CIGONDZO 60
Mufumo wu to tshama kala kupindzuka
Ka wusiku go kari, Hosi Nebhukadnezare i no lora zvilo zvo kala ku toloveleka. Zvi no mu karata nguvhu laha ka kuza a nga ha kumi ni wurongo. I no vitanisa vasalamusi vakwe, a taku: ‘Ndzi tlhamuseleni lezvi ndzi nga lora’. A vasalamusi vaku: ‘Hosi, hi byele lezvi u nga lora’. Kanilezvi, Nebhukadnezare a nga vhumelangi, i te: ‘Ahihi! Ndzi byeleni n’wina a ku zvini ndzi nga lora, ndzi nga mu daya’. A vasalamusi va no phinda, vaku: ‘Hi byele lezvi u nga lora, hi ta gumesa hi ku tlhamusela a ku zvi wula yini’. Nebhukadnezare aku: ‘N’wina n’wentlhe mo zama ku ndzi kanganyisa. Ndzi byeleni lezvi ndzi nga lora’. Va no mu hlamula lezvi: ‘A ku na munhu a zvi kotako ku maha lezvo. Lezvi u zvi kombelako a zvi koteki’.
Nebhukadnezare i no zangara nguvhu laha ka kuza a rumisa lezvaku ku dawa titlhari tontlhe ta lomu Bhabhuloni — lezvo ku wa patsiwa na Dhaniyeli, Xadrake, Mexake na Abhed-Nego. Dhaniyeli i no kombela ku a hosi yi mu nyika cikhatanyana. Dhaniyeli ni vanghana vakwe va no khongela ka Jehovha va kombela lezvaku a va vhuna. Zvini lezvi Jehovha a nga maha?
Jehovha i no tirisa muwoniso, a komba Dhaniyeli lezvi Nebhukadnezare a nga lorile a tlhela a mu byela a tlhamuselo wa kona. Loku gi cile, Dhaniyeli i noya ka nandza ga hosi, a yaku: ‘U nga dayi ne tlhari yin’we ya hosi. Mina ndzi nga tlhamusela lezvi a hosi yi nga lora’. A nandza lego gi no teka Dhaniyeli va famba ka Nebhukadnezare. Dhaniyeli i no ya byela hosi, aku: ‘Nungungulu i ku tivisa lezvi zvi to maheka cikhatini ci tako. Lezvi u nga lora hi lezvi: U wonile cifananiso ca hombe. A hloko ya cifananiso leco yi wa hi ya ouro, a cifuva ca cona ni mawoko ya cona zvi wa hi zva prata, a khwiri ga cona ni mathanga ya cona zvi wa hi zva kobre, a minenge ya cona yi wa hi ya simbi, ni mikondzo ya cona yi wa hi ya simbi yi patseneko ni wumba. Hi kulandzela, ku no tsemiwa ribye gi yaba cifananiso hi laha mikondzweni. A cifananiso leco ci no fayekela ci maha pupu ci gumesa ci kukuletwa hi moya. A ribye lego gi no maha citsunga ca hombe, ci tata misava yontlhe’.
Dhaniyeli a gumesa aku: ‘A tlhamuselo wa lezvi u nga lora hi lowu: A hloko ya ouro yi yimela mufumo wa wena. A cipandze ca prata ci yimela mufumo wu to landzela lowu wa wena. Ku tata mufumo wun’wani wo fana ni kobre, wu to fumela misava yontlhe. Lowu wu to landzela lowo, wu tava wa ntamu wu tlhela wu tiya a ku fana ni simbi. Hi kugumesa, ku tava ni mufumo wu avanyekileko, wu tova ni zvipandze zvo tiya a ku fana ni simbi wu tlhela wuva ni zvipandze zvo kala ku tiya a ku fana ni wumba. A ribye legi gi nga maha citsunga ku wuliwa Mufumo wa Nungungulu. A Mufumo lowu wu ta fuvisa mifumo yontlhe wu tshama kala kupindzuka’.
Nebhukadnezare i nowa hi nghohe lahasi mahlweni ka Dhaniyeli, aku: ‘Hi Nungungulu wa wena a nga ku tlhamusela lezvi ndzi nga lora. A ku na Nungungulu wo fana naye’. Nebhukadnezare a nga mu dayangi Dhaniyeli. Kanilezvi, i no mu yimisa kota murangeli wa titlhari tontlhe a tlhela a mu yimisa kota hosana lomu provhinsia ya Bhabhuloni. Wa zvi wona lezvi Jehovha a nga hlamulisa zvona a mukhongelo wa Dhaniyeli?
“Yi no ti tlhanganisa ka wutshamu legi hi ciHebheru gi vitaniwako ku i Armagedhoni.” — Kuvhululelwa 16:16