Kugumesa ka tiko kuchava, kutsakiswa, ni kutsanzeka

Xini u xi alakanyako xungetano hi 21 ka Dezembro wa 2012? A siku lego gi fungilwe ka kalendari ga vaMaya niku a vanhu vo tala vata na vaku ngalo ku wa ta cica zo tala misaveni yontlhe hi siku lego. Mayelano ni lezi u nga kari u zi rinzela, kuzilava u tizwa khwatsi, u khunguvanyekile, kutani a wu khatalangi ka siku lego. Xana give ntsena ginwe ga masiku ma alakanyelweko hi kuphazama lezaku a tiko gi wa ta gumesa ka gona?

Ahati a “kugumesa ka tiko” loku ku tlhamuselwako lomu ka Biblia? (Mateu 24:3) A vokari va chava lezaku a misava yi ta hiswa. A vanwani va tsakiswa hi lezi zi zi kotako ku humelela kugumeseni ka tiko. A votala va karele hi kuzwa lezaku a tiko gi laha kusuhani ni ku gumesa. Kanilezi, xana a kugumesa ka tiko ku ta humelela hakunene kutani mawunwa?

Kuzilava u ta hlamala hi ku tiva lezi a Biblia gi zi wulako hakunene xungetano hi kugumesa ka tiko. A Biblia gi nyika zigelo za kuva hi rinzela a kugumesa ka tiko gi tlhela gi tlhamusela lezaku a vokari va nga ha khunguvanyeka loku va alakanya lezaku a kugumesa ka hlwela ku chikela. Ha ku kuca lezaku u wona a mihlamulo ya Biblia ka ziwutiso zi talako ku mahiwa xungetano hi kugumesa ka tiko.

Xana a misava yi ta hiswa?

HLAMULO WA BIBLIA: “[Nungungulu i] yimisile misava ziseketelweni za yona, yi nga tsekatseki kala kupinzuka.” — TISIMU 104:5.

A misava yi nga ta loviswa, ne hi nzilo ge hambu hi tinwani tindlela. A wutshanwini ga lezo, a Biblia gi gonzisa lezaku a xirenzelekwani lexi xa misava hi wona a muti wa vanhu kala kupinzuka. A bhuku ga Tisimu 37:29 gi ngalo: “A valulamileko va taga tshomba ya tiko, va aka ka gona kala kupinzuka.” — Tisimu 115:16; Isaya 45:18.

Anzhako ka ku ngha Nungungulu a vangile misava, yena i te ngalo yi “wa sasekile nguvu,” niku yena wa ha simama a yi wonisa lezo. (Genesisi 1:31) A wutshanwini ga ku lovisa misava, yena i tsumbisile ku “lovisa lava va onhako misava” a tlhela a yi vikela lezaku yi nga loviswi. — Kuvululelwa 11:18.

Kanilezi, kuzilava u nga ha hlamala lezi zi wuliwako ka 2 Pedro 3:7. A vesi lego gi ngalo: “A matilo laya ma nga kona makunu, ni misava, zi hlayiselwe nzilo.” Xana lezo a zi kombi lezaku a misava yi ta hiswa? A lisine hi lezaku a Biblia ga tshuka gi tirisa a magezu “matilo,” “misava,” ni “nzilo” hi ndlela yo fananisa. Hi xikombiso, loku a bhuku ga Genesisi 11:1 giku: “A misaveni yontlhe ku wa hi ni lirimi linwe,” gi tirisa ‘misava’ hi ndlela yo fananisa kasi ku wula vanhu.

A mongo wa 2 Pedro 3:7 wu komba lezaku a matilo, misava, ni nzilo zi kumbukilweko laho zonawu za ku fananisa. A mavesi ya 5 ni 6 ma ringanisa a masiku ya hina ni Ntalo wa masikwini ya Noa. Ka xikhati lexo, ku lo loviswa a tiko ga kale, kanilezi a xirenzelekwani xa hina xa misava a xi lovangi. A Ntalo wu lo fuvisa a vanhu va tihanyi kutani “misava” ya tihanyi. Wu tlhelile wu fuvisa a “matilo” yo kari — ku nga vanhu lava va nga hi vafumeli xikhatini lexo. (Genesisi 6:11) Hi kufanana, a bhuku ga 2 Pedro 3:7 gi profeta a kuloviswa ka pinzukelwa ka vanhu vo biha ni mifumo ya vona yo biha a ku fana ni ku loviswa hi nzilo.

