Mabhinzu ya ku ingisa nayo wa Nungungulu wa wuhloko

A KU ingisa Nungungulu, a Hosi ya Hombe Wuakweni Gontlhe, za lisima kasi hi maha kuranza kakwe na hi xaxametilwe khwatsi. Ha zi zwisisa lezaku a N’wana wakwe i hloko ya bandla ga wuKristu, ni lezaku za lisima a ku hlayisa a tshinya ga nayo ga wuhloko zipanzeni zinwani za wutomi ga hina. A lulamiselo legi ga wuhloko gi vuna vontlhe lava va patsekako.

² A vanhu va sangulile ku tiva lezaku ku ni lulamiselo ga wuhloko le sinwini ga Edeni. A lulamiselo lego gi kumeka ka nayo wa Nungungulu wu nga ka Genesisi 1:28 ni 2:16, 17. A zihari zi wa fanele ku ingisa vanhu, niku Adamu na Eva va wa fanele ku maha kuranza ka Nungungulu va tlhela va ingisa a wuhosi gakwe. A ku ingisa a lulamiselo legi zi wa ta neha kurula ni kuxaxametwa khwatsi ka zilo. A tshinya ga nayo ga wuhloko gi tlhelile gi tlhamuselwa ka 1 Va Le Korinte 11:3. Mupostoli Paule i tsalile lezi: “Nzi ranza a kuva mu tiva lezaku a hloko ya wanuna munwe ni munwani hi Kristu, ni hloko ya wasati hi nuna wakwe, ni hloko ya Kristu hi Nungungulu.” Lezi zi komba ku, ahandle ka Jehova, vontlhe va fanele ku ti veka hasi ka wokari.

³ Inyamutlha, a vanhu vo tala a va gi zwisisi ge hambu ku ingisa a tshinya ga nayo ga ku ti veka hasi. Hikuyini? Zi sangulele le Edeni, a xikhati lexi Adamu na Eva va nga hlawula ha womu a ku nga ha ingisi Nungungulu. (Gen. 3:4, 5) Hambulezo, a va zangi vava ni kutlhatlheka ka lisine. Wutshanwini ga lezo, va lo ti veka hasi ka xivangwa xo biha xa moya xi vitwako Satani Diabolus. A wuhluwuki lego go sangula gi tsemile a wuxaka legi a vanhu va nga hi nago na Nungungulu. (Kol. 1:21) Kota wuyelo ga lezo, a vanhu vo tala nyamutlha va rangelwa hi loyi wa kubiha. — 1 Joh. 5:19.

⁴ A ku gonza a lisine la Mhaka ya Nungungulu ni ku hanya hi lezi hi gonzileko, za hi tlhatlhisa ka wurangeli ga Satani. Kota Timboni ti ti hendleletileko ti tlhela ti bapatizwa, ha vumela ku rangelwa hi Jehova wutomini ga hina. Ha vumelelana na Hosi Davida, loyi a nga wona Jehova kota “hosi hehla ka zilo zontlhe!” (1 Kro. 29:11) Kunene, ha vumela hi kutikoramisa lezaku “Jehova i Nungungulu, hi yena a nga hi maha, hi vakwe; hi tiko gakwe, a tiyivu leti a ti risako.” (Tis. 100:3) Ha zi tiva lezaku Jehova wa hombe niku wa fanelwa hi kutikoramisa ka hina, hakuva hi yena a nga vanga zilo zontlhe. (Kuv. 4:11) Kota vanhu va Nungungulu wa lisine, hi lanzela xikombiso xa Jesu Kristu, loyi a nga ti veka hasi ka wuhloko ga Nungungulu.

⁵ Zini lezi Jesu a gonzileko ka lezi a nga xaniseka hi zona laha misaveni? Maheberu 5:8 i ngalo: “Hambu lezi a nga hi N’wana, i lo gonza kuingisa hi lezi a nga xaniseka ha zona.” Kunene, Jesu i simamile a ti veka hasi ka Dadani wakwe wa le tilweni, hambu loku a yimisana ni ziyimo zo nonoha. Tlhatakumbiri, Jesu a nga tshukangi a ti sangulela zilo. A nga wulawulangi zilo zi sukako hlokweni yakwe niku a nga zangi a ti kokela wudzunzo. (Joh. 5:19, 30; 6:38; 7:16-18) Wutirelini gakwe, i wa tsaka hi ku maha kuranza ka Dadani wakwe, hambu lezi zi nga mu maha a vengiwa ni ku xanisiwa. (Joh. 15:20) Hambulezo, Jesu i wa ingisa Nungungulu. I lo “ti koramisa . . . kala kufeni” mhanzeni ya xanisa. A kutikoramisa kakwe ka Jehova ku vile ni mabhinzu yo tala — ku vululile ndlela ya lezaku a vanhu va kuma wutomi ga pinzukelwa, yena wutsumbu i tlakusilwe niku ku nehile wudzunzo ka Dadani wakwe. — Fil. 2:5-11; Maheb. 5:9.

