Ku Ti Karatela Ku Maha Zo Tala Wutirelini Ga Hina
1 Mupostoli Paule i lulekile a maKristu lezaku ma famba ndleleni ya Nungungulu niku ma ‘simamisa ni ku anza ka wona.’ (1 Tes. 4:1) Xana lezo zi patsa yini ka hina? A nchumu wunwe hi lezaku hi fanele xontlhe xikhati hi lava tindlela ta ku anzisa ntiro wa moya, xikhati xontlhe hi ti karatela ku ‘hetisa a ntiro wa hina.’ — 2 Tim. 4:5.
2 Xigelo: A ku ti karatela ku maha zo tala wutirelini ga hina ku kuciwa hi kuziranza ka hina a ku tirela Muvangi wa hina hi ku anzileko. Hi lava ku kula hi tlhelo ga moya ni ku lava tindlela ta ku anzisa a wutireli ga hina. A ku ti toloveta zilo zi nene ku nga ni zigelo zi faneleko ku ta hi vuna a ku chikelela mixuvo yi yelanako ni ntiro wa hina ka Nungungulu. — Tis. 1:1, 2; Fil. 4:6; Maheb. 10:24, 25.
3 A ku tira kuanziseni ka wutireli ga hina ku lava lezaku hi hlakulela a moya wa kunyika, wa kutikarata. A moya lowo wa zi kota ku hlakulelwa hi ku alakanyisisa hi mukhongelo a xikombiso xa xi nene xa Jesu. (Mat. 20:28) Jesu i kumile a litsako la hombe hi ku tirela vanwani wutirelini gakwe. (Miti. 20:35) Ha zi kota ku pimanyisa Jesu hi ku kombisa kukhatala hi vanhu ni ku tlharihela ku lonzowota a malungelo ya ku maha zo tala wutirelini ga hina. — Isa. 6:8.
4 Ntiro Wa Vapswali: A kuxuva ku tirela vanwani ni ku anzisa a wutireli ga hina ka zi kota ku gonzisiwa ka vanana na va ha hi vatsongwani. A vanhu vaswa va ta wona a kupinyama ka ziro za ngango ni kuhlengela kabye ko hiseka kuanziseni ka wutireli gabye. A makabye wo kari wa xinuna i kucilwe ku ti karatela ku anzisa a wutireli gakwe na a ha hi mufanyana kota wuyelo ga ku tira zinwe ni kokwani wakwe mitirweni ya bandla. A ku wona a kuhiseka ni kutsaka ka kokwani wakwe ku mu kucile lezaku a lava malungelo ya ku tirela a vamakabye vakwe. Zalezi yena i nanza ga wutireli.
5 Xilaveko Ka Vamakabye Va Xinuna: ‘Loku a wanuna wo kari a ti karatela ku chikelela . . . , wa navela a ntiro wo saseka.’ (1 Tim. 3:1, Tradução do Novo Mundo) A magezu lawa ma kuca a vamakabye va xinuna lezaku va ti karatela ku ringanelwa hi malungelo yo engeteleka lomu hlengeletanweni ya Jehova. A ku maha lezo a zi lavi lezaku a munhu ava ni wuzikoti go hlawuleka. A makabye wa xinuna loyi a ti karatelako ku ringanelwa i fanele ku lava Mufumo kuranga a tlhela a hlengela hi kuhiseka wutirelini. (Mat. 6:33; 2 Tim. 4:5) I ta ti karatela kuva xikombiso xi nene ka vanwani.
6 Misaveni Yontlhe: Jehova wa hatlisisa a kuhlengeletwa. (Isa. 60:22) Ku na ni xilaveko xa xihatla ka vontlhe lava va lanzelako xikombiso xa Jesu lezaku va tira wutirelini gabye hi ku anzileko. A mubiko wa misava yontlhe wa lembe ga ntiro ga 2006 wu komba lezaku 248.327 va bapatizilwe. A mubiko lowo wu yimela a mpimo wa kuhunza 680 wa vanhu vaswa hi siku! Ngha hina hontlheni hi simama ku lava tindlela to tira wutirelini ga hina hi kuanzileko.