari ya ntiro wa simu.

⁴⁷ Ngha hontlheni hi lanzela xikombiso xi siyilweko hi Jesu ni vapostoli vakwe! Handle ko kanakana Jehova i ta katekisa mizamo leyi hi yi mahako ya ku hlengela hi kuhiseka ntirweni wa lisima wa ku xumayela mahungu yo saseka ya Mufumo. — Luka 9:57-62.