Ndlela Yo Tira Sinwini Ga Lirimi La Matiko-wundle

1. Hi gihi a lungelo gi wonekako a xikhati lexi hi xumayelako xipanzeni lexi xi lumbako a bandla ga hina?

¹ Jesu Kristu i wulile na ka ha hi mahlweni lezaku a ivangeli yi wa ta kanelwa misaveni yontlhe “kasi yiva wukustumunyu ka matiko wontlhe.” A magezu lawo ma tekela ku zwala tindleveni ta mutireli munwe ni munwani a hlengelako ntirweni wa ku xumayela ni ku gonzisa. (Mat. 24:14; 28:19, 20) A xikhati lexi hi xumayelako ni ku maha vapizani, hi nga ha kuma vanhu va tako hi matikweni yo tsalangana lava va wulawulako a lirimi limbe. A vanhu lavo vonawu va ringanelwa hi kuzwa a mahungu ya Mufumo va tlhela va yimela a zinene na gi nga se chikela a siku go tshisa ga Jehova. (Mal. 3:18) Xana hi nga tirisa kuyini sinwini ga lirimi la matiko-wundle xipanzeni xi lumbako a bandla ga hina?

2. Xana hi nga mu pimanyisisa kuyini Jehova a xikhati lexi hi wulawulako ni vanhu va lirimi limbe?

² Ngha Uva Ni Mawonela Ya Jehova Hi Lava Va Wulawulako Lirimi Limbe: Kasi ku ranza vanhu vontlhe lomu xipanzeni xa hina handle ka xihlawulela khwatsi hi lezi Jehova a va ranzisako zona, hi fanele kuva ni kuxuva ka hombe ka ku vuna vanhu lezaku va kuma a wutivi ga lisine xungetano hi Nungungulu wa zinene, Jehova, na ku nga khataliseki a lirimi leli va wulawulako. (Tis. 83:18; Miti. 10:34, 35) Hambu lezi hi khatalelako nguvunguvu a vanhu lava va wulawulako a lirimi la bandla legi hi nga ka gona, hi fanele ku chela kota ni ku khatalela a zilaveko za lava va wulawulako a lirimi limbe hi tlhela hi hlota tindlela ta ku va bhulela a mahungu ya Mufumo wa Nungungulu. A ku nga cheli kota hi lava va wulawulako a lirimi limbe a zi yelani ni kungo ga Jehova ga ku nyika wukustumunyu ka vanhu va matiko wontlhe. Makunu-ke, xana hi nga va vunisa kuyini a vanhu lava va nga wulawuliko a lirimi la hina?

3. Hi xihi a xitiro xa lisima lexi hi nyikilweko, niku hi nga ti longiselisa kuyini lezaku hi xi tirisa?

³ Tirisa A Boas Novas para Pessoas de Todas as Nações: A xibhukwana lexi xi mahelwe ku tiriswa loku hi kumana ni vanhu va wulawulako a lirimi limbe. Tshama na u hi ni xibhukwana lexi xikhati xontlhe, tiva a matshamela ya xona yo tsalangana, u tlhela u tshama na u longile a ku xi tirisa. Kasi zi ku hehukela a ku kuma mahungu lawa u ma lavako, veka zifungo ka maphajina lawa ma nga ni tirimi ta matiko-wundle leti ti wulawuliwako lomu xipanzeni xa nwina. Loku ku hi lezaku ku na ni mabhuku hi tirimi leto, zi wa tava zi nene a ku teka matsongwani kasi ku nyika munhu anzhako ka ku gonza a mahungu ma nga lomu ka xibhukwana lexi.

4. Xana a xibhukwana Boas Novas para Pessoas de Todas as Nações xi nga tirisiswa kuyini wutirelini ga hina?

⁴ Loku u kumana ni munhu wutirelini loyi a wulawulako lirimi limbe, na u nga tiyiseki lezaku hi lihi a lirimi leli a wulawulako, sangula hi ku mu komba a xifenengeto xa xibhukwana. Vulula lomu nzeni ka xifenengeto, laha ku nga ni mapa wa matiko wontlhe, u ti xungeta wena wutsumbu u tlhela u xungeta a tiko legi u hanyako ka gona. Hi kulanzela, komba lezaku u tsakela ku tiva laha a nwinyi wa muti a tako hi kona ni lirimi leli a wulawulako. Anzhako ka ku tiva a lirimi lakwe, cuwukisa laha ka xaxameto wa tirimi, vulula a phajina ga kona, kongomisa a kupima ka nwinyi wa muti laha ka magezu lawa ma tsalilweko hi maletela ya ntima nguvu laha hehla ka phajina, zonake u komba lezaku u tsakela a kuva a nwinyi wa muti a gonza a timhaka leto. Loku a mbhetile, mu nyike a xitlukana hi lirimi lakwe kutani ku mu komba a magezu lawa ma pendilweko hi muvala wa wukhuma, lawa ma wulako lezaku u tsakela a ku mu lavela a bhuku ga lirimi lakwe u mu nehela. Hi kulanzela, mu kombe a magezu “vito ga mina,” lawa ma tsalilweko hi maletela ya ntima nguvu, zonake u wula a vito ga wena ziku dlunya. Xungeta laha ku nge “vito ga wena,” ku tsalilweko hi maletela ya ntima nguvu, u rinzela a hlamulo wa nwinyi wa muti. Maha a malulamiselo yo tiya ya ku mu tlhelela.

