Loku A Nwinyi Wa Muti A Wulawula Lirimi Linwani
1. Hikuyini ku nga ni xilaveko xi yako xi kula xa kutirisana loku hi tira lomu xipanzeni?
1 Ziya na zi engeteleka ku a vahuweleli va Mufumo misaveni yontlhe va kuma vanhu va tsakelako, lava va wulawulako a lirimi lo hambana ni leli li tirisiwako laha bandleni gabye. Kasi ku vuna a vanhu lavo hi tlhelo ga moya, a maravi yo tala ma zi wona na zi laveka a ku maha mitlawa zinwe ni mabandla ma tirisako a tirimi tinwani. Kota lezi a ka wutshamu ginwe ku nga ha wulawuliwako a tirimi to tala, a mabandla yo hlaya ya tirimi to hambana ma nga ha xumayela ka xipanze xinwe. Xana a mabandla ma nga tirisanisa kuyini kasi a ntiro wa kuxumayela wu mahiwa hi nayo? — 1 Kor. 14:33.
2. A xikhati lexi hi xumayelako hi muti-ni-muti, xana hi nga tirisanisa kuyini ni ntlawa kutani bandla gi tirisisako a lirimi linwani lomu xipanzeni xa hina?
2 A Kutirisana Khwatsi: Loku a muhuweleli a nyika wukustumunyu lomu maruweni kutani wukustumunyu ga xitshuketi, i fanele ku tizwa na a tlhatlhekile a ku angula munhu wihi ni wihi, a ku patsa ni lava kuzilava va wulawulako lirimi linwani, a tlhela a nyikela mabhuku hi lirimi leli a munhu a li ranzako. Hambulezo, loku a xumayela hi muti-ni-muti lomu ka wuakelwani legi gi xumayelwako kambe hi ntlawa kutani bandla ga lirimi linwani, a muhuweleli i fanele ku khatalela a miti ya lava va wulawulako a lirimi la bandla legi a lumbako gona. Loku ku hi lezaku ku na ni mabandla yo hambanahambana ma xumayelako lomu ka wutshamu ginwe, za lisima nguvu a ku tsala lomu ka phepha a miti leyi hi nghenako ka yona. A vawoneleli va ntiro va fanele ku bhulisana kasi va longoloxa a timhaka hi ndlela yi ta nga vuna vontlhe. (Mav. 11:14) Hambulezo, loku a muhuweleli wo kari a kuma munhu a wulawulako lirimi linwani a xikhati lexi a nga wutirelini ga muti-ni-muti, na ku nga hi na mabandla ma tirisako a lirimi lelo lomu kusuhani, i fanele ku ti karatela ku nyika wukustumunyu a tlhela a khatalela a kutsakela ka munhu loye.
3. Hi fanele ku mahisa kuyini loku hi kumana ni vahuweleli va ntlawa kutani va bandla ga lirimi linwani na va tira lomu ka xipanze xalexi hi nga ka xona?
3 A Ntiro Wa Hina Munwe: Xana a mhaka yi fanele ku mahiswa kuyini loku a vahuweleli va mabandla yo hambana va tshuka va kumana na va xumayela ka wutshamu ginwe, hi siku galegi ga ginwe? Hi lisine, a liranzo la wuKristu li ta hlula a kuhambana kwihi ni kwihi ka tirimi, niku vontlhe va ta karatekela nguvu a zilaveko za vanhu va lomu xipanzeni lexo. (Joh. 13:34, 35) Hikwalaho, lava va rangelako va ta kombisa a kualakanyela vanwani ni liranzo a xikhati lexi va bohako a ku hi wihi ntlawa wu faneleko ku ya tira ka xipanze xinwani hi xikhatanyana. — Jak. 3:17, 18.
4. Xiprofeto muni lexi xi tatisekako inyamutlha?
4 A Biblia gi profetile lezaku a vanhu va tirimi to hambanahambana va wa tazwa a mahungu yo saseka. (Kuv. 14:6, 7) Loku kuva ni kutirisana ku nene xikari ka vontlhe lava va patsekako, zi nga ta maheka ku a vahuweleli va mabandla yo hambana va enzela a miti yaleyi ya yinwe, niku a vanhu vo tala va vaswa, a ku patsa ni lava va wulawulako lirimi linwani, va ta chikelelwa hi mahungu yo saseka. — Efe. 4:16.