Ka vagonzi

A revista legi u gi gonzako zezi gi sangulile ku humeswa hi Julho wa 1879. Kusukela xikhatini lexo, a tinguva ti cicile niku a revista legi gonawu gi cicile. (Cuwuka a mifota yi nga laha hehla.) A ku sangula hi wugandli legi, u ta wona kunwani kucica ka matshamela ya A Murinzeli. Zini zi to cica?

Ka matiko yo tala, ku na ni vanhu va yako va engetelekana va zi wonako na zi hi chukwana a ku gonza mahungu hi ku tirisa Internet. Hi ku thithanyana ka komputadori vona va zi kota ku kuma mahungu lawa ma haxiwako hi Internet ntsena. Ku na ni mabhuku yo tala, marevista ni maphepha-hungu ma zi kotako ku gonziwa ka Internet.

Kota lezi a vanhu vo tala va ranzako ku gonza mahungu hi ku tirisa Internet, hi cicile a matshamela ya Web site ya hina www.jw.org lokuloku, lezaku yi tsakisa ni ku olova ku gonza mahungu ka yona. Lava va nghenako ka yona va zi kota ku gonza a mabhuku lawa ma humesilweko hi tirimi ta ku hunza 430. Kusukela hweti leyi, lava va nghenako ka Web site ya hina va zi kota kambe ku gonza a tinzima ti nga kari ti huma hi kukhanzakanya ka marevista ya hina ma gandlilweko kanilezi ti nga leti makunu ti to kumeka ntsena ka Web site ya hina.a

Kota lezi hi to humesa tinzima to tala hi ku tirisa Internet, a wugandli ga A Murinzeli gi yako ka vanhu vontlhe gi ta hunguliwa maphajina hi ka 32 giya ka 16, kusukela ka wugandli legi. Zezi, A Murinzeli i hunzuluselwa hi 204 wa tirimi. Lezi a tova ni maphajina matsongwani, zi ta koteka a ku hunzulusela a revista legi hi tirimi to tala.

Hi rinzela lezaku a kucica loku ku ta hi vuna a ku chikelela vanhu vo tala hi mahungu ya Biblia ma hanyisako. Hi ti yimisele ku simama hi humesa mahungu ma gonzisako ni ma khumbako timbilu, ma gandlilweko ni ma kumekako ka Internet, kasi ku vuna a vagonzi lava va kombisako xichawo hi Biblia ni lava va lavako ku tiva lezi a Biblia gi zi gonzisako hakunene.

Vahumesi