5. Zini hi faneleko ku maha kasi ku khatalela khwatsi a vanhu va lirimi linwani lava va kombisako kutsakela?

⁵ Malulamiselo Ya Ku Va Tlhelela: Ku fanele ku mahiwa a mizamo yontlhe kasi ku tlhelela lava va kombisako ku tsakela a mahungu ya Mufumo, na ku nga khataliseki a lirimi labye. Loku hi tiyiseka lezaku a wokari hakunene wa tsakela Nungungulu ni Mhaka yakwe, a Biblia, hi fanele ku tatisa a formulario Queira Visitar (S-43) hi tlhela hi tekela ku yi nyikela ka matsalani wa bandla lezaku a yi rumela hofiseni ya ravi kasi a mutsakeli loye a enzelwa hi munhu loyi a wulawulako a lirimi lakwe. Anzhako ka lezo, a hofisa ya ravi yi ta yisa a formulario leyo ka ntlawa wu faneleko wa lirimi lelo. A xikhati lexi yi amukelwako, a munhu loye i ta enzelwa hi xihatla. A matsalani a nga ha nyikela a kopiya ya formulario ka muwoneleli wa ntiro kasi a tiva lezaku a vanhu va lirimi lo kari va kombisa kutsakela. A formulario leyo yi fanele ku tiriswa ntsena loku a munhu loye a kombisa kutsakela ka lisine.

6. Hi gihi a wutihlamuleli hi nga nago loku hi kuma munhu loyi a wulawulako a lirimi limbe?

⁶ Kusukela ka xikhati lexi a formulario S-43 yi rumelwako kala loku a munhu loyi a kombisileko kutsakela a enzelwa hi muhuweleli loyi a wulawulako a lirimi lakwe, ka zi kota ku hunza xikhati xo kari. Hikwalaho, kota mizamo ya ku hlakulela a kutsakela loku ku kombisilweko, a muhuweleli loyi a tatisileko ni ku rumela a formulario S-43 wa zi kota kuya mahlweni a hlakulela a kutsakela kala loku a munhu loye a enzelwa hi wokari a wulawulako a lirimi lakwe. Ka makhati yo kari, hambu a xigonzo xa Biblia xi nga fambiswa ni munhu loyi a kombisileko kutsakela. Kanilezi, xana a muhuweleli a nga ma kumisa kuyini a mabhuku hi lirimi la munhu loyi a kombisileko kutsakela nzeni ka xikhati lexi ku rinzelwako lezaku a enzelwa?

7. I lulamiselo muni gi mahilweko kasi ku kuma mabhuku hi tirimi ta lava zi kotekako kuva hi kumana navo?

⁷ Mabhuku Ya Tirimi Timbe: A mabandla a ma faneli kuva ni mabhuku yo tala ya tirimi timbe. Hambulezo, loku a muwoneleli wa ntiro a wona lezaku ku na ni vanhu va lirimi lo kari va sangulako ku kombisa ku tsakela a zinene, a nga ha alakanyela ku vekisa a ntsengo wo kari wa mabhuku ya lirimi lelo lezaku ma tiriswa hi vahuweleli. Loku a bandla gi nga hi nawo a mabhuku lawo, gi nga ha ma kombela. Ku nga ha hunza xikhati xo lehanyana na mabhuku ya lirimi lo kari ma nga se chikela. Hikwalaho, ku na ni malulamiselo ya ku kopiyara a mabhuku ka Internet hi khero www.watchtower.org. Ku na ni mabhuku yo tala ma kombiswako hi mazana ya tirimi lawa a muhuweleli kutani a munhu loyi a kombisako kutsakela a zi kotako ku tekela ku ma kuma ka Internet. Handle ko kanakana, a lulamiselo legi gi ta simama kuva ga lisima kuhlakuleleni ka kutsakela loku ku kombisiwako hi lava va wulawulako a lirimi limbe.

