Mufumo wa ku fana ni sinya ya hombe

Ka wusiku go kari, Nebhukadnezare i no lora zvilo zvo chavisa. I no vitana a vavanuna vakwe vo tlhariha kasi va ta mu byela a ku zvi wula yini lezvi a nga lora. Kanilezvi ne mun’we wabye a nga zvi kotangi ku mu tlhamusela. Hi kugumesa, a hosi yi no wulawula na Dhaniyeli.

Nebhukadnezare i no byela Dhaniyeli, aku: ‘Lomu ka noro wa mina, ndzi no wona sinya. Yi no kula yi leha nguvhu kala yi chikela tilweni. Yi wa woneka ka matlhelo wontlhe ya misava. Yi wa hi ni matluka yo saseka ni mihandzu yo tala. A zvihari zvi wa humula laha ndzhutini wa yona, niku a zvinyanyani zvi wa aka zvisaka lomu ka madhavi ya yona. Hi kulandzela, ku nota ngilozi hi le tilweni. Yi no wula lezvi hi gezu ga hombe: “Kingani sinya, mu tsemelela madhavi ya yona. Kanilezvi tsikani a cibho ni timitsu ta cona laha misaveni; ci wa bohiwe bhandi ga simbi ni ga kobre. Ci wa tekelwe a mbilu ya cona ya munhu ci nyikiwa a mbilu ya cihari, niku ku wa hundze a 7 wa zvikhati hehla ka cona. A vanhu vontlhe va ta zvi tiva lezvaku Nungungulu i Hosi niku a nga nyikela mufumo ka ni wihi a mu lavako”’.

Jehovha i no vhuna Dhaniyeli a ku tiva lezvi a noro lowo wu nga wula zvona. A cikhati leci Dhaniyeli a nga zvi tiva ku a noro lowo wu wula yini, i no chava, aku: ‘O Hosi, loku ku wo khwatsi a noro lowu wu wulawula hi valala va wena ku wa hi chukwana. Kanilezvi wu wulawula hi wena futsi. A sinya ya hombe leyi yi nga tsemiwa yiwa hi wena. U ta luza mufumo wa wena u tlhela u yaga byanyi lomu khwatini a ku fana ni zvihari zva khwati. Hambulezvo, kota lezvi a ngilozi yi ngaku tsikani cibho ni timitsu ta cona lomu misaveni, u ta tlhela u maha hosi kambe’.

Loku ku hundzile lembe, Nebhukadnezare na a kari a fambafamba le hehla ka yindlu yakwe ya wuhosi, a hlamala Bhabhuloni, i te: ‘Hi nga wona a kusaseka ni kuhlamalisa ka dhoropa legi ndzi nga aka. Phela mina ndzi wa hombe futsi’! Na a ha wulawula, ku no zwala gezu hi le tilweni, giku: ‘Nebhukadnezare! Zvezvi u tekelwe wuhosi ga wena’.

Ka cikhati caleco, Nebhukadnezare i no sangula ku hlanya, a ku khwatsi cihari ca khwati. I no humesiwa lomu ndlwini yakwe ya wuhosi a ya hanya lomu khwatini ni zvihari. A misisi yakwe yi no kula, yi fana ni timbavi ta gama, a zvikamba zvakwe zvi fana ni zva zvinyanyani.

Loku ku hundzile 7 wa malembe, a tipeni ta Nebhukadnezare ti no wuya, Jehovha a mu yimisa kambe kota hosi ya Bhabhuloni. Nebhukadnezare i no gumesa, aku: ‘Ndza mu dhumisa Jehovha, a Hosi ya matilo. Makunu ndza zvi tiva a ku Jehovha hi yena a Fumako. Wa tsongahata vanhu va matshandza, a tlhela a nyikela mufumo ka loyi a mu lavako’.