LAVA HI FANELEKO KU TI VEKA HASI KABYE

⁶ Loku hi ti veka hasi ka Nungungulu hi ku maha kuranza kakwe, ha potsa kukarateka ko tala ku karatako lava va alako ku ti veka hasi ka wuhosi ga Jehova. A nala wa hina Satani, i tshama hi ku hlota tindlela ta ku hi khadamula. Loku hi mu kaneta hi tlhela hi ti koramisa ka Jehova hi kuziranza, hi ta wona a kuloviswa kakwe. — Mat. 6:10, 13; 1 Ped. 5:6-9.

⁷ Lomu bandleni ga wuKristu, ha ti veka hasi ka wuhloko ga Kristu ni ka wurangeli ga “nanza gi tsumbekileko ni go tlhariha,” legi gi yimisilweko hi yena. Lezo za khumba lezi hi va wonisako zona vanwani ni lezi hi tirisanisako zona navo. Loku hi ti koramisa ka lulamiselo lego ga wuhloko, hi ta kuceka ku ingisa zontlhe lezi a Mhaka ya Nungungulu yi wulako xungetano hi makhozelela ma amukelekako. A kuingisa loko, ku patsa a ntiro wa hina wo xumayela, kuva kona mitlhanganweni ni ku patseka ka yona, kuzwanana ni madota, ni ku tirisana khwatsi ni hlengeletano ya Jehova. — Mat. 24:45-47; 28:19, 20; Maheb. 10:24, 25; 13:7, 17.

⁸ A ku ti veka hasi ka Nungungulu za vuna kasi kuva ni kurula, kutshamiseka, ni kuxaxametwa khwatsi ka zilo bandleni ga wuKristu. A matshamela ya Nungungulu ma woneka ka vanhu vakwe vo ingisa. (1 Kor. 14:33, 40) Lezi hina wutsumbu hi zi wonileko hi mahlo hlengeletanweni ya Jehova zi hi kuca ku kombisa a kutizwa ko fana ni ka Hosi Davida. Anzhako ka ku wona a ku hambana ku nga kona xikari ka malanza ya Jehova ni malanza ya Satani, Davida i lo wula lezi na a xalele: “Va katekile a vanhu lava Jehova a nga Nungungulu wabye.” — Tis. 144:15.

⁹ Laha ngangweni, a “hloko ya wasati hi nuna wakwe.” A vavanuna va fanele ku ti veka hasi ka Kristu, niku Kristu i fanele ku ti veka hasi ka Nungungulu. (1 Kor. 11:3) A vasati va fanele ku ti koramisa ka vanuna vabye niku a vana va fanele ku ti veka hasi ka vapswali. (Efe. 5:22-24; 6:1) Loku a ziro zontlhe za laha ngangweni zi lanzela a tshinya ga nayo ga wuhloko, a ngango wu tava ni kurula.

¹⁰ A nuna i fanele ku pimanyisa Kristu, hi ku rangela a ngango wakwe hi liranzo. (Efe. 5:25-29) Loku a wu fumela khwatsi, a sati ni vana va ta mu ingisa na va xalele. A sati muvuneteli wa nuna wakwe. (Gen. 2:18) Loku a seketela a nuna wakwe hi lihlaza-mbilu ni ku mu komba xichawo, i ta ranziwa hi nuna wakwe niku zi ta neha wudzunzo ka Jehova. (1 Ped. 3:1-4) Loku a nuna ni sati va lanzela a wusungukati ga Biblia xungetano hi wuhloko, va vekela vana vabye a xikombiso xa kuva va ti veka hasi ka Nungungulu.

¹¹ A kutikoramisa ka hina ka Nungungulu ka khumba lezi hi wu wonisako zona a “mufumo” lowu wu ‘yimisilweko hi Nungungulu.’ (Rom. 13:1-7) Kota lezi ma ingisako a milayo ya tiko, a maKristu ma khupa; ma nyikela “ka Kesari lezi zi nga za Kesari, ni ka Nungungulu lezi zi nga za Nungungulu.” (Mat. 22:21) A ku ingisa zontlhe lezi a mifumo leyo yi yimisilweko yi zi wulako loku zi nga lwisani ni milayo yo lulama ya Jehova za hi vuna ku veka kupima ni ntamu wa hina ntirweni wa ku xumayela. — Mar. 13:10; Miti. 5:29.

¹² A lulamiselo ga wuhloko gi khumba a matlhelo wontlhe ya wutomi ga hina. Hi mahlo ya kukholwa, ha gi wona a siku legi a vanhu vontlhe va to ti veka hasi ka Jehova Nungungulu. (1 Kor. 15:27, 28) Lava va simamako va mu ingisa va tlhela va vumela hi litsako lezaku Jehova i hosi ya hombe wuakweni gontlhe, va ta katekiswa nguvu!