8. Wutihlamuleli muni legi a bandla gi nga nago kuhlakuleleni ka kutsakela ka lava va wulawulako lirimi limbe?

⁸ Wutihlamuleli Ga Bandla: Za koteka lezaku a ntlawa wa hombana wa vanhu va wulawulako lirimi la matiko-wundle wu kari wu anza na ku nga hi na bandla gi fambisako mitlhangano hi lirimi lelo laha kusuhani. Hikwalaho, a vatsakeli lava va wulawulako a lirimi limbe va fanele ku rambiwa lezaku vava kona mitlhanganweni ya nwina. A ku va amukela ka nwina hi matsenya ni kukhatala loku va kombiswako za zi kota a ku va kuca a ku tlhangana na nwina hi kukhanzakanya. Kusanguleni, za koteka ku ngha ku hi ni libhiyo la lirimi ni la mudawuko; hambulezo, a liranzo la lisine la wuKristu a li na mimbhingano hlengeletanweni ya misava yontlhe ya Timboni ta Jehova. (Zef. 3:9; Joh. 13:35) Xana wena wa wulawula khwatsi a lirimi limbe? Loku u kari u wulawula na u xuva a ku tlhelela vanhu va lirimi lelo, byela a matsalani wa bandla ga nwina kasi a mahungu lawo ma tiviswa a hofisa ya ravi. Lezo zi ta vuna a ravi a ku tiva lomu ku nga ni muhuweleli loyi a zi kotako ku ya hlakulela a kutsakela ka vanhu va lirimi lelo.

9. Hi rini laha ku nga ha vako ni xilaveko xa ku gonzisa a vahuweleli a lirimi limbe, niku xana zi mahiswa kuyini?

⁹ Magonzela Ya Lirimi: A xikhati lexi u vunako lava va wulawulako lirimi limbe, i chukwana a ku va kuca lezaku va sangula kuya mitlhanganweni ka bandla ga lirimi labye loku zi nga va karateli nguvu a ku maha lezo. Hambulezo, loku lezo zi nga koteki, a vahuweleli vo kari va nga ha boha a ku gonza a lirimi limbe kasi va zi kota khwatsi ku vuna lava ka kombisako kutsakela. Loku ku nga hi na bandla laha kusuhani, a ravi gi nga ha boha lezaku hi kota ya kuanza ka ntlawa wa vanhu va tako hi matiko-wundle kutani venyi va tiko va wulawulako lirimi linwani, zi nga hava chukwana a ku gonzisa a vahuweleli a lirimi lelo. Loku zi hi tano, a ravi gi nga ha tivisa a mabandla lawa ma nga laha kusuhani ni ntlawa lowo xungetano hi xilaveko lexo zonake ku mahiwa xitiviso xa kugonzisiwa ka lirimi lelo. Lava va kombelako a ku nghena kugonzeni loko va fanele kuva ni kungo ga ku cica vaya tira ka ntlawa kutani ka bandla lego lezaku va vunetela a ku anzisa a simu ga lirimi lelo.

10. Hi rini laha a ntlawa wa lirimi la matiko-wundle wu nga ha yimiswako, niku xana lezo zi khegela ka yini?

¹⁰ Mayimisela Ya Ntlawa: Kasi ku yimiswa a ntlawa wa lirimi lo kari, ku na ni mune wa zilo zi faneleko ku tatiswa. (1) Ku fanele kuva ni vanhu va tsakelako vo hlayanyana hi lirimi lelo na zi woneka lezaku a hlayo leyo yi ta kula. (2) Ku fanele kuva ni ntlawa-tshinya wa vahuweleli va wulawulako a lirimi lelo kutani va li gonzako. (3) Ngha kuva ni dota kutani nanza ga wutireli gi ringanelwako lezaku gi rangela ni ku fambisa a mutlhangano munwe viki ni viki hi lirimi lelo hi wutsongwani ga kona. (4) Ku fanele kuva ni hubye ya madota leyi yi vumelako ku seketela a ntlawa lowo. Loku a zilo lezi zi tatiswa hi ndlela yo nyawula, a hubye ya madota yi ta tsalela a ravi xungetano hi matshamela ya ntlawa lowo zonake yi maha a xikombelo xa kuva a bandla gabye gi vumelelwa hi nayo lezaku gi seketela a ntlawa wa lirimi la matiko-wundle. (Wona Organizados, p. 106) A dota kutani nanza ga wutireli legi gi rangelako a ntlawa lowo gi fanele ku vitaniwa a ku “muwoneleli wa ntlawa” kutani “nanza ga ntlawa” gi nga ni wutihlamuleli ga ku wonelela a ntlawa.

11. Hikuyini ku hi lungelo ga hombe a ku tira sinwini ga lirimi la matiko-wundle xipanzeni xa bandla ga hina?

¹¹ A ku tira sinwini ga lirimi la matiko-wundle nzeni ka xipanze xi lumbako a bandla ga hina i nchumu wa lisima tsimeni ga kuxumayela ga misava yontlhe legi a Xikombiso xa hina, Jesu Kristu, a gi sangulileko. Ngha hi maha a xipanze xa hina hi kuchivirika zonake hi wona lezi Jehova a simamisako zona ku tsekatsekisa matiko a neha lezi zi nga zi nene ka yena. (Hag. 2:7) A hi kutsakisa ka zona a kuva hi tirisana hi kumbhelela ntirweni lowu! Ngha Jehova a katekisa a mizamo ya hina ya ku tira hi kubohana sinwini ga lirimi la matiko-wundle zipanzeni zi lumbako a mabandla ya hina, xikhati xontlhe na hi alakanya lezaku hambu lezi ku nga ni mimbhingano ya tirimi ta vanhu, Nungungulu hi yena a milisako! — 1 Kor. 3:6-9.