Vaswa va xinuna, xana ma ti karatela ku kuma malungelo?
1. Xana a makabye wa xinuna a ha hiko muswa i fanele ku sangula rini a ku tirisa a wusungukati gi nga ka 1 Timote 3:1?
1 “Loku a munhu a navela . . . wurisi, wa navela a ntiro wo saseka.” (1 Tim. 3:1) A magezu lawa ma pimisilweko ma kuca vamakabye va xinuna lezaku va ti karatela ku kuma malungelo lomu bandleni. Xana u fanele kuva munhu wa hombe kasi ku maha lezo? Hi lisine, i chukwana ku sangula na wa ha hi muswa. Loku u maha lezo, u ta gonzisiwa u tlhela u kombisa lezaku wa ringana ku yimisiwa kota nanza ga wutireli loku u ta kula. (1 Tim. 3:10) Loku u hi makabye wa xinuna a ha hiko muswa, hi yihi ndlela ya ku kombisa lezaku wa ti karata?
2. Hi tihi tindlela ta kuva ni moya wa kutinyiketela ni ta ku wu kombisa?
2 Kutinyiketela: Alakanya lezaku u ti karatela ku kuma lungelo ga ntiro wo saseka, na ku nga hi nduma. Hikwalaho, ti karatele ku ranza ku vuna vamakabye. A yinwe ya tindlela ta ku maha lezo ku ehleketa hi xikombiso xi nene xa Jesu. (Mat. 20:28; Joh. 4:6, 7; 13:4, 5) Kombela Jehova lezaku aku vuna kasi u khatalela vanwani. (1 Kor. 10:24) Xana u nga vunetela a vanhu va khosahaleko kutani va babyako lomu bandleni? Xana wa ti nyiketela ku tsema relva, ku swiyela, kutani ku maha mitiro yinwani ya ku hlayisa a Salawu ya Mufumo? Xana u nga tinyiketela ku valeta munhu Xikoleni xa Wutireli ga Nungungulu loku zi tshuka zi laveka hi xitshuketi? U ta wona lezaku a ku ti nyiketela kasi ku vuna vanwani zi ta ku nyika litsako. — Miti. 20:35.
3. Hikuyini a kuva munhu wa moya zi nga za lisima, niku hi nga gi kumisa kuyini?
3 Wumoya: Ahandle ka lezo, za lisima nguvu a kuva a nanza laha bandleni giva ga moya ku hunza kuva ni wutivi go hlawuleka ga ku maha zilo kutani kuva ni wutlhari ga mabeleko. A wanuna wa moya i wona zilo kota lezi Jehova na Jesu va zi wonisako zona. (1 Kor. 2:15, 16) I kombisa a ‘mbhanzu wa moya.’ (Gal. 5:22, 23) Muxumayeli wo hiseka loyi a rangisako Mufumo wutomini gakwe. (Mat. 6:33) U nga kuma matshamela ya moya hi kuva ni xigonzo xa munhu wutsumbu xo khanzakanya. Lezo zi patsa ku gonza a Biblia siku ni siku, ku gonza Murinzeli munwe ni munwani zinwe ni Despertai! ga kona, ku ti longisela ni ku nyika mihlamulo mitlhanganwini ya bandla. (Tis. 1:1, 2; Maheb. 10:24, 25) Laha a nga kuca Timote lezaku a kula hi tlhelo ga moya, Paule i te ngalo: “Pangama . . . kugonziseni ka wena.” (1 Tim. 4:15, 16) Hikwalaho, ti karatele ku longisela khwatsi a tikanelo ta wena Xikoleni xa Wutireli ga Nungungulu. Na u nga seya wutirelini ranga hi ku ti longisela u tlhela u huma simu hi kukhanzakanya. Ti vekele mixuvo ya moya yo kota ntiro wa wuphayona ga xikhati xontlhe, ntiro wa Beteli, kutani ku gonza a Xikola xa Biblia xa Vamakabye va Magwenza. A kuva munhu wa moya zi ta ku vuna ku potsa “kumbilukela ka lava vaswa.” — 2 Tim. 2:22.
4. Hikuyini a kutsumbeka ku nga ka lisima?
4 Kutsumbeka: Kota lezi a vamakabye lava va nga nyikilwe xiavelo xa ku phakela zakuga ka vamakabye lava va nga vumala ka zana ga malembe go sangula va nga tiviwa kota vanhu va “tsumbekileko,” a vapostoli va wa nga hi na xigelo xa ku kanakana lezaku a ntiro lowo wu wa ta mahiwa. Lezo zi va nyikile xikhati xa ku khatalela zilo zinwani za lisima. (Miti. 6:1-4) Hikwalaho, loku u nyikwa xiavelo laha bandleni, xi mahe hi mbilu ya wena yontlhe. Pimanyisa Noa loyi a lanzeleko khwatsi a zileletelo lezi a nga nyikilwe kasi ku aka taru. (Gen. 6:22) A kutsumbeka ku na ni lisima nguvu mahlweni ka Jehova niku ku kombisa kubuva hi tlhelo ga moya. — 1 Kor. 4:2; wona a kwadru “Mabhinzu ya ku gonzisa.”
5. Hikuyini a vamakabye xinuna va ha hiko vaswa va faneleko ku ti karatela ku kuma malungelo?
5 Kota lezi zi profetilweko, Jehova wa hatlisisa a kukula ka bandla. (Isa. 60:22) Lembe ni lembe ku bapatizwa xipimo xa 250.000 wa vanhu. Hi kota ya vanhu vo tala lava va nghenako lisineni, ku na ni xilaveko xa vavanuna va moya va ringanelwako kasi ku khatalela bandla. Inyamuntlha ku na ni ntiro wo tala nguvu lomu hlengeletanweni ya Jehova ku hunza kale. (1 Kor. 15:58) Vamakabye va xinuna ma ha hiko vaswa, xana ma ti karatela ku kuma malungelo? Loku zi hi tano, mu navela ntiro wo saseka futsi!
[Tlhamuselo wa mifota ka phajina 2]
Hi kota ya vanhu vo tala lava nghenako lisineni, ku na ni xilaveko xa vavanuna va moya va ringanelwako kasi ku khatalela bandla
[Tlhamuselo wa mifota ka phajina 3]
Mabhinzu ya ku gonzisa
A vamakabye va xinuna va ha hiko vaswa lava va ringanelwako, va vuneka loku a madota ma va nyika ziavelo ma tlhela ma va gonzisa. A muwoneleli wo kari wa xipanze i wa tshamile mahlweni ka xiluvelo anzhako ka mutlhangano, na a tiyisa a muhuweleli wo kari. I lo wona a jaha go kari na gi yimile kusuhani navo, a gi wutisa lezaku go lava ku wulawula naye ke. A jaha lego gi lo hlamula giku gi nyikilwe xiavelo xa ku basisa xiluvelo siku ni siku ku nga ni mitlhangano. A vapswali va jaha legi va wa lava ku famba, kanilezi gi wa nga lavi ku famba na gi nga se tatisa xiavelo xa gona. A muwoneleli i lo suka na a xalele. I te ngalo: “A madota ya bandla lego ma wa li tiva a lisima la ku gonzisa vaswa va xinuna va ringanelwako, hi ku va nyika ziavelo. Hikwalaho, zi wa tolovelekile ku loku nzi va enzela, va dzunza a muswa wo kari wa xinuna va mu wonako na a ringanelwa hi kuva nanza ga wutireli.”