Papilo ga Hubye yi Fumako

Muhuweleli a ranzekako wa mahungu yo saseka:

I lungelo ga hombe nguvu a kuva hi tlhanganyisilwe zinwe wukhozelini ga Jehova, a Nungungulu munwe wa lisine! Kota “zitiri-kulori” na Nungungulu hi nyikilwe a ntiro wo basa lowu wu ponisako a wutomi ga vanhu — wa ku xumayela a mahungu yo saseka ni ku gonzisa vanhu hi Mufumo wakwe wu yimisilweko. (1 Kor. 3:9; Mat. 28:19, 20) Hambulezo, kasi hi zi kota ku tatisa a ntiro lowu hi ndlela yi nene ni yo rula, hi fanele ku xaxametwa khwatsi. — 1 Kor. 14:40.

A bhuku legi gi ta ku vuna a ku zwisisa lezi gi tirisako zona a bandla ga wuKristu inyamutlha. Gi ta tlhela gi ku komba a malungelo ni mitiro leyi u nga nayo kota xiro xa bandla legi. Loku u ma nyika lisima a malungelo lawa u nga nawo u tlhela u tatisa a mitiro ya wena hi kutsumbeka, handle ko kanakana u ta “tiyiswa kukholweni.” — Miti. 16:4, 5; Gal. 6:5.

Hikwalaho, ha ku kuca lezaku u gonza a bhuku legi hi wukheta. Laha u mahako lezo, zama ku wona lezi u nga ma tirisisako zona a mahungu lawo wutomini ga wena wutsumbu. Hi xikombiso, loku u yimisilwe kota muhuweleli a nga bapatizwangiko zezanyana, mazambo muni u faneleko ku maba kasi u ringanelwa hi ku bapatizwa kota Mboni ya Jehova? Hambu loku u bapatizilwe, zini u nga mahako kasi u simama u kula hi tlhelo ga moya? Tlhatakumbiri, u nga wu engetelisa kuyini a ntiro lowu u mahelako Jehova? (1 Tim. 4:15) Zini u nga mahako kasi laha bandleni ku simama kuva ni kurula? (2 Kor. 13:11) Lavetela a mihlamulo ya ziwutiso lezi lomu ka bhuku legi.

Loku u hi makabye wa xinuna a bapatizilweko, zini u nga mahako kasi u ringanelwa hi kuva nanza ga wutireli hambu kuva dota ka masiku ma tako? Kota lezi a vanhu va yako hi kuna lomu hlengeletanweni ya Nungungulu, ka laveka nguvu a vamakabye va xinuna va ringanelwako lezaku va rangela a ntlhambi wa Nungungulu. A bhuku legi gi ta ku tlhamusela lezi zi patsekako mhakeni ya ku “navela” mitiro leyo ya moya. — 1 Tim. 3:1.

Hi khongela hi mbilu yontlhe lezaku a bhuku legi gi ku vuna ku wona a ntiro lowu u nga nawo hlengeletanweni ya Jehova ni ku tlhela u wu nyika lisima. Ha ku ranza nguvu, niku a hi nyimi ku ku khongelela kasi wenawu uva xikari ka vanhu vo tsaka lava va to khozela a Dadani wa hina wa le tilweni kala kupinzuka. — Tis. 37:10, 11; Isa. 65:21-25.