Zini zi to maheka kugumeseni ka tiko?

HLAMULO WA BIBLIA: “A tiko ga hunza, ni kunavela ka gona; kanilezi loyi a mahako kuranza ka Nungungulu i ta tshama kala kupinzuka.” — 1 JOHANI 2:17.

“A tiko” legi gi hunzako a hi misava, kanilezi i tiko ga vanhu lava a mahanyela yabye ma nga zwananiko ni kuranza ka Nungungulu. A ku fana ni dokodela loyi a zi kotako ku panza mubabyi kasi ku ponisa a wutomi gakwe, Nungungulu i ta ‘lobyisa’ a vakubiha lezaku a valulamileko va zi kota ku ti buza khwatsi hi wutomi misaveni. (Tisimu 37:9) Hi ka mawonela lawa, a “kugumesa ka tiko” i nchumu wa wu nene.

A mawonela lawo ya ma nene ya “kugumesa ka tiko” ma kombiswa hi wuhunzuluseli ga Biblia, legi gi hunzuluselako magezu lawo kota “kugumesa ka mafambisela ya zilo.” (Mateu 24:3; Tradução do Novo Mundo) Kota lezi a vanhu ni misava va to pona a kugumesa, xana a zi hehuki ku alakanya lezaku anzhako ka kugumesa ka mafambisela lawa ku tata a mafambisela maswa ya zilo? A Biblia gi ngalo hi zalezo zi to maheka hakuva ga wulawula hi “tiko gi tako.” — Luka 18:30.

Jesu i vitanile a nguva leyo ya ha tako lezaku “ku vuxetwa luswa ka zontlhe.” Ka xikhati lexo, yena i ta tlhelisela vanhu ka matshamela lawa Nungungulu a nga ma alakanyele kusanguleni. (Mateu 19:28) Zonake hi ta ti buza hi

• Misava ya paradise lomu a vanhu vontlhe va tova ni titshomba ni kuhlayiseka. — Isaya 35:1; Mika 4:4.

• Ntiro wo nyawula ni wo xalalisa. — Isaya 65:21-23.

• Kuchumiwa ka mababyi wontlhe. — Isaya 33:24.

• Kutlhelela wujaheni. — Joba 33:25.

• Kuvuxiwa ka vafileko. — Johani 5:28, 29.

Loku hi maha “kuranza ka Nungungulu,” ku nga lezi a zi lavako ka hina, a hi na xigelo xa ku chava a kugumesa ka tiko. A wutshanwini ga lezo, hi fanele ku ku rinzela hi mahlo yo pswhuka.

Xana a kugumesa ga tiko ku laha kusuhani hakunene?

HLAMULO WA BIBLIA: “Laha mu ta nga wona lezi zilo zi maheka, zi tiveni lezaku a mufumo wa Nungungulu wu tshinele.” — LUKA 21:31.

Lomu ka bhuku The Last Days Are Here Again, Mugonzisi Richard Kyle i tsalile lezaku “a kucica ka xitshuketi ni vilinganya yi wonekako xikari ka vanhu zi vanga a moya wu zwananako ni ziprofeto za kugumesa ka tiko.” Zi mahekisa lezo nguvunguvu loku a kucica loko kutani a vilinganya leyo yi karata a ku yi tlhamusela.

Kanilezi, a vaprofeti va Biblia lava va wulawulileko hi kugumesa ka tiko va wa nga zami ku tlhamusela a zigelo za kubiha ka zilo masikwini yabye. A wutshanwini ga lezo, vona va lo pimiselwa hi Nungungulu lezaku va tlhamusela a matshamela lawa ma nga wa ta komba a kugumesa ka tiko ku nga tshinele. Wona a ziprofeto zo kari u tlhela u ti wutisa lezaku xana za tatiseka xikhatini xa hina ke.

• Tiyimpi, tindlala, kutsekatseka ka misava, ni mitungu yi dayako. — Mateu 24:7; Luka 21:11.

• Kuengeteleka ka hombe ka wugevenga. — Mateu 24:12.

• Kuxakelwa ka misava hi vanhu. — Kuvululelwa 11:18.

• Vanhu va ku ti ranza wutsumbu, varanzi va mali, ni va ranzako ku ti tsakisa ku hunza ku ranza Nungungulu. — 2 Timote 3:2, 4.

• Kuhohloka ka mingango. — 2 Timote 3:2, 3.

• Kungakhatali ku anzileko xungetano hi xikombiso xa kutshinela ka kugumesa ka tiko. — Mateu 24:37-39.

• Kuxumayelwa ka mahungu yo saseka ya Mufumo wa Nungungulu misaveni yontlhe. — Mateu 24:14.

Kota lezi Jesu a nga wula, a ku wona “zontlhe lezi” zilo zi hi tivisa lezaku a kugumesa ka tiko ku kusuhani. (Mateu 24:33) A Timboni ta Jehova ti kholwa lezaku a xikombiso lexo xa lisine, niku tona ti hlengela a kukholwa kabye ni vanwani hi ku xumayela ka 236 wa matiko.

Lezi a kugumesa ku nga kala kuta hi masiku lawa ma nga alakanyelwe, xana lezo zi wula ku ngalo ku nga ta tshuka kuta?

HLAMULO WA BIBLIA: “Laha va ta ngaku ngalo: Matiko ma etlele, a ku na nchumu, zonake hi xitshuketi xa zalezo a kulobyiswa ku tava hehla kabye, khwatsi hi wasati laha a lunwako; vona cima va nga ta pona.” — 1 VA LE TESALONIKA 5:3.

A Biblia gi fananisa a kuloviswa ka tiko ni kulunwa — laha a mamani a telwako hi kubayisa ka xitshuketi. A xikhati lexi xi yisako kugumeseni xonawu xi fana ni nyimba, hakuva a mamani loyi a nga nayo wa wona zikombiso zi yako zi engeteleka za lezaku i ta phuluka lokuloku. Dokodela a nga ha dumba a siku ga kuphuluka kakwe; kanilezi, hambu loku a hlwela ku phuluka a mamani i ta simama a kholwa lezaku a nwanana i ta pswaliwa lokuloku. Hi kufanana, a kuphazama kwihi ni kwihi ku vileko kona xungetano hi masiku ya kugumesa a ku cici a zikombiso za lezaku hi hanya “masikwini yo gumesa.” — 2 Timote 3:1.

Kuzilava u nga ha wutisa lezi, ‘Loku ku hi lezaku a xikombiso xa kutshinela ka kugumesa xa woneka xiku dlunya, hikuyini a vanhu vo tala va nga xi woniko?’ A Biblia gi komba lezaku loku a kugumesa ku hi kusuhani, a votala va ta kanyisa a xikombiso xa kona. A wutshanwini ga ku vumela lezaku ku kona kucica masikwini lawa yo gumesa, vona va tseketsela vaku: “Cima ka lezi vadadani va nga etlela, zontlhe za ha tshamisile zalezo zi nga tshamisile zona hi le kusanguleni ka kuvangiwa.” (2 Pedro 3:3, 4) Hi manwani mawulela, a xikombiso xa masiku yo gumesa xa woneka xiku dlunya, kanilezi a votala va xi kanyisa. — Mateu 24:38, 39.

A nzima leyi yi wulawulile hi zikombiso zo kari ntsena za lomu Mitsalweni zi kombako lezaku a kugumesa ku laha kusuhani.a Xana wa zi lava ku tiva zinwani? Loku zi hi tano, hikuyini u nga anguliko a Timboni ta Jehova lezaku u kombela a xigonzo xa Biblia xa mahala? A zigonzo lezo zi nga mahiwa kaya ka wena, ka wutshamu ginwani gi ku hehukelako, kutani hi ku tirisa a telefone. Lexi xi lavekako ntsena ku ti nyika xikhati, niku a mabhinzu ya kona a ma na ku ecanyiswa.